ଭଦ୍ରକ, ୧୪ା୫ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକ ଜିଲା ତିହିଡ଼ି ବ୍ଲକ ଦୌଲତପୁର ପଞ୍ଚାୟତ ଅଧୀନ ପୀରହାଟ ବଜାରରେ ଥିବା ଶ୍ରୀଶ୍ରୀ ବାସନ୍ତୀ ଠାକୁରାଣୀଙ୍କ ସର୍ବସାଧାରଣ ଯଜ୍ଞକୁଣ୍ଡ ଜମି ପୂର୍ବ ପରି ସର୍ବସାଧାରଣଙ୍କ ବ୍ୟବହାର ପାଇଁ ମାନ୍ୟବର ହାଇକୋର୍ଟ ଐତିହାସିକ ରାୟ ପ୍ରଦାନ କରିଛନ୍ତି । ଏହି ରାୟ ପ୍ରକାଶ ପାଇବା ପରେ ମା’ବାସନ୍ତୀ ଠାକୁରାଣୀ ପୂଜା କମିଟିର ସଦସ୍ୟ ସଦସ୍ୟା ଓ ଶ୍ରଦ୍ଧାଳୁ ଅଞ୍ଚଳବାସୀଙ୍କ ମଧ୍ୟରେ ଖୁସିର ଲହରି ଖେଳିଯାଇଛି । ପ୍ରକାଶ ଯେ, ତିହିଡ଼ି ତହସିଲ ମାଲପୁର ମୌଜାର ହାଲ ଖାତା ନଂ ୩୨୩ ଏବଂ ପ୍ଲଟ ନଂ ୪୮୮/୧୧୬୮ର ୧୨ ଡେସିମିଲ ଜମିରେ ମା’ ବାସନ୍ତୀ ଠାକୁରାଣୀଙ୍କ ବାର୍ଷିକ ପୂଜା ବିଧି ସହିତ ଯଜ୍ଞାଦି କାର୍ଯ୍ୟମାନ ୧୯୪୮ ମସିହା ଠାରୁ ଅନୁଷ୍ଠିତ ହୋଇ ଆସୁଥିଲା । ମାତ୍ର ଏହି ଜମିକୁ ଜନୈକ ବ୍ୟକ୍ତି ଚଞ୍ଚକତା ପୂର୍ବକ ମାଲପୁର ଗ୍ରାମର ବାଇଧର ମୁଦୁଲି ଓଗେରଙ୍କୁ ବିକ୍ରି କବଲା କରିଦେଇଥିଲେ । ପରେ ବାଇଧର ଯଜ୍ଞକୁଣ୍ଡ ଜମିକୁ ଦଖଲ କରିବାରୁ ବିବାଦ ଉପୁଜିଥିଲା । ଏହି ମାମଲା ୧୯୮୬ ମସିହାରେ ତିହିଡ଼ି ତହସିଲ, ଭଦ୍ରକ ମୁନସବ କୋର୍ଟ ଓ ଜିଲ୍ଲା ଜଜ୍କୋର୍ଟରେ ଚାଲିଥିଲା । ପରେ ହାଇକୋର୍ଟରେ କେଶ ନଂ ଆରଏସ୍ଏ ୨୪୪/୨୦୧୪ ମୂଳେ ପହଞ୍ôଚଥିଲା । ଦୀର୍ଘ ବର୍ଷର ହାଇକୋର୍ଟରେ ଆଇନଗତ ଲଢ଼େଇ ପରେ ମାନ୍ୟବର ହାଇକୋର୍ଟ ସମସ୍ତ ତଳ କୋର୍ଟର ରାୟକୁ ରଦ୍ଦ କରି ଉକ୍ତ ବୃତ୍ତିକୁ ପୂର୍ବପରି ସର୍ବସାଧାରଣ ଯଜ୍ଞକୁଣ୍ଡ ବୃତ୍ତି ଭାବେ ବ୍ୟବହର କରାଯିବ ବୋଲି ନିର୍ଦ୍ଦେଶ ଦେଇଛନ୍ତି । ତେବେ ଏହି ଐତିହାସିକ ରାୟ ପରେ ସ୍ଥାନୀୟ ଅଞ୍ଚଳର ଜନସାଧାରଣଙ୍କ ସହଯୋଗରେ ପୂଜା କମିଟି ଉକ୍ତ ସ୍ଥାନରେ ମା’ବାସନ୍ତୀ ଠାକୁରାଣୀଙ୍କ ରୁଦ୍ର ମହାଯଜ୍ଞର ଆୟୋଜନ କରାଯାଇଛି । ଏହି ଯଜ୍ଞ ଆସନ୍ତା ୨୨.୫.୨୦୨୩ ତାରିଖ ରୁ ୨୪.୦୫.୨୦୨୩ ତାରିଖ ଶୀତଳଷଷ୍ଠୀ ପର୍ଯ୍ୟନ୍ତ ଅନୁଷ୍ଠିତ ହେବ ବୋଲି ଜଣାପଡ଼ିଛି ।
