ଭଦ୍ରକ, ୧୯ା୧ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭୁବନେଶ୍ୱରରେ ଅବସ୍ଥାପିତ ଓଡ଼ିଶାର ସ୍ୱନାମଧନ୍ୟ ପ୍ରକାଶନ ସଂସ୍ଥା ‘ଟାଇମ୍ପାସ’ ପକ୍ଷରୁ ଭଦ୍ରକଠାରେ ବିଗତ ଦୁଇବର୍ଷ ଧରି ଆୟୋଜିତ ହୋଇଆସୁଥିବା ନିଆରା ସାହିତ୍ୟ ଉତ୍ସବ ‘ସାଳନ୍ଦୀ ସାହିତ୍ୟ ସଙ୍ଗମ’ର ତୃତୀୟ ସଂସ୍କରଣ ଆଗାମୀ ଫେବୃଆରୀ ୧୪ ଓ ୧୫ ଦୁଇଦିନ ଧରି ଅନୁଷ୍ଠିତ ହେବାକୁ ଯାଉଛି। ସାଳନ୍ଦୀ ବାଇପାସସ୍ଥିତ ‘ସଙ୍ଗମ କନ୍ଭେନ୍ସନ୍’ରେ ପ୍ରତ୍ୟହ ପୂର୍ବାହ୍ନ ୧୦ଟାରୁ ସଂଧ୍ୟା ୭ଟା ପର୍ଯ୍ୟନ୍ତ ଏହି ଉତ୍ସବ ଅନୁଷ୍ଠିତ ହେବ। ଗତବର୍ଷ ପରି ଏଥର ମଧ୍ୟ ଭଦ୍ରକର ବରପୁତ୍ରମାନଙ୍କ ନାମରେ ନାମିତ ଆଠ ଜଣ ବରିଷ୍ଠ ପ୍ରତିଭାଙ୍କୁ ସାଳନ୍ଦୀ ସୃଜନ ପୁରସ୍କାର ଓ ସାହିତ୍ୟର ଉତରଣ ପାଇଁ କାର୍ଯ୍ୟରତ ପାଂଚ ଜଣ ବ୍ୟକ୍ତିବିଶେଷଙ୍କୁ ସାହିତ୍ୟସଖା ସମ୍ମାନ ପ୍ରଦାନ କରାଯିବ। ନୂଆବଜାରସ୍ଥିତ କର୍ମଚାରୀ ଭବନରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଉତ୍ସବର ନିର୍ଦ୍ଦେଶକ ସରୋଜ ବଳ ଏ ସଂପର୍କରେ ସୂଚନା ଦେଇ କହିଥିଲେ ଯେ ଭଦ୍ରକ ମାଟିରେ ଜନ୍ମିତ ସୁଖ୍ୟାତ ପୂର୍ବସୁରୀଙ୍କ ନାମରେ ନାମିତ ଏହିସବୁ ପୁରସ୍କାର କେବଳ ପ୍ରତିଭାପୂଜା ନୁହେଁ, ବରଂ ପରପିଢ଼ିଙ୍କୁ ପୂର୍ବପିଢ଼ି ସହିତ ଯୋଡ଼ିବାର ଏକ ବିନମ୍ର ପ୍ରୟାସ। ସାଳନ୍ଦୀ ସାହିତ୍ୟ ସଙ୍ଗମର ବିଭିନ୍ନ ସତ୍ରରେ ରାଜ୍ୟର ଭିନ୍ନଭିନ୍ନ ସ୍ଥାନରୁ ପ୍ରସିଦ୍ଧ ଲେଖକ, ସଂପାଦକ, ପ୍ରକାଶକ, ନାଟ୍ୟକାର, ଅଭିନେତା, ସଂଗୀତଜ୍ଞ ଓ ଚିତ୍ରଶିଳ୍ପୀମାନେ ଯୋଗ ଦେଉଥିବାରୁ ଏହା ସାରା ଓଡ଼ିଶାରେ ଭଦ୍ରକ ମାଟିର ସୃଜନଶୀଳ ଅସ୍ମିତା ଓ ଭାଇଚାରା ପ୍ରଦର୍ଶନରେ ସହାୟକ ହେବ। ପୁରସ୍କୃତ ଓ ସଂବର୍ଦ୍ଧିତ ପ୍ରତିଭାଙ୍କ ନାମ ଫେବୃଆରୀ ପ୍ରଥମ ସପ୍ତାହରେ ଘୋଷଣା କରାଯିବ ବୋଲି ସେ ସୂଚନା ଦେଇଥିଲେ। ଏହି ଅବସରରେ ଚଳିତବର୍ଷ ପାଇଁ ଦିଗ୍ଦର୍ଶକ ଓ କର୍ମକର୍ତାମାନଙ୍କ ନାମ ଘୋଷଣା କରାଯାଇଥିଲା। ପୂର୍ବପରି ଗାଳ୍ପିକ ପବିତ୍ର ପାଣିଗ୍ରାହୀ ସଭାପତି ଭାବେ ଏବଂ କବି କିଶୋର ପାଣିଗ୍ରାହୀ ଓ ଗୀତିକାର ପଂଚାନନ ନାୟକ ଉପସଭାପତି ଭାବେ ଦାୟିତ୍ୱରେ ରହିବେ। ପରିଚାଳନା ସଂପାଦକ ଭାବେ ଯୁବଲେଖକ ତଥା ପ୍ରଶାସକ ସୌମ୍ୟଶ୍ରୀ ପାଣିଗ୍ରାହୀ କାର୍ଯ୍ୟଭାର ଗ୍ରହଣ କରିଥିବାବେଳେ କବି ଚିତରଞ୍ଜନ ନାୟକ ସୃଜନଶୀଳ ସଂଯୋଜକ ଦାୟିତ୍ୱ ତୁଲାଇବେ। ଅମିତାଭ ଖିଲାର, କୈଳାଶ ବେହେରା, ସଂଗ୍ରାମ କେଶରୀ ସେନାପତି ଏବଂ ପ୍ରୀତିପଦ୍ମା ଦାସ ସହସଂଯୋଜକ ଭାବେ ଉତ୍ସବ ଆୟୋଜନରେ ସାମିଲ ହେବେ। ଏଥିସହିତ ବରିଷ୍ଠ ସାମ୍ବାଦିକ ତଥା କବି ଡ. ହରିହର ନାୟକ ଗଣମାଧ୍ୟମ ଉପଦେଷ୍ଟା ଏବଂ ପ୍ରମୋଦ ରାୟ ଓ ତପନ ସ୍ୱାଇଁ ଗଣମାଧ୍ୟମ ସଂଯୋଜକ ଭାବେ ଚଳିତବର୍ଷ ଏହି ଉତ୍ସବ ସହ ସଂପୃକ୍ତ ରହିବେ। ଡ. ରାଧାବିନୋଦ ନାୟକ, ବାସୁଦେବ ବାରିକ, ଝରଣା ପଟ୍ଟନାୟକ, ଡ. ରାଧାରାଣୀ ମହାପାତ୍ର, ଡ. ପ୍ରଭାତ ନଳିନୀ ମହାପାତ୍ର, ପୂର୍ଣ୍ଣଚନ୍ଦ୍ର ବହଳୀ, ଡା. ବିକାଶ ନାରାୟଣ ନନ୍ଦ ପ୍ରମୁଖ ପୂର୍ବପରି ସାଳନ୍ଦୀ ସାହିତ୍ୟ ସଙ୍ଗମର ସଫଳ ଆୟୋଜନ ପାଇଁ ପରାମର୍ଶ ଓ ଦିଗ୍ଦର୍ଶନ ଦେବେ। ଚଳିତ ବର୍ଷ ଜିଲ୍ଲା ସଂଯୋଜକ ଭାବେ ଅବିନାଶ ପଣ୍ଡା (ଭଦ୍ରକ), ଉତ୍ପଳ ମହାନ୍ତି (ବାଲେଶ୍ୱର), ଅଶୋକ ଚନ୍ଦ୍ର ପୁହାଣ (କେନ୍ଦୁଝର), ଅସୀମା ସାହୁ (ମୟୂରଭଞ୍ଜ), ପ୍ରଜ୍ଞା ପ୍ରବର୍ତିକା ଦାଶ (ଯାଜପୁର) ଏବଂ ଅତୁଲ ବଳ (କେନ୍ଦ୍ରାପଡ଼ା) ଦାୟିତ୍ୱ ନିର୍ବାହ କରିବେ ବୋଲି ନିଷ୍ପତି ନିଆଯାଇଛି। ବିଗତ ବର୍ଷ ପରି ସାହିତ୍ୟ, ସଙ୍ଗୀତ, ସିନେମା, ନୃତ୍ୟ, ଚିତ୍ର ଆଦି ବିଭିନ୍ନ ବିଭାଗରେ ସୃଜନଶୀଳ କାର୍ଯ୍ୟକ୍ରମ ଅନୁଷ୍ଠିତ ହେବ। ଏପରି ବିରଳ ସୃଜନପର୍ବରେ ସାମିଲ ହୋଇ ପୂର୍ବପରି ଏହାକୁ ସଫଳ କରିବାକୁ ସଙ୍ଗମର ସମସ୍ତ କର୍ମକର୍ତା ନିବେଦନ କରିଛନ୍ତି।
