ଭଦ୍ରକ, ୬ା୧୧ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଏହି ଜିଲାର ଭଣ୍ଡାରିପୋଖରୀ ଥାନା ଅନ୍ତର୍ଗତ ନପଙ୍ଗ ଗ୍ରାମର ସିପୁନ ଦାସ(୩୧) ପରିବାର ଲୋକଙ୍କ ସହ ମିଶି ପତ୍ନୀ ତପସ୍ୱିନୀ ଦାସ(୨୩)କୁ ରବିବାର ରାତ୍ରରେ ହତ୍ୟା କରିଥିବା ଅଭିଯୋଗ ହୋଇଛି । ମୃତ ତପସ୍ୱିନୀର ଶବ ଗ୍ରାମର ଚଣ୍ଡିପଡିଆ ରାସ୍ତା ପାଶ୍ୱର୍ରେ ପଡିଥିବାବେଳେ ସୋମବାର ସକାଳେ ଫୁଲତୋଳାଳୀ ଶବ ଦେଖିବାରୁ ଘଟଣା ପ୍ରଚାରିତ ହୋଇଥିଲା । ଖବର ପାଇ ପୁଲିସ ଘଟଣାସ୍ଥଳକୁ ଆସି ତଦନ୍ତ ଆରମ୍ଭ କରିଛି । ଡ୍ରେସପିନ୍ଧା ମୃତ ତପସ୍ୱିନୀ ଶରୀରର ବିଭିନ୍ନ ସ୍ଥାନରେ କ୍ଷତଚିହ୍ନ ସ୍ପଷ୍ଟଭାବେ ରହିଥିବାବେଳେ ଶବ ନିକଟରେ ଏକ ଗାମୁଛା ପଡିଥିଲା । ଅଧିକ ତଦନ୍ତ ପାଇଁ ପୁଲିସ ବୈଜ୍ଞାନିକ ଅନୁସନ୍ଧାନକାରୀ ଦଳ ସହ ସନ୍ଧାନୀ କୁକୁର ଆସି ଘଟଣାସ୍ଥଳରେ ପହଞ୍ôଚଥିଲେ । ମାଜିଷ୍ଟ୍ରେଟ ତଥା ତହସିଲଦାର ସରୋଜକାନ୍ତ ନାୟକଙ୍କ ଉପସ୍ଥିତିରେ ଓ ଥାନାଧିକାରୀ ଅଜୟ ସୁଦର୍ଶନ ବାଗେଙ୍କ ନେତୃତ୍ୱରେ ପୁଲିସ ଟିମ ତଦନ୍ତ କରିବା ମଧ୍ୟରେ ପୁଲିସ କୁକୁର ଗାମୁଛାକୁ ଶୁଙ୍ଘି ୨ ଶହ ମିଟର ଦୂରରେ ଥିବା ହତ୍ୟାକାରୀ ଘର ନିକଟକୁ ଯାଇଥିଲା । ଠିକ୍ ସେତିକିବେଳେ ଖସି ପଳାଇଯାଉଥିବା ପତ୍ନୀହନ୍ତା ସ୍ୱାମୀକୁ ପୁଲିସ ମୋବାଇଲ ଟ୍ରାକିଂ ଜରିଆରେ ରଣଜିତ-ପର୍ବତୀ ରାସ୍ତାରୁ କାବୁ କରି ହେପାଜତକୁ ନେଇଛି । ମୃତ ତପସ୍ୱିନୀର ପିତା ପ୍ରଫୁଲ୍ଲ ଦାସ ପୁଲିସ ନିକଟରେ ସ୍ୱାମୀ, ଶ୍ୱଶୁର, ଶାଶୁ, ନଣନ୍ଦ, ଭଜଣା, ସଉତୁଣୀ ମିଳିତ ଭାବେ ଏହି ହତ୍ୟାକାଣ୍ଡ କରିଛନ୍ତି ବୋଲି ଅଭିଯୋଗ କରିଛନ୍ତି । ଥାନାରେ ୩୫୫/୨୩ନଂ ହତ୍ୟାମାମଲା ଋଜୁ ହୋଇ ବ୍ୟବଚ୍ଛେଦ ପାଇଁ ଶବ ଭଦ୍ରକ ପଠାଯାଇଛି ।
