ନୂଆ ଦିଲ୍ଲୀ ୧୭-୬ (ଓଡ଼ିଆ ପୁଅ) ଅବଶିଷ୍ଟ ବୋର୍ଡ ପରୀକ୍ଷା ବାତିଲ ପ୍ରସଙ୍ଗରେ ବିଚାର କରିବାକୁ ସୁପ୍ରିମକୋର୍ଟ କେନ୍ଦ୍ରୀୟ ମାଧ୍ୟମିକ ଶିକ୍ଷା ବୋର୍ଡ (CBSE) କୁ କହିଛନ୍ତି। ଏହା ସହିତ କୋର୍ଟ କହିଛନ୍ତି ଯେ ବୋର୍ଡ ଆଭ୍ୟନ୍ତରୀଣ ମୂଲ୍ୟାଙ୍କନ ଆଧାରରେ ଛାତ୍ରଛାତ୍ରୀଙ୍କୁ ମାର୍କ ପ୍ରଦାନ କରିବା ବିଷୟରେ ଚିନ୍ତା କରିବା ଉଚିତ୍। ସୁପ୍ରୀମକୋର୍ଟର ତିନିଜଣିଆ ଖଣ୍ଡପୀଠ, ଆସନ୍ତା ମଙ୍ଗଳବାର ସୁଦ୍ଧା ସିବିଏସ୍ଇକୁ ଏହା ଉପରେ ଉତ୍ତର ଦେବାକୁ କହିଛନ୍ତି। ପରିସ୍ଥିତିକୁ ଦୃଷ୍ଟିରେ ରଖି CBSE ଏହାର ନିର୍ଦ୍ଦେଶାବଳୀ ଜାରୀ କରିବ ବୋଲି କହିଛି ସିବିଏସ୍ଇ। ବର୍ତ୍ତମାନ ଏହି ମାମଲା ୨୩ ଜୁନ୍ ରେ ଶୁଣାଣି ହେବ।
ସିବିଏସ୍ଇର ଜଣେ ଛାତ୍ରଙ୍କ ଅଭିଭାବକ ଅମିତ ବାଥୁଲାଙ୍କ ଆବେଦନ ଉପରେ ସୁପ୍ରିମ କୋର୍ଟ ଏହି ଶୁଣାଣି କରିଥିଲେ। ସାମ୍ପ୍ରତିକ ପରିସ୍ଥିତିକୁ ଦୃଷ୍ଟିରେ ରଖି ସିବିଏସ୍ଇ ବୋର୍ଡ ପରୀକ୍ଷା ବାତିଲ କରିବାକୁ ଆବେଦନ କରାଯାଇଥିଲା।
ସୂଚନାଯୋଗ୍ୟଯେ, ସିବିଏସ୍ଇ ବୋର୍ଡର ଅବଶିଷ୍ଟ ପରୀକ୍ଷା ଜୁଲାଇ ୧ ରୁ ଜୁଲାଇ ୧୫ ପର୍ଯ୍ୟନ୍ତ ହେବ ବୋଲି ସିବିଏସ୍ଇ ଡେଟସିଟ୍ ଜାରି କରିଛି। CBSE ବର୍ତ୍ତମାନ ଦ୍ୱାଦଶ ଶ୍ରେଣୀର ୨୯ ଟି ମୁଖ୍ୟ ବିଷୟ ପାଇଁ ପରୀକ୍ଷା କରିବାକୁ ଯାଉଛି। ଅନ୍ୟପକ୍ଷରେ ଦଙ୍ଗା ଯୋଗୁଁ ଉତ୍ତର ପୂର୍ବ ଦିଲ୍ଲୀର ଦଶମ ପରୀକ୍ଷା ବାତିଲ ହୋଇଥିଲା। ସେହି ପରୀକ୍ଷା ମଧ୍ୟ ହେବାର ଅଛି। CBSE ପରୀକ୍ଷା ସମଗ୍ର ଦେଶରେ ୧୫, ୦୦୦ ପରୀକ୍ଷା କେନ୍ଦ୍ରରେ ଅନୁଷ୍ଠିତ ହେବ।
