କୋରାପୁଟ ୦୮-୦୬ (ଓଡିଆ ପୁଅ /ରଂଜନ ଦାସ) ଜୟପୁର ସଦର ଥାନା ଦ୍ୱାରା କୋଟିଏ ଟଙ୍କାର ଗଞ୍ଜେଇ ଜବତ କରା ଯାଇଥିବାବେଳେ ଚୋରା ଗଞ୍ଜେଇ ଚାଲାଣ ଅଭିଯୋଗରେ ୨ଜଣକୁ ଗିରଫ କରାଯାଇଛି । କୋରାପୁଟ ଆଡୁ ଜୟପୁରକୁ ଯାଉଥିବା ଏମଏଚ-୧୮ବିଜି ୫୫୪୧ ନମ୍ବର ଥିବା ଏକ ଟ୍ରକରେ ଗଞ୍ଜେଇ ଚାଲାଣ ହେଉଥିବା ଖବର ବିଶ୍ୱସ୍ତ ସୂତ୍ରରୁ ଜୟପୁର ସଦର ଥାନା ଭାରପ୍ରାପ୍ତ ଅଧିକାରୀ ଏ.ମହାଙ୍କୁଡଙ୍କୁ ମିଳିଥିଲା । ଓଆଇସି ମହାଙ୍କୁଡଙ୍କ ନିର୍ଦ୍ଦେଶରେ ସବ-ଇନସପେକ୍ଟର ଏନ.କେ.ଟପ୍ପୋ ଓ ପୋଲିସ କର୍ମଚାରୀ ୨୬ ନଂ ଜାତୀୟ ରାଜପଥର ଜୟପୁର-କୋରାପୁଟ ଘାଟିରେ ଗାଡିକୁ ଅପେକ୍ଷା କରି ରହିଥିଲେ । ଟ୍ରକ ପହଂଚିବା ମାତ୍ରେ ପୋଲିସ ଟିମ ଗାଡିକୁ ଅଟକାଇ ଚେକିଂ କରିବା ବେଳକୁ ଗାଡିରେ ଥିବା ୨୦୦ଟି ପ୍ୟାକେଟରୁ ୧୦୯୯ କିଲୋଗ୍ରାମ ଗଞ୍ଜେଇ ମିଳିଥିଲା । ପୋଲିସ ଟ୍ରକ ଗଞ୍ଜେଇ ଜବତ କରିଥିବାବେଳେ ଘଟଣାରେ ମହାରାଷ୍ଟ୍ର ଜଲଗାଓଁ ଜିଲା କାସୋଡା ଥାନା ଭାନଖୋଟେ ଗ୍ରାମର ଚନ୍ଦ୍ରକାନ୍ତ ସୁବାସ ପଟ୍ଟିଲ(୫୦) ଓ ଫାରଖଣ୍ଡି ଗ୍ରାମର ରାଜେନ୍ଦ୍ର ଦେବୀଦାସ ପାଟ୍ଟିଲ(୩୦)କୁ ଗିରଫ କରିଛି । ଜବତ ଗଞ୍ଜେଇର ଆନୁମାନିକ ବଜାର ଦର ୧କୋଟି ୧୦ ଲକ୍ଷ ଟଙ୍କା ହେବ ବୋଲି ଜଣାପଡିଛି । ଗିରଫ ଅଭିଯୁକ୍ତ ମାନଙ୍କ ଠାରୁ ପୋଲିସ ୨ଟି ମୋବାଇଲ ଫୋନ୍ ଜବତ କରି ଅଧିକ ତଦନ୍ତ ଚଳାଇଛି ।
