ଭଦ୍ରକ, ୧୭ା୭ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଆଜି ଥିଲା ଶ୍ରାବଣମାସର ପ୍ରଥମ ସୋମବାର । ମହାଦେବଙ୍କ ଉପରେ ଜଳଲାଗି କରିବାକୁ ଭଦ୍ରକର ପ୍ରସିଦ୍ଧ ଶୈବପୀଠ ବାବା ଆଖଣ୍ଡଳମଣିଙ୍କ ଉପରେ ଜଳଲାଗି କରିବାକୁ ହଜାର ହଜାର ବୋଲବମ୍ ଭକ୍ତଙ୍କ ଭିଡ ଲାଗିଥିଲା । ରବିବାର ରାତି ଠାରୁ ଭକ୍ତମାନେ ବ୍ୟାରିକେଡ୍ରେ ଲାଇନ୍ ଦେଇ ଆସିଥିଲେ । ମାତ୍ର ପୁଲିସ୍ ପ୍ରଶାସନର କାର୍ଯ୍ୟରେ ଢିଲା ଯୋଗୁଁ ଭକ୍ତ ଭକ୍ତ ମଧ୍ୟରେ ଠେଲାପେଲା ଲାଗି ବ୍ୟାରିକେଡ୍ ଭାଙ୍ଗିଥିଲା । ଏପରିକି ପୁଲିସ୍ ସେଠାରେ ପହଞ୍ôଚ ଭକ୍ତଙ୍କୁ ମାଡ ମାରିଥିବାର ଅଭିଯୋଗ ହୋଇଛି । ଅନୁରୂପ ସାଧାରଣ ଭକ୍ତମାନଙ୍କ ଗାଡିକୁ ପୁଲିସ୍ ପୀଠରୁ ୩ କିମି ଦୂରରୁ ଅଟକାଇଥିବାରୁ ଭକ୍ତମାନେ ଅସନ୍ତୋଷ ପ୍ରକାଶ କରିଛନ୍ତି । ତେବେ ଆଜି ପବିତ୍ର ଶ୍ରାବଣମାସ ସୋମବାରରେ ଆରଡିପୀଠର ଅଧିଶ୍ୱର ବାବା ଆଖଣ୍ଡଳମଣିଙ୍କୁ ଜଳାଭିଷେକ କରିବା ପାଇଁ ରାଜ୍ୟ ଓ ରାଜ୍ୟ ବାହାରୁ ପ୍ରାୟ ୫୦ ହଜାର କାଉଡିଆଙ୍କ ଭିଡ ପରିଲକ୍ଷିତ ହୋଇଛି । ଦେହରେ ଗେରୁଆ ବସ୍ତ୍ର, ତୁଣ୍ଡରେ ଶିବ ନାମ ଏହି ପୀଠର ସ୍ଥଳ ଓ ଜଳପଥରେ ଏକ ଆଧ୍ୟାତ୍ମିକ ପରିବେଶ ସୃଷ୍ଟି କରିଥିଲା । ଏପରିକି ବୋଲ ବମ୍ ହର ହର ବମ୍ ଧ୍ୱନିରେ ପ୍ରକମ୍ପିତ ହୋଇଉଠୁଥିଲା ସମଗ୍ର ଆରଡି ପୀଠ । ପୂର୍ବ ପ୍ରସ୍ତୁତି ଅନୁଯାୟୀ କାଉଡିଆଙ୍କ ସୁରକ୍ଷା ବ୍ୟବସ୍ଥା ସଠିକ୍ ଭାବେ ହୋଇନଥିବାରୁ ଜଳଲାଗି ଆରମ୍ଭରୁ ଶେଷଯାଏ ଦେଖାଦେଇଥିଲା ବହୁ ଅସୁବିଧା ଓ ଉତ୍ତେଜନା । ଏଥିସହ କାଉଡିଆଡଙ୍କ ଭିଡ ଏପରି ବଢିଥିଲା ଯେ କିଏ ଆଗ ଓ କିଏ ପଛରେ ଜଳଲାଗି କରିବ, ସେଥିପାଇଁ ଆରମ୍ଭ ହୋଇଯାଇଥିଲା ଠେଲାପେଲା ।