ଏହି ଆବେଦନରେ ଆହୁରି ମଧ୍ୟ କୁହାଯାଇଛି ଯେ ସିବିଏସ୍ଇ ପରୀକ୍ଷା ଜୁଲାଇରେ ଅନୁଷ୍ଠିତ ହେବାର ଅଛି ଏବଂ AIIMS ଅନୁଯାୟୀ କୋଭିଡ -୧୯ ମହାମାରୀ ସେହି ସମୟରେ ଶିଖରରେ ରହିବ। ତେଣୁ ଜୁଲାଇରେ ହେବାକୁ ଥିବା ଅବଶିଷ୍ଟ CBSE ପରୀକ୍ଷା ବାତିଲ କରାଯାଉ ଏବଂ ଆଭ୍ୟନ୍ତରୀଣ ମୂଲ୍ୟାଙ୍କନ ଆଧାରରେ ଛାତ୍ରଛାତ୍ରୀଙ୍କ ଫଳାଫଳ ଘୋଷଣା କରାଯାଉ ବୋଲି ଆବେଦନକାରୀମାନେ ପ୍ରାର୍ଥନା କରିଛନ୍ତି।
ଅପର ପକ୍ଷରେ ପ୍ରି ବୋର୍ଡ ନମ୍ବର ଭିତ୍ତିରେ ଉତ୍ତୀର୍ଣ୍ଣ କରିବା ପାଇଁ ICSE ଛାତ୍ରଛାତ୍ରୀମାନଙ୍କର ମତ ଚାହୁଁଛି।
ଆଇସିଏସ୍ଇ ବୋର୍ଡ ପରୀକ୍ଷାର୍ଥୀଙ୍କୁ ପଚାରିଛି ଯେ ସେମାନେ ଜୁଲାଇ ୨ ରୁ ବୋର୍ଡ ପରୀକ୍ଷାରେ ଉପସ୍ଥିତ ରହିବେ କିମ୍ବା ପ୍ରି-ବୋର୍ଡ କିମ୍ବା ଆଭ୍ୟନ୍ତରୀଣ ମୂଲ୍ୟାଙ୍କନ ଆଧାରରେ ପଦୋନ୍ନତି ଚାହୁଁଛନ୍ତି କି?
ସେମାନଙ୍କୁ ନିର୍ଦ୍ଦିଷ୍ଟ ପ୍ରୋଫର୍ମାରେ ସେମାନଙ୍କର ବିକଳ୍ପ ପୂରଣ କରିବାକୁ ପଡିବ ଏବଂ ଏହାକୁ ୧୮ ଜୁନ୍ ସୁଦ୍ଧା ବିଦ୍ୟାଳୟକୁ ପଠାଇବାକୁ ପଡିବ।
ପିଲାମାନଙ୍କ ହ୍ୱାଚ୍ସଆପ୍ ରେ ମେସେଜ୍ ସହିତ ଏହି ପ୍ରୋଫର୍ମା ପଠାଇଛି ICSE।
ସୂଚନାଯୋଗ୍ୟଯେ, କରୋନା ସଂକ୍ରମଣକୁ ଦୃଷ୍ଟିରେ ରଖି ପରୀକ୍ଷା ନକରିବାକୁ ଅଭିଭାବକମାନନେ ନିବେଦନ କରିଛନ୍ତି। ଏହି ପରିପ୍ରେକ୍ଷୀରେ ହାଇକୋର୍ଟରେ ଜନସ୍ୱାର୍ଥ ମାମଲା ମଧ୍ୟ ଦାଖଲ କରାଯାଇଛି।
ଏହା ଉପରେ ବୋର୍ଡ ଛାତ୍ରମାନଙ୍କୁ ଏହି ବିକଳ୍ପ ଦେଇଛି।
ବର୍ତ୍ତମାନ, ଯଦି ଛାତ୍ରମାନେ ଚାହାଁନ୍ତି, ପରୀକ୍ଷା ନଦେଇ ସେମାନେ ପ୍ରି ବୋର୍ଡ ଆଧାରରେ ପଦୋନ୍ନତି ପାଇପାରିବେ।
