ନୂଆଦିଲ୍ଲୀ ୧୨-୧୨ (ଓଡ଼ିଆ ପୁଅ) ଆଜି ସୁପ୍ରିମକୋର୍ଟରେ ପରିବାର ନିୟନ୍ତ୍ରଣ ଯୋଜନା ସମ୍ବନ୍ଧିତ ଏକ ଜନସ୍ୱାର୍ଥ ମାମଲା (ପିଆଇଏଲ)ରେ କେନ୍ଦ୍ର ସରକାର ନିଜର ଆଫିଡେଭିଟ ଦାଖଲ କରିଛନ୍ତି। ଜନସଂଖ୍ୟା ନିୟନ୍ତ୍ରଣ ଉପରେ କେନ୍ଦ୍ର ସରକାର କହିଛନ୍ତି ଯେ, ବାଧ୍ୟତାମୂଳକ ଭାବେ ପରିବାର ନିୟନ୍ତ୍ରଣ ଯୋଜନା ପାଇଁ କାହାକୁ ବାଧ୍ୟ କରାଯାଇପାରିବ ନାହିଁ। ବାଧ୍ୟତାମୂଳକ ଭାବେ ଟୁ ଚାଇଲ୍ଡ ନିୟମ ଅର୍ଥାତ୍ କେବଳ ଦୁଇଟି ସନ୍ତାନ ଜନ୍ମ କରିବାର ନିୟମକୁ ନେଇ କେନ୍ଦ୍ର ସରକାର ଆଜି ସୁପ୍ରିମକୋର୍ଟରେ ଏକ ଆଫିଡେଭିଟ୍ ଦାଖଲ କରିଛନ୍ତି। କେନ୍ଦ୍ର ସରକାର ତାଙ୍କର ଆଫିଡେଭିଟରେ କହିଛନ୍ତି ଯେ, ଆନ୍ତର୍ଜାତୀୟ ସ୍ତରରେ ସନ୍ତାନ ପ୍ରସବକୁ ନେଇ ବାଧ୍ୟତାମୂଳକ ଆଇନ ପ୍ରଣୟନ କରିଥିବା ଦେଶ କ୍ଷତିଗ୍ରସ୍ତ ହୋଇଛନ୍ତି। ଏହା ଦ୍ୱାରା ପୁରୁଷ ଏବଂ ମହିଳା ଜନସଂଖ୍ୟାକୁ ସନ୍ତୁଳନ କରିବା କଷ୍ଟକର ହୋଇଛି।
ବଢ଼ୁଥିବା ଜନସଂଖ୍ୟାକୁ ନେଇ ଚିନ୍ତା ପ୍ରକଟ କରି ସୁପ୍ରିମକୋର୍ଟରେ ଏକ ପିଟିସନ ଦାଖଲ କରାଯାଇଥିଲା। ଦେଶର ପ୍ରତ୍ୟେକ ଦମ୍ପତିଙ୍କୁ କେବଳ ଦୁଇଟି ସନ୍ତାନ ପାଇଁ ଅନୁମତି ଦିଆଯାଉ ବୋଲି ଏହି ଆବେଦନରେ ଦାବି କରାଯାଇଥିଲା। ଏହା ଦ୍ୱାରା ଦେଶର ଜନସଂଖ୍ୟା ନିୟନ୍ତ୍ରଣ କରାଯାଇପାରିବ। କିନ୍ତୁ କେନ୍ଦ୍ର ସରକାର ଏହି ପରାମର୍ଶକୁ ବିରୋଧ କରିଛନ୍ତି।
କେନ୍ଦ୍ର ସରକାର ଏହି ଆଫିଡେଭିଟ୍ରେ କହିଛନ୍ତି ଯେ, ଗତ ଦୁଇଟି ଜନଗଣନାର ତଥ୍ୟ ଦର୍ଶାଉଛି ଯେ ଲୋକମାନେ ନିଜେ ଦୁଇଟି ସନ୍ତାନର ପରିବାର ପାଇବାକୁ ଚାହୁଁଛନ୍ତି। କେନ୍ଦ୍ର ସରକାର କହିଛନ୍ତି ଯେ ଭାରତରେ ପରିବାର ଯୋଜନା ପାଇଁ ସେମାନଙ୍କର ପରିସ୍ଥିତି ଏବଂ ଆବଶ୍ୟକତାକୁ ନିୟନ୍ତ୍ରଣ କରିବା ପାଇଁ ଲୋକଙ୍କୁ ସ୍ୱାଧୀନତା ଦିଆଯାଇଛି। ଏହା କାହାକୁ ଜବରଦସ୍ତ ପ୍ରୟୋଗ କରାଯାଇପାରିବ ନାହିଁ।
