ଭଦ୍ରକ, ୯ା୭ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକ ଜିଲାର ଚାନ୍ଦବାଲି ବ୍ଲକ୍ ଅଧୀନସ୍ଥ ଶୀତଳପୁର ଗାଁରେ ଏବେ କୁମ୍ଭୀର ଆତଙ୍କ ସ୍ଥାନୀୟ ଅଂଚଳରେ ଭୟର ବାତାବରଣ ଖେଳାଇ ଦେଇଛି । ଏପରିକି କୁମ୍ଭୀର ଭୟରେ ବିଦ୍ୟାଳୟକୁ ଛାତ୍ରଛାତ୍ରୀମାନେ ଯିବାକୁ ଅମଙ୍ଗ ହେଉଛନ୍ତି । ଏ ସଂପର୍କରେ ଯାହା ଜଣାଯାଏ ଏହି ଶୀତଳପୁର ଗାଁ ଦେଇ ପ୍ରବାହିତ ହୋଇଛି ସାଳନ୍ଦୀ ନଦୀ । ଏବେ ବର୍ଷାଋତୁ ଆରମ୍ଭ ହୋଇଯାଇଥିବାରୁ ଖାଦ୍ୟ ଅନ୍ୱେଷଣରେ ୧୫-୧୬ ଫୁଟ ଲମ୍ବର ହିଂସ୍ର କୁମ୍ଭୀର ମାନେ ନଦୀରେ ବିଚରଣ କରୁଛନ୍ତି । ଅନେକ ସମୟରେ ନଦୀକୂଳରେ ଛପି ଶୀକାର ପାଇଁ ଶୋଇ ରହୁଥିବାର ଦେଖାଯାଇଛି । ବିଶେଷକରି ନଦୀବନ୍ଧ ରାସ୍ତା ଦେଇ ପ୍ରତିଦିନ ଗ୍ରାଁରେ ଥିବା ବିଦ୍ୟାଳୟକୁ ଛାତ୍ରଛାତ୍ରୀମାନେ ଯାଉଥିବାବେଳେ ଗାଁ ଲୋକେ ମନ୍ଦିର ଓ ନିଜର ବିଭିନ୍ନ କାର୍ଯ୍ୟ ପାଇଁ ଯାତାୟତ କରିଥାନ୍ତି । ଏଥିସହ ଏହି ଗାଁରେ ପାନୀୟ ଜଳ ସମସ୍ୟା ରହିଥିବାରୁ ନଦୀଜଳ ଉପରେ ସ୍ଥାନୀୟ ଲୋକେ ନିର୍ଭର କରିଥାନ୍ତି । କିନ୍ତୁ ସକାଳ ସଂଜ ପର୍ଯ୍ୟନ୍ତ ଏହି ନଦୀ ଏବେ ଏକାଧିକ କୁମ୍ଭୀରଙ୍କ କବଜାରେ ରହିଥିବାରୁ ନଦୀବନ୍ଧ ଦେଇ ଯିବାପାଇଁ ସମସ୍ତେ ଭୟ କରୁଛନ୍ତି ।
ନଦୀକୂଳରେ ବସବାସ କରୁଥିବା ୧୦ ରୁ ଉର୍ଦ୍ଧ୍ୱ ପରିବାର ଲୋକେ ଦିନବେଳା ସିନା ଯେନତେନ ପ୍ରକାର ନିଜର କାର୍ଯ୍ୟ ତୁଲାଇ ଦେଉଛନ୍ତି, ହେଲେ ଅନ୍ଧାର ହେଲେ ଭୟରେ ଜୀବନ ବିତାଉଛନ୍ତି । ଗତ ଦୁଇଦିନ ହେବ ଏହି ନଦୀରେ ବିଶାଳକାୟ ଦୁଇଟି କୁମ୍ଭୀରକୁ ଦେଖିବା ପରେ ଗାଁ ଲୋକଙ୍କ ମନରେ ଛନକା ପଶିଛି । ପୂର୍ବରୁ କୁମ୍ଭୀର ଭୟ ଏଡାଇବା ସହ ସୁରକ୍ଷିତ ଯାତାୟତ ପାଇଁ ଗାଁ ଲୋକେ ଚାନ୍ଦା କରି ନଦୀକୂଳରେ ଜାଲ ବାନ୍ଧିଥିଲେ । ମାତ୍ର ଗତ କିଛିମାସ ତଳେ ନଦୀର ସୁରକ୍ଷା ବନ୍ଧ ସାଳନ୍ଦୀ ନଦୀକୁ ଧସିଯିବା ଫଳରେ ବନ୍ଧା ହୋଇଥିବା ଜାଲ ନଦୀ ମଧ୍ୟକୁ ଚାଲିଯାଇଛି । ଜଳସେଚନ ବିଭାଗ ପକ୍ଷରୁ ମାଟି ପଥର ପକାଯାଇ ବନ୍ଧଟିକୁ ସୁଦୃଢୀକରଣ କରାଯାଉଥିଲେ ମଧ୍ୟ ବନଖଣ୍ଡ ବିଭାଗ ପକ୍ଷରୁ କୁମ୍ଭୀରଙ୍କ ପ୍ରତିକାର ଦିଗରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ ବୋଲି ଅଭିଯୋଗ କରିଛନ୍ତି ଗାଁ ଲୋକେ । ଏହି କୁମ୍ଭୀର ଆତଙ୍କକୁ ନେଇ ବନଖଣ୍ଡ ବିଭାଗ ପକ୍ଷରୁ ନାଁ ଅଛି ସୂଚନା ଫଳକ, ନା ଅଛି ସୁରକ୍ଷିତ ଯାତାୟତ ବାଡ । ଫଳରେ ହିଂସ୍ର କୁମ୍ଭୀର ଗୁଡିକର ପାଟିରେ କେତେବେଳେ ଗୃହପାଳିତ ପଶୁ ବଳିପଡୁଛନ୍ତି ତ କେତେବେଳେ ନଦୀପଠାରେ ଛକି ରହିଥିବା ଏହି ନରଭକ୍ଷି ମଣିଷଙ୍କୁ ଝାମ୍ପି ନେଉଛି । ବନଖଣ୍ଡ ବିଭାଗ ନିକଟରେ ବହୁବାର ଏ ସଂପର୍କରେ ଅଭିଯୋଗ କରାଯାଉଥିଲେ ମଧ୍ୟ ତାହା ପାଣିର ଗାର ହୋଇଛି । ତେଣୁ ଏ ଦିଗରେ ଜିଲା ପ୍ରଶାସନ ତୁରନ୍ତ ପଦକ୍ଷେପ ନେବାକୁ ସାଧାରଣରେ ଦାବି ହୋଇଛି ।
