ଭୁବନେଶ୍ୱର ୧୬ ଜୁଲାଇ (ଓଡ଼ିଆ ପୁଅ) ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ ରାଜ୍ୟ ପାଇଁ ୯୫ ପ୍ରତିଶତ ଟିକା ଆବଣ୍ଟନ ଦାବି କରିଛନ୍ତି। ଆଜି ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଏବଂ ଅନ୍ୟ ରାଜ୍ୟ ମୁଖ୍ୟମନ୍ତ୍ରୀଙ୍କ ସହ ଏକ ବୈଠକରେ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ଓଡିଶାରେ ଟୀକାକରଣ ପ୍ରସଙ୍ଗ ଉଠାଇଛନ୍ତି।
ମୁଖ୍ୟମନ୍ତ୍ରୀ କହିଛନ୍ତି ଯେ, ଟୀକାକରଣରେ ଓଡିଶା ବହୁତ ଭଲ ପ୍ରଦର୍ଶନ କରୁଛି ଏବଂ ଆମର ଅପଚୟ ଦେଶରେ ସର୍ବନିମ୍ନ ଅଟେ। ସେ କହିଛନ୍ତି ଯେ, ତଥାପି, ରାଜ୍ୟରେ ଘରୋଇ ଡାକ୍ତରଖାନାଗୁଡ଼ିକର ଉପସ୍ଥିତି କମ୍ ଥିବାରୁ ଟିକାକୁ ୨୫% କୋଟାରୁ ଉଠାଇବା କମ୍ ହୋଇଛି।
ଏହି ପ୍ରସଙ୍ଗରେ କେନ୍ଦ୍ର ସରକାରଙ୍କ ସହ ହୋଇଥିବା ଯୋଗାଯୋଗକୁ ପୁନର୍ବାର ସେ କହିଛନ୍ତି ଯେ ରାଜ୍ୟ ସରକାରଙ୍କୁ ଆବଣ୍ଟନକୁ ୯୫% କୁ ବୃଦ୍ଧି କରିବା ଏବଂ ଘରୋଇ ଡାକ୍ତରଖାନାକୁ ଆବଣ୍ଟନକୁ ୫% କୁ ହ୍ରାସ କରିବାକୁ ଆମେ ଭାରତ ସରକାରଙ୍କୁ ଚିଠି ଲେଖିଛୁ। ଏହା ରାଜ୍ୟରେ ଟୀକାକରଣର ଗତି ବଢ଼ାଇବାରେ ସାହାଯ୍ୟ କରିବ ବୋଲି ମୁଖ୍ୟମନ୍ତ୍ରୀ କହିଛନ୍ତି।
ସମ୍ଭାବିତ ତୃତୀୟ ଲହରରେ ପିଲାମାନଙ୍କ ଉପରେ ଏହାର ପ୍ରଭାବ ଉପରେ ମୁଖ୍ୟମନ୍ତ୍ରୀ ପ୍ରସ୍ତାବ ଦେଇଛନ୍ତିଯେ, ୧୨-୧୮ ବର୍ଷ ପାଇଁ ଟିକାକୁ ପ୍ରାଥମିକତା ଦିଆଯାଇ ଶୀଘ୍ର କାର୍ଯ୍ୟକାରୀ କରାଯାଉ।
