ଭଦ୍ରକ, ୨୭ା୮ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଏହି ଜିଲାର ଧାମନଗର ବ୍ଲକ୍ କୃଷି କାର୍ଯ୍ୟାଳୟ ପରିସରରେ କୃଷି ଓ କୃଷକ ସଶକ୍ତକରଣ ବିଭାଗ ଓଡ଼ିଶା ସରକାରଙ୍କ ଆନୁକୂଲ୍ୟରେ ‘ଡିଜିଟାଲ ଫସଲ ସର୍ବେକ୍ଷଣ’ ଶିବିର ପାଇଁ ବ୍ଲକ୍ କୃଷିବିଭାଗ ପକ୍ଷରୁ ଚଳିତମାସ ୨୧ ତାରିଖ ଚିଠି ନଂ ୪୦୦/୨୪ ରେ ସମସ୍ତ ପଂଚାୟତ ଲୋକ ପ୍ରତିନିଧିଙ୍କୁ ଅଧିକାରୀ ଚିଠି କରିଥିଲେ । ମାତ୍ର ଏହି ବୈଠକକୁ ଧାମନଗର ବିଧାୟକ ତଥା ରାଜ୍ୟ ମନ୍ତ୍ରୀ ମଣ୍ଡଳର ଗୁରୁତ୍ୱପୂର୍ଣ୍ଣ ବିଭାଗ ମନ୍ତ୍ରୀ ସୂର୍ଯ୍ୟବଂଶୀ ସୁରଜଙ୍କୁ ନଜଣାଇ ଏହି ପ୍ରଶିକ୍ଷଣ ଶିବିର ବା ବୈଠକ କରାଯାଉଥିଲା । ଏ ନେଇ ମନ୍ତ୍ରୀଙ୍କ ସମର୍ଥକମାନେ କୃଷି ବିଭାଗ ଅଧିକାରୀଙ୍କୁ ଜଣାଇବା ପରେ ଏହି ବୈଠକ ବାତିଲ କରାଯାଇ ଚଳିତମାସ ୩୦ ତାରିଖକୁ ଘୁଂଚାଇ ଦିଆଯାଇଛି । ତେବେ ସବୁଠାରୁ ବଡକଥା ହେଲା ବ୍ଲକ୍ କୃଷି ଅଧିକାରୀ ଭାସ୍କର ଚନ୍ଦ୍ର ଦାସ ଦୀର୍ଘବର୍ଷ ହେବ ଧାମନଗର ବ୍ଲକ୍ରେ ରହିଥିଲେ ମଧ୍ୟ ସାଧାରଣ ଲୋକ ଓ ଚାଷୀଙ୍କ କଥା ବୁଝୁନାହାଁନ୍ତି । ବର୍ଷେ ହେବ ବାବୁଙ୍କର ବଦଳି ହୋଇଥିଲେ ମଧ୍ୟ ସେ ଗାଦି ମାଡି ବସିଛନ୍ତି । ନିଜ ଇଚ୍ଛାରେ ହିଁ ସବୁ କାମ କରୁଛନ୍ତି । ଗୁରୁବାର ଦିନ କୃଷି ଅଧିକାରୀ ଶ୍ରୀ ଦାସ ପ୍ରଶିକ୍ଷଣ ଶିବିର କରିଥିବାବେଳେ ଅଧିକାଂଶ ଅଧିକାରୀ ଓ ଚାଷୀ ଅନୁପସ୍ଥିତ ଥିଲେ । ପ୍ରକାଶ ଥାଉକି ଡିଜିଟାଲ ଫସଲ ସର୍ବେକ୍ଷଣ ଦ୍ୱାରା ପ୍ରକୃତ ଚାଷୀ ଓ ଜମି ଚିହ୍ନଟ ହେବା, ଜମିର କିସମ ସଂପର୍କରେ ସୂଚନା ମିଳିବା, ବନ୍ୟା କିମ୍ବା ମରୁଡି ହେଲେ ଚାଷର କ୍ଷୟକ୍ଷତିର ହିସାବ ସହ ଇନପୁଟ ସବସିଡି ଦେବାରେ ସହାୟକ ଇତ୍ୟାଦି ସ୍ପଷ୍ଟ ହୋଇପାରିବ । ସାଟେଲାଇଟ୍ ଜରିଆରେ ଜମିର କିସମ ଚିହ୍ନଟ ପ୍ରକ୍ରିୟାର ଡିଜିଟାଲ ସର୍ବେକ୍ଷଣ କରାଯାଇ ଖରିଫ ଧାନଚାଷ ବ୍ୟତୀତ ଜମିରେ ଅନ୍ୟ ଚାଷର ସୂଚନା ମିଳିବା ସଂପର୍କରେ ପ୍ରଶିକ୍ଷଣ ଦିଆଯାଇଥାଏ । ମାତ୍ର କୃଷି ଅଧିକାରୀ ଶ୍ରୀ ଦାସ ସେଥିପ୍ରତି ଦୃଷ୍ଟି ନଦେଇ ସମସ୍ତ ସମସ୍ୟାର ସମାଧାନ କ୍ଷେତ୍ରରେ ନିଜେ ସମ୍ମୁଖୀନ ନହୋଇ ଚାଷୀମାନଙ୍କୁ ଅତିରିକ୍ତ କୃଷି ଅଧିକାରୀଙ୍କୁ ଭେଟିବାକୁ କହୁଛନ୍ତି । ତେବେ ଅତିରିକ୍ତ କୃଷି ଅଧିକାରୀ ଦେବାଶିଷ ତ୍ରିପାଠୀ ବଡ ବାବୁଙ୍କ ଠାରୁ ଆଉ ପାଦେ ଆଗରେ । ତାଙ୍କର ମନମୁଖୀ କାର୍ଯ୍ୟ ଯୋଗୁଁ ଚାଷୀଙ୍କ ସମସ୍ୟା ବଢିଚାଲିଛି । ସୂଚନା ଅନୁଯାୟୀ ଏହି ବ୍ଲକ୍ରେ ମୋଟ ୩୧ଟି ପଂଚାୟତରେ ଖରିଫ ଋତୁରେ ଶସ୍ୟ ଓ ଅଣଶସ୍ୟ ବାବଦ ମୋଟ ୧୭ ହଜାର ୧୩୦ ହେକ୍ଟର ଚାଷ ଲକ୍ଷଧାର୍ଯ୍ୟ କରାଯାଇଥିବାବେଳେ ଏପର୍ଯ୍ୟନ୍ତ ତାହା ପୂରଣ ହୋଇପାରିବା ତ ଦୂରର କଥା ଏବେବି ଶହ ଶହ ଏକର ଚାଷଜମି ରୁଆ ପୋତା ହୋଇନାହିଁ । ତେବେ ବିଭାଗ ପକ୍ଷରୁ ସେଭଳି ସଚେତନତା ଅଭାବରୁ ଚାଷଜମି ପଡିଆ ପଡୁଛି ବୋଲି ଚାଷୀମାନେ ଅଭିଯୋଗ କରୁଛନ୍ତି । ଏ ଦିଗରେ ଜିଲାପାଳ ସ୍ୱତନ୍ତ୍ର ଦୃଷ୍ଟିଦେବା ସହ ବଦଳି ପରେ ବି ଗାଦି ମାଡି ବସିଥିବା କୃଷି ଅଧିକାରୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହୋଇଛି ।