ଫଳରେ ଭାଙ୍ଗିପଡିଥିଲା ବ୍ୟାରିକେଡ୍ । ଅନୁରୂପ କାଉଡିଆଙ୍କ ନଦୀ ପାର୍ ପାଇଁ ଘାଟରେ ଅଧିକ ସଂଖ୍ୟକ ଡଙ୍ଗା ନଥିବାରୁ ସନ୍ଧ୍ୟା ପୂର୍ବରୁ ନଦୀ ପାର୍ ହୋଇପାରିଲେ ନାହିଁ ହଜାର ହଜାର କାଉଡିଆ । ଫଳରେ ରାତିସାରା ସେମାନେ ସମୟ କାଟିଥିଲେ ନଦୀକୂଳରେ । ପୀଠରେ ରବିବାର ସନ୍ଧ୍ୟାରୁ କାଉଡିଆଙ୍କ ଭିଡ ଏପରି ହୋଇଥିଲା ଯେ ଦୁଇଜଣ କାଉଡିଆ ବିଦ୍ୟୁତ୍ ଆଘାତରେ ଗୁରୁତର ହୋଇପଡିବାରୁ ଉପସ୍ଥିତ ଅନ୍ୟ କାଉଡିଆମାନେ ସେମାନଙ୍କୁ ଉଦ୍ଧାର କରି ଆରଡି ସ୍ୱାସ୍ଥ୍ୟକେନ୍ଦ୍ରକୁ ନେଇଥିଲେ । ସେଠାରେ ପ୍ରାଥମିକ ଚିକିତ୍ସା କରାଯାଇ ଭଦ୍ରକ ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା । ଏତଦ୍ବ୍ୟତୀତ ଶିବଗଙ୍ଗା ପୁଷ୍କରିଣୀରେ ଗାଧୋଉଥିବାବେଳେ ଜଣେ କାଉଡିଆ ଭାସିଯାଇଥିଲେ । ତାଙ୍କୁ ଉଦ୍ଧାର କରାଯାଇ ମନ୍ଦିର ଆମ୍ବୁଲାନ୍ସ ଯୋଗେ ଆରଡି ମେଡିକାଲରେ ଭର୍ତ୍ତି କରାଯାଇଥିଲା । ପରେ ସ୍ୱାସ୍ଥ୍ୟବସ୍ଥାର ଉନ୍ନତି ଘଟିବାରୁ ତାଙ୍କୁ ଛାଡିଦିଆଯାଇଥିଲା । ଅନ୍ୟପଟେ କାଉଡିଆଙ୍କ ଭିଡକୁ ଦୃଷ୍ଟିରେ ରଖି ରବିବାର ଅପରାହ୍ନରୁ ମଣିବାବାଙ୍କ ଉପରେ ଜଳଲାଗି ଆରମ୍ଭ ହୋଇ ସୋମବାର ରାତି ୮ଟା ପର୍ଯ୍ୟନ୍ତ ତାହା ଚାଲିଥିଲା । କାଉଡିଆଙ୍କ ଭିଡ ଅସମ୍ଭାଳ ହେବାରୁ ସ୍ଥାନୀୟ ସେବାୟତଙ୍କ ସହ ସତ୍ୟସାଇ ସେବା ସଂଗଠନ, ବାବାମଣି ଫାଉଣ୍ଡେସନର କର୍ମକର୍ତ୍ତାଙ୍କ ପକ୍ଷରୁ ଜଳଲାଗି ସମୟରେ ଧାଡି ନିୟନ୍ତ୍ରଣ କରିବା ସହ ସଫେଇ କାର୍ଯ୍ୟ କରାଯାଇଥିଲା ।
