ଭଦ୍ରକ, ୧୦ା୨ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକ ଜିଲ୍ଲାରେ ଚଳିତ ଖରିଫ୍ ଧାନ ସଂଗ୍ରହରେ ନିୟୋଜିତ ଜିଲ୍ଲାର ୨୦ଜଣ ରାଇସ୍ ମିଲର୍ସ ଧାନ ସଂଗ୍ରହ କାର୍ଯ୍ୟ ନେଇ ଏବେ ଅସହାୟତା ପ୍ରକାଶ କରିଛନ୍ତି । ଜିଲ୍ଲାରେ ଚଳିତ ଧାନ କିଣାରେ ମୋଟ ୪୫ଜଣ ମିଲର୍ସ ସାମିଲ ହୋଇଛନ୍ତି । ତେବେ ସଂଖ୍ୟାଧିକ ମିଲର୍ସ ହେଉଛନ୍ତି ବାହାର ଜିଲ୍ଲାର । ଅର୍ଥାତ ଅନ୍ୟ ଜିଲ୍ଲାର ୨୫ଜଣ ମିଲର୍ସ ଧାନକିଣାରେ ସାମିଲ ହୋଇଥିବା ବେଳେ ଭଦ୍ରକ ଜିଲ୍ଲାର ୨୦ଜଣ ମିଲର୍ସ ସାମିଲ ହୋଇଛନ୍ତି । ଗତବର୍ଷ ଧାନକିଣାରେ ୧୮ଜଣ ବାହାର ମିଲର୍ସଙ୍କୁ ସାମିଲଏ କରାଯାଇଥିବା ବେଳେ ଏଥର ରେକର୍ଡ ସଂଖ୍ୟକ ୨୫ଜଣଙ୍କୁ ସାମିଲ କରାଯାଇଛି । ଏହି ବାହାର ମିଲର୍ସ ମାନଙ୍କ ମଧ୍ୟରେ ଖୋର୍ଦ୍ଦା ଜିଲ୍ଲାରୁ ଜଣେ, ପଡୋଶୀ ଯାଜପୁର ଜିଲ୍ଲାରୁ ୨ଜଣ ଥିବା ବେଳେ ଅନ୍ୟ ୨୨ଜଣ ସମ୍ବଲପୁର ଓ ବରଗଡ ଜିଲ୍ଲାର ମିଲର୍ସ । ଗତ ଜିଲ୍ଲା ସ୍ତରୀୟ ଧାନକ୍ରୟ କମିଟି ବୈଠକରେ ଜିଲ୍ଲାର ମିଲର ମାନଙ୍କ ଧାନକିଣା ସନ୍ତୋଷଜନକ ନହେଲେ ନିଗମ ବାହର ଜିଲ୍ଲାର ମିଲରଙ୍କୁ ଏଥିରେ ସାମିଲ କରିବାକୁ ନିଷ୍ପତି ହୋଇଥିଲା । ସେହିଭଳି ଗତ ଥର ଧାନକିଣାରେ ଫେବୃଆରୀ ମାସରୁ ବାହାର ଜିଲ୍ଲା ମିଲରଙ୍କୁ ଧାନକିଣାରେ ସାମିଲ କରାଯାଇଥିବା ବେଳେ ଏଥର ଜିଲ୍ଲା ମିଲରଙ୍କ ଧାନ ସଂଗ୍ରହ ବେଳେ ସେମାନଙ୍କୁ ମଧ୍ୟ ସାମିଲ କରାଗଲା । ଫଳରେ ଅଧିକ ପରିମାଣର ବି.ଜି(ବ୍ୟାଙ୍କ ଗ୍ୟାରେଟିଂ)ଦେଇ ଏବେ ଘୋର ଆର୍ଥିକ ସଂକଟରେ ଗତି କରୁଛନ୍ତି ଜିଲ୍ଲାର ମିଲରମାନେ । ଆଜି ଭଦ୍ରକ ତାରିଣୀ କଂଟିନେଟାଂଲ ସମ୍ମିଳନୀ କକ୍ଷରେ ଭଦ୍ରକ ଜିଲ୍ଲା ରାଇସ୍ ମିଲର୍ସ ଆସୋସିଏସନ ପକ୍ଷରୁ ଅନୁଷ୍ଠିତ ଏକ ସାମ୍ବାଦିକ ସମ୍ମିଳନୀରେ ଉପରୋକ୍ତ ସୂଚନା ଦେଇଛନ୍ତି ଏସୋସିଏସନର କାର୍ଯ୍ୟକର୍ତାମାନେ ।
