ଭଦ୍ରକ, ୬ା୨ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକ ବ୍ଲକ୍ ଅଧୀନ ଗୁଜିଦରଡା ପଂଚାୟତ ବିକାଶ କାର୍ଯ୍ୟରେ ବ୍ୟାପକ ଦୁର୍ନୀତି ହୋଇଥିବା ନେଇ ଅଭିଯୋଗର ତଦନ୍ତ ଆରମ୍ଭ କରିଛି ବାଲେଶ୍ୱର ଭିଜିଲାନ୍ସ ଡିଭିଜନ୍ ଟିମ୍ । ସ୍ୱତନ୍ତ୍ର ଏକ୍ସପର୍ଟ ଟିମ୍ ଆଜି ଗୁଜିଦରଡା ପଂଚାୟତରେ ପହଞ୍ôଚ ହୋଇଥିବା ବିଭିନ୍ନ ରାସ୍ତା କାର୍ଯ୍ୟର ଯାଞ୍ଚ କରିଛନ୍ତି । ଗୁଜିଦରଡା ପଞ୍ଚାୟତରେ ସିଏଫ୍ସି ଓ ଏସଏଫ୍ସି ସମେତ ବିଭିନ୍ନ ଫଣ୍ଡରେ ନିର୍ମାଣ ହୋଇଥିବା ୧୦ ପ୍ରକଳ୍ପର ରାସ୍ତା କାର୍ଯ୍ୟ ତତ୍କାଳୀନ ସରପଞ୍ଚ ସମୟରେ ହୋଇଥିଲା । ଏହି ପ୍ରକଳ୍ପ ଗୁଡିକ ମଧ୍ୟରୁ ଆଜି ୭ଟି ରାସ୍ତାର ତଦନ୍ତ କରାଯାଇଥିଲା । ତଦନ୍ତ ବେଳେ ରାସ୍ତାଗୁଡିକ ନିର୍ମାଣ ହୋଇଥିବା ବାବଦରେ ଟିମ୍ ଅନୁସନ୍ଧାନ କରିଛି । ବାକି ୩ଟି ରାସ୍ତା ବାବଦରେ ପୁଣି ଆସନ୍ତାକାଲି ତଦନ୍ତ ହେବ ବୋଲି ଜଣାପଡିଛି । ତଦନ୍ତ ପରେ ଯଦି ଅନିୟମିତତା ହୋଇଥାଏ, ତାହେଲେ ମାମଲା ଦାଏର ହେବ ବୋଲି ବିଭାଗୀୟ ଅଧିକାରୀ ପ୍ରକାଶ କରିଛନ୍ତି । ଅପରପକ୍ଷେ ଅଭିଯୋଗକାରୀ ତାଙ୍କ ଅଭିଯୋଗରେ ଦର୍ଶାଇଛନ୍ତି ଯେ କିଛି ରାସ୍ତା କାର୍ଯ୍ୟ ଆଦୌ ହୋଇନି, କାମ ନହୋଇ ବିଲ୍ ହେଇଛି । ସେହିଭଳି ଯେଉଁ କିଛି ରାସ୍ତାରେ କାର୍ଯ୍ୟ ହୋଇଛି, ତାହା ଅତି ନିମ୍ନମାନର । ଘଟଣା ବାବଦରେ ଗୁଜିଦରଡର ସରପଞ୍ଚ ଇଂ ମହମ୍ମଦ ଫରହତ ଆଲମ କହିଛନ୍ତି ଅଯଥାରେ ମୋ ପଂଚାୟତକୁ ବଦନାମ କରାଯାଉଛି । ପୂର୍ବତନ ସରପଞ୍ଚ ସମୟରେ ଅନେକ ବିକାଶ କାର୍ଯ୍ୟ କରାଯାଇଛି । ସେହି କାର୍ଯ୍ୟ ସବୁ ଦେଖି ବିରୋଧୀୟ ଅସହ୍ୟ ହୋଇ ଏଭଳି ମିଥ୍ୟା ଅଭିଯୋଗ ଆଣିଛନ୍ତି । ପଂଚାୟତରେ କୌଣସି ମିଥ୍ୟା ବିଲ୍ ହୋଇନାହିଁ । ତଥାପି ଆମେ ତଦନ୍ତକୁ ସ୍ୱାଗତ କରୁଛୁ । ଭିଜିଲାନ୍ସ ଟିମ୍ ଆସି ଯେଉଁ ଫାଇଲ୍ ମାଗିଥିଲେ, ତାହା ମୁଁ ପୂର୍ବରୁ ହସ୍ତାନ୍ତର କରିଥିଲି । ଏବେ ଆସି ରାସ୍ତା ତାଡି ନଷ୍ଟ କରୁଛନ୍ତି । ସରପଞ୍ଚ ଦୃଷ୍ଟିରୁ ମୋ ପଂଚାୟତକୁ ପ୍ରବେଶ ବାବଦରେ ମୋର ଜାଣିବା ଉଚିତ୍ ବୋଲି ଇଂ ଆଲାମ ପ୍ରକାଶ କରିଛନ୍ତି ।
