କଳାହାଣ୍ଡି ୧୮-୧୦ (ଓଡିଆ ପୁଅ/ଦୁଷ୍ମନ୍ତ ପଣ୍ଡା) କଳାହାଣ୍ଡି ଜିଲ୍ଲାରେ କୃଷିଯନ୍ତ୍ରପାତି ଯୋଗାଣ କରାଯାଇ ସରକାରୀ ସବସିଡି ବାଟ ମାରଣା ହୋଇଥିବା ଅଭିଯୋଗ ହୋଇଥିଲା। ପ୍ରାୟ ୨୩ ରୁ ୨୬ ଲକ୍ଷ ଟଙ୍କା ମୂଲ୍ୟର କମ୍ବାଇନ ହାରଭେଷ୍ଟର ପାଇଁ ହିତାଧିକାରୀଙ୍କୁ ସରକାରଙ୍କ ପକ୍ଷରୁ ୬ ଲକ୍ଷ ଟଙ୍କା ସବସିଡି ଯୋଗାଇ ଦିଆଯାଇଥାଏ। ଏହାର ସୁଯୋଗ ନେଇ ଅସାଧୁ ଡିଲର ଦଲାଲ ମାଧ୍ୟମରେ ଗରିବ, ନୀରିହ, ତଥା ଅନୁସୂଚିତ ଜାତି ଓ ଜନଜାତି (ଏସ-ସି/ଏସ-ଟି ) ସଂପ୍ରଦାୟର ବ୍ୟକ୍ତିଙ୍କୁ ଅଳ୍ପ କିଛି ଲାଲସା ଦେଖାଇ ପ୍ରତ୍ୟେକଙ୍କ ଠାରୁ ୬ ଲକ୍ଷ ଟଙ୍କାର ସବସିଡି ବାଟ ମାରଣା କରାଯାଇଥିବା ଅଭିଯୋଗ ହୋଇଥିଲା।
ଏସଂପର୍କରେ ବିଭିନ୍ନ ଗଣମାଧ୍ୟମରେ ପ୍ରକାଶିତ ହେବାପରେ କୃଷିବିଭାଗ ତରଫରୁ ଘଟଣାର ତଦନ୍ତ ନିର୍ଦ୍ଦେଶ ଦିଆଯାଇଥିବା ଜଣାପଡିଛି। ଫଳତଃ ଅସାଧୁ ଡିଲର ମାନଙ୍କ ଦ୍ୱାରା ଏହି ତଦନ୍ତକୁ ଚପାଇ ଦେବାକୁ ଉଦ୍ୟମ କରାଯାଉଥିବା ଜଣାପଡିଛି। ଡିଲର ମାନଙ୍କ ପକ୍ଷରୁ ତଦନ୍ତ ସହିତ ସଂଶ୍ଳିଷ୍ଟ ମାନଙ୍କୁ ବିଭିନ୍ନ ପ୍ରକାର ଚାପ ପକାଇବାର ଉଦ୍ୟମ କରୁଥିବା ମଧ୍ୟ କୁହାଯାଉଛି। ଜିଲ୍ଲା କୃଷି ବିଭାଗ ଦପ୍ତର ମାନଙ୍କରେ ଡିଲର ମାନଙ୍କ ସପକ୍ଷରେ ଲବି ଆରମ୍ଭ କରାଯାଇ ଗଣମାଧ୍ୟମ ପ୍ରତିନିଧିମାନଙ୍କ ଉପରେ ମଧ୍ୟ ବିଭିନ୍ନ ପ୍ରକାର ଚାପ ପକାଇବାର ଯୋଜନା କରାଯାଉଥିବା ଆଲୋଚନା ହେଉଛି। ଯାହାଫଳରେ ମାତ୍ର ଅଳ୍ପ କିଛି ପ୍ରଲୋଭନରେ ପଡି ସରକାରୀ ସବସିଡି ୬ଲକ୍ଷ ଟଙ୍କାକୁ ଅନ୍ୟହାତରେ ଟେକିଦେଇଥିବା ନୀରିହ ଗରିବ ତଥା ଅନୁସୂଚିତ ଜାତି ଓ ଜନଜାତି (ଏସ-ସି/ଏସ-ଟି ) ସଂପ୍ରଦାୟର ବ୍ୟକ୍ତି ର ହିଁ କ୍ଷତିହେବ ଏଥିରେ କୌଣସି ଦ୍ୱିମତ ହିଁ ନାହିଁ ବୋଲି ବୁଦ୍ଧିଜୀବି ମହଲରେ ଆଲୋଚନା ହେଉଛି। ସରକାର ସେଭଲି ବ୍ୟକ୍ତି ବିଶେଷଙ୍କୁ ସବସିଡି ଯୋଗାଇ ଦେବାର କୌଣସି ମୂଲ୍ୟ ହିଁ ରହୁ ନାହିଁ ବୋଲି ମଧ୍ୟ ଆଲୋଚନା ହେଉଛି।
ଅନ୍ୟପକ୍ଷରେ କ୍କ୍ାସ ସୋରୁମରେ ମେକାନିକ କାମ କରୁଥିବା ଧନଂଜୟ ମାଝୀ, ବିଜୁପକ୍କାଘର ପାଇଥିବା ଈଶ୍ୱର ଭୋଇ ଏବଂ ବେଦାନ୍ତ ମାଝି, ଉପେନ୍ଦ୍ର ମାଝୀ, ବିଜୟ ମାଝୀ, ପବିତ୍ର ମାଝି ଭଲି ସରଳ ନୀରିହ ତଥା ଅନୁସୂଚିତ ଜାତି ଓ ଜନଜାତି (ଏସ-ସି/ଏସ-ଟି ) ସଂପ୍ରଦାୟର ବ୍ୟକ୍ତିଙ୍କ ଖାତାରେ ସରକାରୀ ସବସିଡି ୬ ଲକ୍ଷ ଦିଆଯାଇଥିଲେହେଁ ସେମାନେ ଶୋଷିତ ହୋଇଥିବା କୁହାଯାଉଥିବା ବେଳେ ଏସଂପର୍କରେ ଠୋସ ପଦକ୍ଷେପ ନିଆନଗଲେ ଆଗାମୀ ଦିନରେ ଏଭଲି ଶୋଷଣ ବୃଦ୍ଧିପାଇବାର ସମ୍ଭାବନାକୁ ଏଡାଇଦିଆଯାଇନପାରେ। କୋକସରା ବ୍ଲକର କାଶୀବାହାଲ ଗ୍ରାମରେ ପୂର୍ଣ୍ଣଚନ୍ଦ୍ର ସାହୁ ନାମକ କୌଣସି ଚାଷୀ ରହୁନଥିବା ବେଳେ ସେହି ଠିକଣା ଓ ନାମରେ ୨୩ ଲକ୍ଷ୬୦ହଜାର ଟଙ୍କାର କର୍ତାର ହାରଭେଷ୍ଟର ଦିଆଯାଇଥିବା ଦର୍ଶାଇ ୬ଲକ୍ଷ ଟଙ୍କା ସବସିଡି ଉଠାଣ କରାଯାଇଥିବା ସରକାରୀ ଦସ୍ତାବିଜରୁ ଜଣାପଡିଛି। ସେହିପରି ନେତ୍ରମୋହନ ମାଝୀ, ଅର୍ଜୁନ ମାଝୀ, ଟୋପିନ୍ଦ୍ର ସୁନାନୀ ଭଲି ନୀରିହ ବ୍ୟକ୍ତି ମାନଙ୍କୁ ସରକାରୀ ସହାୟତା ମିଳିବା ପ୍ରଲୋଭନ ଦେଖାଇ ହାରଭେଷ୍ଟର ଯୋଗାଇ ନଦେଇ ସେମାନଙ୍କ ସବସିଡି ଟଙ୍କା ଉଠାଣ କରାଇନେଇଥିବା ବେଳେ ସେମାନଙ୍କୁ ୬ଲକ୍ଷ ଟଙ୍କା ସରକାର ଦେଇଥିଲେହେଁ ପ୍ରକୃତ ହିତାଧିକାରୀ ସେହି ସୁବିଧାରୁ ବଂଚିତ ହୋଇଯାଇଥିବା ଲିଖିତ ଅଭିଯୋଗ ହୋଇଥିବା ଜଣାପଡିଛି। ମାତ୍ର ୧୧ ଡିସମିଲ ଘରଡିହ ଥିବା ଜନଜାତି ବ୍ୟକ୍ତିଙ୍କ ନାମରେ ୨୪ଲକ୍ଷ ୬୦ହଜାର ଟଙ୍କାର ଋଣରେ ହାରଭେଷ୍ଟର ଯୋଗାଣ କରାଯାଇ ୬ଲକ୍ଷ ଟଙ୍କା ସବସିଡି ଦିଆଯାଇ ବାଟମାରଣା ହୋଇଥିବା କୁହାଯାଉଛି।
କୃଷିବିଭାଗ ପକ୍ଷରୁ ହିତାଧିକାରୀ ପାଖରେ ହାରଭେଷ୍ଟର ଅଛି କି ନାହିଁ ସେବିଷୟରେ ତଦନ୍ତ ଚାଲିଥିବା ବିଭାଗ ପକ୍ଷରୁ କୁହାଯାଉଥିବା ବେଳେ କିପରି ଭାବରେ କେଉଁ ବେଙ୍କ ଦ୍ୱାରା ଲକ୍ଷ ଲକ୍ଷ ଟଙ୍କା ଋଣ ହେଲା, ସବସିଡି ଟଙ୍କା ପାଶବୁକରେ ପଡିଲା ପରେ କାହା ପାଖକୁ ଟ୍ରାନସଫର ହେଲା, ହିତାଧିକାରୀ କଣ ପାଇଲା, ବର୍ତମାନ ହାରଭେଷ୍ଟର କାହା ପାଖରେ ଅଛି, ଯଦି ଲିଜ ଦିଆଯାଇଛି ବୋଲି କୁହାଯାଉଛି ତେବେ କିପରି ଭାବେ ଲିଜ ଦିଆଯାଇଛି, ହିତାଧିକାରୀ କେତେ ଟଙ୍କା ପାଉଛି ଆଦି ବିଭିନ୍ନ ବିଷୟରେ ତଦନ୍ତ କରାଗଲେ ବହୁ ଗୋପନୀୟ ତଥ୍ୟ ପଦାକୁ ଆସିପାରିବ ବୋଲି ବୁଦ୍ଧିଜୀବି ମହଲରେ ଦାବି ହେଉଛି। ଏସଂପର୍କରେ ଉଚିତ ପଦକ୍ଷେପ ନିଆନଗଲେ ସରକାରୀ ସବସିଡି କେବଳ ଦଲାଲ ଓ ଡିଲରଙ୍କ ଦ୍ୱାରା ବାଟମାରଣା ହିଁ ସାର ହେବ ଏବଂ ସରକାରଙ୍କ କୃଷକ ପ୍ରୋତ୍ସାହନ ଯୋଜନା ସଫଳ ହୋଇପାରିବ ନାହିଁ ବୋଲି ଚାଷୀମହଲରେ ମତପ୍ରକାଶ ପାଇବାରେ ଲାଗିଛି।
