ଭଦ୍ରକ, ୨ା୯ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକ ଜିଲା ତିହିଡି ଅଂଚଳରୁ ପ୍ରତିଦିନ ଟ୍ରେନରୁ କୋଇଲା ଚୋରି ହେଉଥିବା ଅଭିଯୋଗ ହୋଇଛି । ଧାମରା ରେଳପଥକୁ ଯାଇଥିବା ଟ୍ରେନରୁ ଦୈନିକ କୋଇଲା ଚୋରି ହେଉଛି । ବିଭିନ୍ନ ସମୟରେ ପୁଲିସ ଚଢଉ କରୁଥିବା ବେଳେ ଚୋରା କୋଇଲା ମାଫିଆ ପୁଲିସକୁ ଚକମା ଦେଖାଇ କୋଇଲା ଚୋରି କରିବାରେ ସକ୍ଷମ ହେଉଛନ୍ତି । ଆଜି ଧାମନଗର ବ୍ଲକ ଧୁଷୁରୀ ପୁଲିସ ଏକ କୋଇଲା ବୋଝେଇ ପିକଅଫ ଭ୍ୟାନକୁ ଜବତ କରିବା ସହିତ ଦୁଇ ଅଭିଯୁକ୍ତକୁ ଗିରଫ କରିଛି । ଉକ୍ତ ଚୋରା କୋଇଲା ବୋଝେଇ ପିକଅଫଟି ତିହିଡି ଅଂଚଳରୁ ୬୦ ବସ୍ତା ଧରି ନଦୀଗାଁକୁ ଆସୁଥିବା ବେଳେ ଗତକାଲି ରାତିରେ ଧୁଷୁରୀ ଥାନା ଏଏସଆଇ ଧ୍ରୁତରାଷ୍ଟ ମଲିକ ପେଟ୍ରୋଲିଂ କରିବା ସମୟରେ ରେବ ନଦୀ ପୋଲ ନିକଟରୁ ଉକ୍ତ ଗାଡିକୁ ଅଟକାଇ ଥିଲେ । ପରେ ଏହି ଗାଡିରେ ଚୋରା କୋଇଲା ଥିବା ଦେଖି ଗାଡିକୁ ଜବତ କରିବା ସହିତ ପିକଅଫ ଭ୍ୟାନ ମାଲିକ ତଥା ଡ୍ରାଇଭର ନିର୍ମଳ ମଲ୍ଲିକ ଓ ହେଲପର ଅଭୟ ମଲିକ ଉଭୟଙ୍କ ଘର ଭଦ୍ରକ ଗ୍ରାମାଞ୍ଚଳ ଥାନା ବାଲିବରୀ ଅଂଚଳକୁ ଗିରଫ କରିଛି । ତେବେ ପୁଲିସଠାରୁ ମିଳିଥିବା ସୂଚନା ଅନୁଯାୟୀ ଉକ୍ତ ଚୋରା କୋଇଲା ତିହିଡି ବ୍ଲକ ହାଟୁଆରି ଗ୍ରାମର ଜନୈକ ବ୍ୟକ୍ତିଙ୍କ ନିକଟରୁ ବିଭିନ୍ନ ଅଂଚଳକୁ ପରିବହନ ହେଉଛି । ପୁଲିସ ଥାନାରେ କେଶ ନଂ-୧୬୪/୨୦ରେ ଏକ ମାମଲା ରୁଜୁ କରି ସଂପୃକ୍ତ ୨ ଅଭିଯୁକ୍ତକୁ ଆଜି କୋର୍ଟ ଚାଲାଣ କରିଛି ।
