ଭଦ୍ରକ, ୯ା୧୧ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଟ୍ରକ ଧକ୍କାରେ ଯୁବକ ଗୁରୁତର । ଏମିତି ଘଟଣା ଭଦ୍ରକ ଜିଲା ବାସୁଦେବପୁର ସହରର ଟ୍ରାଫିକ ଛକ କାଳୀ ମଣ୍ଡପ ନିକଟରେ ବୋଲି ଜାଣିବାକୁ ମିଳିଛି । କାଳୀପୂଜା ପାଇଁ ସହରରେ ନାହିଁ ନଥିବା ଭିଡ ସମୟରେ ଧାମରା ବନ୍ଦରକୁ ଯାତାୟାତ କରୁଥିବା ମାଲବାହୀ ଟ୍ରକ ଗୁଡିକର ବେପରୁଆ ଗାଡିଚାଳନା ଯୋଗୁଁ ଏହିପରି ଦୁର୍ଘଟଣା ବାରମ୍ବାର ଘଟୁଥିବାରୁ ଜନ ଅସନ୍ତୋଷ ବୃଦ୍ଧି ପାଇବାରେ ଲାଗିଛି । ଗୁରୁତର ଯୁବକ ଜଣକ ଗୁଆଗଡିଆ ଗ୍ରାମର ବୈରାଗୀ ନାୟକଙ୍କ ପୁଅ ପରେଶ କୁମାର ନାୟକ ବୋଲି ଜଣାପଡିଛି । ପ୍ରଥମିକ ଚିକିତ୍ସା ପରେ କଟକବଡ ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଥିବା ଜାଣିବାକୁ ମିଳିଛି । ପରେଶଙ୍କ ଦୁଇ ଗୋଡ ଉପରେ ଟ୍ରକ ଚଢିଯାଇଥିବା ପ୍ରତ୍ୟକ୍ଷଦର୍ଶୀଙ୍କ ଠାରୁ ଶୁଣିବାକୁ ମିଳିଛି । ଦୁର୍ଘଟଣା ସ୍ଥଳରେ ଟ୍ରକ ଅଟକ ରହିଛି । ଘଟଣାସ୍ଥଳରେ ପୋଲିସ ପହଂଚି ତଦନ୍ତ କରୁଛି ।