ସେମାନେ ଆହୁରି କହିଛନ୍ତି ଯେ, ଅନ୍ୟ ଜିଲ୍ଲାମାନଙ୍କ ଭଳି ଭଦ୍ରକରେ ରବି, ଖରିଫ୍ ଓ ହାଇହିଲଡିଂ ଚାଷ ହେଉଥିବା ବେଳେ ଆମ ଜିଲ୍ଲାରେ କାଁ ଭାଁ ରବି ଚାଷ ହେଉଛି । ମୁଖ୍ୟତ ଖରିଫ୍ ହେଉଛି ପ୍ରଧାନ ଚାଷ । ଆଉ ଜିଲ୍ଲାର ୨୦ଜଣ ମିଲରମାନେ ଏଥର ୨୧ଲକ୍ଷ କ୍ୱିଟାଂଲ ଧାନ ସଂଗ୍ରହ ପାଇଁ ପ୍ରାୟ ୭୩ କାଟି ଟଙ୍କା ବ୍ୟାଙ୍କ ଗ୍ୟାରେଟିଂ ଦାଖଲ କରିଛନ୍ତି । ତେବେ ଏଯାଏଁ ମାତ୍ର ୧୧ଲକ୍ଷ କ୍ୱିଟାଂଲ ଭଳି ଧାନ କିଣିବାର ସୁଯୋଗ ମିଳିଛି ଜିଲ୍ଲା ମିଲରଙ୍କୁ । ସେହିଭଳି ସରକାରୀ ଧାନ ସଂଗ୍ରହ ପଲିସି ଅନୁଯାୟୀ, ମଣ୍ଡିରୁ ମିଲ୍ ପର୍ଯ୍ୟନ୍ତ ଧାନ ସଂଗ୍ରହ ବାବଦ ପରିବହନ ଖର୍ଚ୍ଚ ଯୋଗାଣ ବିଭାଗ ବହନ କରେ । ଏହି କ୍ରମରେ ୫ଶହ କିମି ଦୂରରେ ସୁଦୂର ସମ୍ବଲପୁର, ବରଗଡ ଜିଲ୍ଲାର ମିଲରମାନେ ଅଧିକ ପରିମାଣର ପରିବହନ ଖର୍ଚ୍ଚ ପ୍ରାୟ ୩ଶହ ଟଙ୍କା ଅଧିକ ଖର୍ଚ୍ଚ ବହନ କରିବାକୁ ପଡିବ । ଅନ୍ୟ ଜିଲ୍ଲାର ମିଲର୍ସମାନେ ଯୋଗାଣ ନିଗମରୁ ଅଧିକ ପରିମାଣର ପରିବହନ ଖର୍ଚ୍ଚ ନେଉଛନ୍ତି । ଅନ୍ୟପକ୍ଷରେ ଜିଲ୍ଲାରେ ଧାନକିଣାରେ ଜିଲ୍ଲା ମିଲରଙ୍କୁ ଧାନକ୍ରୟର ଅଧିକ ସୁଯୋଗ ନଦେଲେ ଆଗକୁ ମିଲରମାନେ କ୍ଷତିଗ୍ରସ୍ତ ହୋଇ ସେମାନଙ୍କ ମିଲ୍ ବନ୍ଦ କରିବାକୁ ବାଧ୍ୟ ହେବେ । ଏହାଦ୍ୱାରା କେବଳ ମିଲରମାନେ ନୁହେଁ ମିଲର ଉପରେ ନିର୍ଭରଶୀଳ ବିିଭିନ୍ନ ବର୍ଗର ମଣିଷ(ଚାଷୀ, ଗାଡିଚାଳକ, ଗାଡି ମାଲିକ, କର୍ମଚାରୀ ଓ ବ୍ୟବସାୟୀ ଆଦି)ମଧ୍ୟ ବେରୋଜଗାର ହେବେ । ତେଣୁ ଜିଲ୍ଲା ପ୍ରଶାସନ ଏଦିଗରେ ଗୁରୁତର ସହ ଦୃଷ୍ଟି ଦେବାକୁ ମିଲର୍ସ ସଂଘ ସଭାପତି ଶେଖର ମହାପାତ୍ର ଓ ସମ୍ପାଦକ ସଙ୍କେତ ନାୟକଙ୍କ ସମେତ ମିଲ୍ ମାଲିକ-ସନ୍ତୋଷ ଅଗ୍ରୱାଲ, ସେଖ କାଦର, କୈଳାସ ମହାପାତ୍ର, ବିଶ୍ୱନାଥ ଅଗ୍ରୱାଲ, ଗୋପାଳ ମହାପାତ୍ର, ପ୍ରଦୀପ ମହାପାତ୍ର, ବିଶ୍ୱସ୍ୱରୂପ ଧୁନି, ପ୍ରସନ୍ନ ଦାଶ, ମୁଜାହିଦ ଆଲାମ, ନଟବର ସାହୁ ପ୍ରମୁଖ ନିବେଦନ କରିଛନ୍ତି । ଏ ପ୍ରସଙ୍ଗରେ ଜିଲ୍ଲା ଯୋଗାଣ ଅଧିକାରୀ ଲିଙ୍ଗରାଜ ବେହେରା କହିଛନ୍ତି, ଧାନକିଣା ଆରମ୍ଭ ହେବାର ପ୍ରାୟ ୧୫ଦିନ ପରେ ଜିଲ୍ଲାର ମିଲରମାନେ ଧାନ କିଣିଲେ ଓ ଯାହା ସରକାରୀ ଟାର୍ଗେଟ ସେହି ଅନୁଯାୟୀ ଧାନ କିଣା ଠିକ୍ ଚାଲିଛି ବୋଲି ପ୍ରତିକ୍ରିୟାରେ କହିଛନ୍ତି ।
