ଭୁବନେଶ୍ୱର: ରାଜ୍ୟ ସରକାରଙ୍କ ୨୧ବର୍ଷ ଶାସନ କାଳରେ ନାରୀ ନିର୍ଯାତନାର ଆଉ ଏକ କଳାଫର୍ଦ୍ଦ ଯୋଡଡ଼ି ହୋଇଛି। ଶିକ୍ଷୟିତ୍ରୀ ମମିତା ମେହେର ହତ୍ୟାକାଣ୍ଡ ଏବଂ ଏହି ହତ୍ୟାକାଣ୍ଡର ମୁଖ୍ୟ ଷଡ଼ଯନ୍ତ୍ରକାରୀ ଭାବେ ରାଜ୍ୟର ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ସମ୍ପୃକ୍ତି ଓଡ଼ିଶାବାସୀଙ୍କ ଜନମାନସକୁ ଆନ୍ଦୋଳିତ କରୁଛି। ମୃତ ମମିତାଙ୍କ ପରିବାରବର୍ଗଙ୍କ ଅଭିଯୋଗ ଅନୁଯାୟୀ, ସନସାଇନ ସ୍କୁଲର ମୁଖ୍ୟ ସଂଚାଳକ ଗୋବିନ୍ଦ ସାହୁଙ୍କ ସହିତ ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଂକର ମିଶ୍ରଙ୍କ ଘନିଷ୍ଠ ସଂପର୍କ ରହିଛି। ରାଜ୍ୟ ମନ୍ତ୍ରୀମଣ୍ଡଳର ବହୁ ବରିଷ୍ଠ ମନ୍ତ୍ରୀ, ବିଧାୟକ ତଥା ଶାସକ ବିଜେଡିର ନେତାମାନେ ବାରମ୍ବାର ସେହି ସ୍କୁଲକୁ ଆସି ବିଭିନ୍ନ ଅନୈତିକ କାର୍ଯ୍ୟକଳାପରେ ସଂପୃକ୍ତ ଥିଲେ। ସ୍ଥାନୀୟ ବିଧାୟକ ହୋଇଥିବା ସତ୍ତ୍ୱେ ମନ୍ତ୍ରୀ ଶ୍ରୀ ମିଶ୍ର କାହିଁକି ସ୍କୁଲର ବିଳାସମୟ କଠୋରୀରେ ରହୁଥିଲେ? ନିଖୋଜ ଘଟଣାରେ ପୋଲିସ ମମିତାର ପରିବାର ସଦସ୍ୟଙ୍କୁ ହତାଦର କରି ଏଫଆଇଆର ରୁଜୁ ନକରି କାହିଁକି ଏବଂ କାହାର ନିର୍ଦ୍ଦେଶରେ ଫେରାଇ ଦେଇଥିଲା? ବେସରକାରୀ ଶିକ୍ଷାନୁଷ୍ଠାନ ହୋଇଥିବା ସତ୍ତ୍ୱେ ଲକ୍ଷ ଲକ୍ଷ ଟଙ୍କାର ସରକାରୀ ଆର୍ଥିକ ଅନୁଦାନ କାହିଁକି ମଂଜୁରୀ କରାଇଥିଲେ ମନ୍ତ୍ରୀ ଶ୍ରୀ ମିଶ୍ର? ଏଭଳି ସମ୍ବେଦନଶୀଳ ଘଟଣାରେ ତାଙ୍କ ଉପରେ ଉଠିଥିବା ପ୍ରଶ୍ନର ଜବାବ୍ ଦେଉନାହାଁନ୍ତି କାହିଁକି ମନ୍ତ୍ରୀ ଶ୍ରୀ ମିଶ୍ର? ଗୃହମନ୍ତ୍ରୀଙ୍କୁ ତଦନ୍ତ ପରିସରଭୁକ୍ତ କରି କାହିଁକି ଗିରଫ କରାଯାଉ ନାହିଁ? ମମିତା ମେହେର୍ ହତ୍ୟାକାଣ୍ଡ ପ୍ରସଙ୍ଗରେ ସମ୍ପୃକ୍ତ ମନ୍ତ୍ରୀ ଶ୍ରୀ ମିଶ୍ରଙ୍କୁ ତୁରନ୍ତ ମନ୍ତ୍ରୀମଣ୍ଡଳରୁ ବହିଷ୍କାର କରାଯାଇ ଗିରଫ କରାଯାଉ ଏହି ଦାବିରେ ଆସନ୍ତା ୨୬ ଓ ୨୭ ଦୁଇଦିନ ଧରି ଯୁବମୋର୍ଚ୍ଚା ତରଫରୁ ରାଜ୍ୟର ସମସ୍ତ ଜିଲ୍ଲା ଏସ୍ପି କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ଧାରଣା ପ୍ରଦର୍ଶନ କରାଯିବ ବୋଲି ବୋଲି ବିଜେପି ଯୁବ ମୋର୍ଚ୍ଚା ରାଜ୍ୟ ସଭାପତି ଇରାଶିଷ ଆଚାର୍ଯ୍ୟ ସୂଚନା ଦେଇଛନ୍ତି।
