ଭଦ୍ରକ, ୧୧ା୨ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଆଜି ଧାମନଗର ଛକ ଠାରେ ଟେକ୍ସଟାଇଲ୍ ପାର୍କ ପ୍ରତିଷ୍ଠା ବିଳମ୍ବ ଦୃଷ୍ଟିରୁ କେନ୍ଦ୍ର ପେଟ୍ରୋଲିୟମ୍ ଏବଂ ପ୍ରାକୃତିକ ଗ୍ୟାସ୍ ମନ୍ତ୍ରୀ ରାମେଶ୍ୱର ତେଲିଙ୍କୁ ସାକ୍ଷାତ୍ କରିଛନ୍ତି ଭଦ୍ରକ ସାଂସଦ ମଂଜୁଲତା ମଣ୍ଡଳ । ଏବଂ ତୁରନ୍ତ ଏହି କାର୍ଯ୍ୟ ଆରମ୍ଭ କରିବା ନେଇ ଅନୁରୋଧ ମଧ୍ୟ କରିଛନ୍ତି । ପ୍ରକାଶ ଥାଉକି ୨୦୨୦ ସେପ୍ଟେମ୍ବର ୨୧ ତାରିଖ ସଂସଦର ଶୂନ୍ୟକାଳରେ ସାଂସଦ ଶ୍ରୀମତୀ ମଣ୍ଡଳ ଧାମନଗର ଛକରେ ଶୀଘ୍ର ଟେକ୍ସଟାଇଲ ପାର୍କ ପ୍ରତିଷ୍ଠା ପାଇଁ ଗୃହର ଅଧ୍ୟକ୍ଷଙ୍କ ଜରିଆରେ କେନ୍ଦ୍ର ପେଟ୍ରୋଲିୟମ୍ ଓ ପ୍ରାକୃତିକ ଗ୍ୟାସ୍ ମନ୍ତ୍ରୀଙ୍କ ନିକଟରେ ଦାବି ରଖିଥିଲେ । ଏହାର ଉତ୍ତରରେ ମାନ୍ୟବର କେନ୍ଦ୍ରମନ୍ତ୍ରୀ ରାମେଶ୍ୱର ତେଲି ତାଙ୍କ ପତ୍ର ସଂଖ୍ୟା କ୍ୟୁ-୨୧୦୧୧/୧/୨୦୨୧-ଇଡି/୧୮୧୧୪, ତା ୦୩.୧୨.୨୧ ରିଖ ରେ ୨୦୨୩-୨୪ ଆର୍ଥିକ ବର୍ଷ ମଧ୍ୟରେ ପ୍ରକଳ୍ପ କାର୍ଯ୍ୟ ଆରମ୍ଭ ହେବ ବୋଲି ସାଂସଦଙ୍କୁ ଜଣାଇଥିଲେ । ଇତିମଧ୍ୟରେ ରାଜ୍ୟ ସରକାର ଉକ୍ତ ପ୍ରକଳ୍ପ ପାଇଁ ସମସ୍ତ ପ୍ରକାର ଭିତ୍ତିଭୂମି ଯଥା ୬୦ ଏକର ଜମି, ବିଦ୍ୟୁତ୍, ରାସ୍ତା ଓ ଜଳ ଆଦି ଯୋଗାଇ ଦେଇଛନ୍ତି । ମାତ୍ର ଦୁଃଖ ଓ ପରିତାପର ବିଷୟ କେନ୍ଦ୍ର ସରକାରଙ୍କ ପେଟ୍ରୋଲିୟମ୍ ଓ ପ୍ରାକୃତିକ ଗ୍ୟାସ୍ ବଭାଗ ଉକ୍ତ ପ୍ରକଳ୍ପ ପ୍ରତିଷ୍ଠା ପାଇଁ ଟିକେ ବି ଇଚ୍ଛା ପ୍ରକାଶ କରିନାହାଁନ୍ତି । ଏହି ପ୍ରକଳ୍ପ ପ୍ରତିଷ୍ଠା ହେଲେ ବାହାର ରାଜ୍ୟ ଗୁଜୁରାଟ, ଆନ୍ଧ୍ର, ସୁରତ ପରି ରାଜ୍ୟରେ ନିଜର ପରିବାର ପୋଷଣ ପାଇଁ ନଯାଇ ଏହିଠାରେ ନିଯୁକ୍ତି ସୁଯୋଗ ପାଇବେ । ଏହି ଟେକ୍ସଟାଇଲ୍ ପାର୍କ ପ୍ରତିଷ୍ଠା ସହିତ ଅନେକ ଆନୁସଙ୍ଗିକ କଳକାରଖାନା ମଧ୍ୟ ପ୍ରତିଷ୍ଠା ହୋଇପାରିବ । ଯାହାଫଳରେ ଅନେକ ଶିକ୍ଷିତ କୁଶଳୀ ଏବଂ ଅଣକୁଶଳୀ ଯୁବକଯୁବତୀଙ୍କ ନିଯୁକ୍ତି ପାଇବା ପାଇଁ ସୁଯୋଗ ସୃଷ୍ଟି ହେବା ସହିତ ରାଜ୍ୟ ଅର୍ଥନୈତିକ ସୁଦୃଢ ହେବା ସହ ବେକାର ସମସ୍ୟା ଦୂର ହୋଇପାରିବ । ଏହି ଆଲୋଚନା ଫଳରେ ମାନ୍ୟବର ମନ୍ତ୍ରୀ ଉକ୍ତ ଶିଳ୍ପ ପ୍ରତିଷ୍ଠାର ବିଳମ୍ବ ପାଇଁ ଭାରତୀୟ ତୈଳ ନିଗମର ମୁଖ୍ୟ ପରିଚାଳନା ନିର୍ଦ୍ଦେଶକଙ୍କୁ ପଦକ୍ଷେପ ନେବା ପାଇଁ ଲିଖିତ ନିର୍ଦ୍ଦେଶ ଦେଇଥିଲେ । ଯାହା ଅତ୍ୟନ୍ତ ସନ୍ତୋଷ ଜନକ ଥିଲା । ଏହି ଆଲୋଚନାରେ ଧାମନଗରର ପୂର୍ବତନ ବିଧାୟକ ମୁକ୍ତିକାନ୍ତ ମଣ୍ଡଳ ଉପସ୍ଥିତ ଥିଲେ ।
