● ସମ୍ବିତ ପାତ୍ରଙ୍କ ଉପସ୍ଥିତିରେ ହୋଇଛି ଆକ୍ରମଣ !
ଭୁବନେଶ୍ୱର: ବିଜେଡି ନେତାଙ୍କ ଗୁଣ୍ଡାଗିରୀ କଥା କହି ବିଜେପି ନେତା ଏଣେ ବିଧାନସଭା ଘେରାଉ କରୁଥିବା ବେଳେ ତେଣେ ଜଣଙ୍କ ପରେ ଜଣେ ବିଜେପି ନେତାଙ୍କ ଗୁଣ୍ଡାଗିରୀ ପଦାରେ ପଡ଼ିବାରେ ଲାଗିଛି। ନିକଟରେ ଘରୁ ବାହାର କରିବା ପାଇଁ ଭୁବନେଶ୍ୱରରେ ଜଣେ ଭଡ଼ାଟିଆଙ୍କୁ ୪୦/୫୦ ଗୁଣ୍ଡାଙ୍କୁ ନେଇ ବିଜେପି ନେତା ସାରଦା ଓରଫ ବୁଲୁ ପ୍ରଧାନ ଏବଂ ବିଜେପି ନେତ୍ରୀ ଉପାସନା ମହାପାତ୍ର ଆକ୍ରମଣ କରିଥିବା ଅଭିଯୋଗ ଆସିଥିଲା ବେଳେ ଏବେ ୨୦୧୯ ନିର୍ବାଚନରେ ବିଜେପି ପାର୍ଥି ହୋଇଥିବା ଜଣେ ନେତା ନିଜ ଦଳର ଆଉ ଜଣେ ନେତାଙ୍କ ଉପରେ ମରଣାନ୍ତକ ଆକ୍ରମଣ କରାଇଥିବା ଅଭିଯୋଗ ଆସିଛି। ବିଜେପି କୃଷକ ମୋର୍ଚ୍ଚା ରାଜ୍ୟ କୋଅପରେଟିଭ୍ ସେଲ୍ ସଂଯୋଜକ ଜିଷ୍ଣୁଜୟ ମତଗଜସିଂହଙ୍କ ଉପରେ ମରଣାନ୍ତକ ଆକ୍ରମଣ କରାଯାଇଥିବା ଅଭିଯୋଗ ହୋଇଛି। ବଡ଼ କଥା ହେଲା ବିଜେପି ରାଷ୍ଟ୍ରୀୟ ପ୍ରବକ୍ତା ଡ. ସମ୍ବିତ ପାତ୍ର ଏବଂ ପୁରୀ ଜିଲ୍ଲା ସତ୍ୟବାଦୀ ନିର୍ବାଚନୀ ମଣ୍ଡଳୀରୁ ୨୦୧୯ରେ ବିଜେପିରୁ ପାର୍ଥି ହୋଇଥିବା ଓମ ପ୍ରକାଶ ମିଶ୍ରଙ୍କ ଉପସ୍ଥିତିରେ ଏହି ଆକ୍ରମଣ ହୋଇଥିବା ଅଭିଯୋଗ ହୋଇଥିବା ବେଳେ ନିଜେ ଓମ ପ୍ରକାଶ ମିଶ୍ର ହିଁ ଏହି ଆକ୍ରମଣ କରାଇଥିବା ଅଭିଯୋଗ ହେଉଛି।
ଦବଙ୍ଗଗିରୀ: ଉମାଙ୍କୁ କହିଥିଲେ, ଏବେ ଓମଙ୍କୁ କ’ଣ କହିବେ ବିଜେପି ନେତ୍ରୀ ମନସ୍ମିତା ଖୁଣ୍ଟିଆ?
ନିକଟରେ ବିଭିନ୍ନ ପ୍ରସଙ୍ଗରେ ପୁରୀ ଜିଲ୍ଲା ସତ୍ୟବାଦୀ ନିର୍ବାଚନୀ ମଣ୍ଡଳୀ ଅନ୍ତର୍ଗତ କଣାସ ବ୍ଲକ୍ ଘେରାଉ କରିଥିଲା ଭାରତୀୟ ଜନତା ପାର୍ଟି। ଓମ ପ୍ରକାଶ ମିଶ୍ରଙ୍କ ନେତୃତ୍ୱ ତଥା ପୁରୀ ଜିଲ୍ଲା ସଭାପତି ଆଶ୍ରିତ ପଟ୍ଟନାୟକ ଉପସ୍ଥିତିରେ ଆୟୋଜିତ ଏହି କାର୍ଯ୍ୟକ୍ରମରେ ଯୋଗଦେଇ ବିଜେପି ନେତ୍ରୀ ମନସ୍ମିତା ଖୁଣ୍ଟିଆ ଏକ ପୁରୁଣା ଭାଇରାଲ୍ ଅଡିଓ କଥାରେ ବିଜେଡି ବିଧାୟକ ଉମା ସାମନ୍ତରାୟଙ୍କ ଦବଙ୍ଗଗିରୀ କଥା କହି ତାଙ୍କୁ ଟାର୍ଗେଟ୍ କରିଥିଲେ। ଆଜି କିନ୍ତୁ ତାଙ୍କ ନିଜ ଦଳ ବିଜେପି ନେତା ଓମ ପ୍ରକାଶଙ୍କ ଦବଙ୍ଗଗିରୀ ପୁଣି ନିଜ ଦଳ ଲୋକଙ୍କ ପ୍ରତି ଦେଖିବାକୁ ମିଳିଲା। ମାହାଙ୍ଗା ଡବଲ ମର୍ଡର ପରେ ପ୍ରତାପ ବିଶ୍ୱାଳଙ୍କ ମୃତ୍ୟୁକୁ ଦୁର୍ଘଟଣା ନୁହେଁ, ହତ୍ୟା ବୋଲି ଅଭିଯୋଗ କରି ବିଜେଡି ନେତା କିପରି ନିଜ ଦଳର ଲୋକଙ୍କୁ ମଧ୍ୟ ହତ୍ୟା କରିପାରନ୍ତି କହି ମନ୍ତ୍ରୀ ପ୍ରତାପ ଜେନାଙ୍କୁ ବିଜେପି ଟାର୍ଗେଟ୍ କରୁଥିବା ବେଳେ ଏବେ ନିଜ ଦଳ ଭିତରେ ବିଜେପି ନେତା ଆଉ ଜଣେ ବିଜେପି ନେତାଙ୍କ ଉପରେ ଆକ୍ରମଣ କରାଇଥିବା ଅଭିଯୋଗ ଓଲଟି ବିଜେପି ପ୍ରତି ଏକ ଖରାପ ଧାରଣା ସୃଷ୍ଟି କରାଉଛି।
-@Dr