ରାଜ୍ୟ ସରକାର ଓ ଶାସକ ଦଳ ଦୋଷୀକୁ ଘଣ୍ଟ ଘୋଡାଉଛନ୍ତି ଏହା ଅତ୍ୟନ୍ତ ଲଜ୍ଜାଜନକ ଘଟଣା ଅଟେ। ଏହି ଘଟଣା ନୂଆ ନୁହେଁ ମାଧବୀଲତା, ଇତିଶ୍ରୀ, ବେବିନା, କୁନ୍ଦୁଲୀ ପୀଡିତା, ପରୀ, ସ୍ମିତାରାଣୀ, ମାହାଙ୍ଗା ଡବଲ୍ ମର୍ଡର, ସୌମ୍ୟରଞ୍ଜନଙ୍କ ଭଳି ବର୍ତମାନ ମମିତା ମେହେର୍ ଯିଏକି ସନସାଇନ ସ୍କୁଲର ଶିକ୍ଷୟିତ୍ରୀ ତାଙ୍କୁ ଅପହରଣ କରି ହତ୍ୟା କରାଗଲା। ଶାସକ ବିଜେଡିର ଚାପରେ ପୋଲିସ୍ ଜାଣିଶୁଣି କେସ୍ରେ ଅବହେଳା କରୁଛି। ଲୋକଦେଖାଣିଆ ଭାବରେ ଜଣେ ପୋଲିସ୍ ଅଧିକାରୀଙ୍କୁ ସସପେଣ୍ଡ୍ କରାଯାଇ ମନ୍ତ୍ରୀଙ୍କୁ ଖସେଇ ଦେବାର ଚକ୍ରାନ୍ତ କରାଯାଉଛି ବୋଲି ବୋଲି ଇରାଶିଷ ଆଚାର୍ଯ୍ୟ କହିଛନ୍ତି। ମୃତ ଶିକ୍ଷୟିତ୍ରୀ ମମିତା ଦୀର୍ଘ ୭ ମାସ ଧରି ଛୁଟିରେ ଘରେ ଥିଲେ ତାଙ୍କୁ ଅଭିଯୁକ୍ତ ଗୋବିନ୍ଦ ସାହୁ ଚକ୍ରାନ୍ତ କରି ଘରୁ ଡାକିଥିଲା ବୋଲି ପୋଲିସ୍ ନିଜେ ପ୍ରକାଶ କରିଛି। ଅଭିଯୁକ୍ତ ଗୋବିନ୍ଦ ସାହୁଙ୍କ ଅନୈତିକ କାରବାରରେ ମନ୍ତ୍ରୀ ଶ୍ରୀ ମିଶ୍ରଙ୍କ ସମ୍ପୃକ୍ତି ସମ୍ପର୍କରେ ମମିତାଙ୍କ ପିତା ମାତାଙ୍କ ବାରମ୍ବାର ଅଭିଯୋଗ ସତ୍ୱେ ମାଜିଷ୍ଟ୍ରେଟ୍ଙ୍କ ଆଗରେ କାହିଁକ ବୟାନ୍ ରେକର୍ଡ କରାଯାଇ ନାହିଁ? ପୋଲିସ ବିଭାଗକୁ ହାତବାରିସୀ କରି ଶାସକ ବିଜେଡି ଏଭଳି ଜଘନ୍ୟ ଓ ବର୍ବରୋଚିତ ହତ୍ୟାକାଣ୍ଡକୁ ଦିଗହରା କରିବା ପାଇଁ ହୀନ ପ୍ରଚେଷ୍ଟା ଓ ଷଡଯନ୍ତ୍ର କରୁଛନ୍ତି। ମନ୍ତ୍ରୀ ଶ୍ରୀ ମିଶ୍ରଙ୍କୁ ମନ୍ତ୍ରୀମଣ୍ଡଳରୁ ବହିଷ୍କାର କରାଯାଇ ଗିରଫ କରି ତଦନ୍ତ ପରିସରଭୁକ୍ତ କରିବା ସହ ଯଥାଶୀଘ୍ର ଏହି ଘଟଣାର ତଦନ୍ତ ସିବିଆଇ ଦ୍ୱାରା କରାଯାଉ ବୋଲି ଶ୍ରୀ ଆଚାର୍ଯ୍ୟ ଦାବି କରିଛନ୍ତି। ଏହି ସାମ୍ବାଦିକ ସମ୍ମିଳନୀରେ ଯୁବମୋର୍ଚ୍ଚା ରାଷ୍ଟ୍ରୀୟ ଉପସଭାପତି ସୁଶ୍ରୀ ଅର୍ପିତା ଅପରାଜିତା ବଡ଼ଜେନା, ଯୁବମୋର୍ଚ୍ଚା ରାଜ୍ୟ ସାଧାରଣ ସମ୍ପାଦକ ଦୀପକ ଗୋଚ୍ଛାୟତ ଓ ମନୋଜ ପଶ୍ଚିମ କବାଟ, ଯୁବ ମୋର୍ଚ୍ଚା ମିଡିଆ ରାଜ୍ୟ ସଂଯୋଜକ ସୁଜିତ୍ ସାହୁ ଉପସ୍ଥିତ ଥିଲେ।
-@Dr