ଅନ୍ୟ ଅଭିଯୁକ୍ତମାନେ ଫେରାର ଅଛନ୍ତି । ବିବରଣୀରୁ ପ୍ରକାଶ ନପଙ୍ଗ ଦାସସାହିର ସିପୁନୁ ଭଣ୍ଡାରିପୋଖରୀ-ମଣିନାଥପୁର ପୁର୍ତ୍ତରାସ୍ତାର ଖୋଳାମୁହଁ ଠାରେ ରହୁଥିବା ପ୍ରଫୁଲ୍ଲ ଦାସଙ୍କ ଝିଅ ତପସ୍ୱିନୀକୁ ବର୍ଷକ ତଳେ ପ୍ରେମ ବିବାହ କରିଥିଲା । ତପସ୍ୱିନୀ ସ୍ୱାମୀ ସହ ଶ୍ୱଶୁର ଘରକୁ ଯାଇ ସିପୁନୁର ପ୍ରଥମ ପତ୍ନୀ ଓ ପୁଅ ଥିବାର ଜାଣିଥିଲା । ସେହିଦିନ ଠାରୁ ସ୍ୱାମୀ ଓ ଶ୍ୱଶୁର ଘର ଲୋକଙ୍କ ସହ ତପସ୍ୱିନୀର ଝଗଡା ଆରମ୍ଭ ହୋଇଥିଲା । ଫଳରେ ସିପୁନୁ ଦ୍ୱିତୀୟ ପତ୍ନୀ ତପସ୍ୱିନୀକୁ ନେଇ ଯାଜପୁର ସହରରେ ଭଡାରେ ରହୁଥିଲା । ସିପୁନୁ ଯାଜପୁର ଭଡାଘରୁ ଲୁଚି ପଳାଇ ଆସିବାରୁ ତପସ୍ୱିନୀ ଯାଜପୁର ସହର ସ୍ୱଧାରଘରେ କିଛି ଦିନ ରହିଥିଲା । ଏଥିପାଇଁ ସିପୁନୁ ଓ ତପସ୍ୱିନୀର ପରିବାର ମଧ୍ୟରେ ଝଗଡା ଲାଗି ରହିଥିଲା । ତେବେ ଉଭୟପକ୍ଷର ଭଦ୍ରଲୋକ ଏକାଧିକବାର ସମାଧାନ ପାଇଁ ଆସି ବିଫଳ ହୋଇଥିଲେ । ଏହି ମାମଲା ମଧ୍ୟ ଥାନାକୁ ଯାଇଥିଲା । ଏହା ପରେ ପୁନର୍ବାର ସିପୁନୁ ତପସ୍ୱିନୀକୁ ନେଇ ଯାଜପୁର ସହରରେ ଭଡାରେ ରହିଥିଲା । ଇତି ମଧ୍ୟରେ ତପସ୍ୱିନୀ ୮ ମାସର ଗର୍ଭବତୀ ଥିବାବେଳେ ଗତ ରବିବାର ଅପରାହ୍ନରେ ସିପୁନୁ ତାକୁ ବାଇକରେ ନେଇ ନପଙ୍ଗ ଗ୍ରାମକୁ ଆସିବା ମଧ୍ୟରେ ସୋମବାର ସକାଳୁ ରାସ୍ତା କଡରୁ ତପସ୍ୱିନୀର ମୃତ ଦେହ ମିଳିବା ଘଟଣା ଏହା ଏକ ସୁପରିକଳ୍ପିତ ହତ୍ୟାକାଣ୍ଡ ବୋଲି ଅନୁମାନ କରାଯାଉଛି ।
