ଭଦ୍ରକ, ୨୧ା୧୨ (ଓଡ଼ିଆ ପୁଅ / ସ୍ନିଗ୍ଧା ରାୟ) – ପ୍ରସ୍ତାବିତ ଯାଜପୁର-ଧାମରା ରେଳପଥକୁ ଧାମନଗର ଦେଇ ସଂଯୋଗ କରିବାକୁ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କ ନିକଟରେ ଦାବି ଉପସ୍ଥାପନ କରିଛନ୍ତି ବିଧାୟକ ସୂର୍ଯ୍ୟବଂଶୀ ସୁରଜ ସ୍ଥିତପ୍ରଜ୍ଞ । ନୂଆଦିଲ୍ଲୀ ଗସ୍ତରେ ଥିବା ଧାମନଗର ଯୁବ ବିଧାୟକ ଶ୍ରୀ ସୁରଜ ଆଜି କେନ୍ଦ୍ର ରେଳ, ଦୂର ସଂଚାର ଓ ଆଇଟି ବିଭାଗ ମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କୁ ସାକ୍ଷାତ୍ କରିଥିଲେ । ଏହି ସାକ୍ଷାତ୍ ସମୟରେ ବିଧାୟକ ସୁରଜ ଯାଜପୁର-ଧାମରା ରେଳପଥର କିପରି ଧାମନଗରକୁ ସଂଯୋଗ ହେବ, ସେ ବିଷୟରେ କେନ୍ଦ୍ରମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଥିଲେ । ବିଧାୟକ ସୁରଜ ଏହି ପ୍ରସଙ୍ଗରେ ଦର୍ଶାଇଛନ୍ତି ଯେ ଧାମନଗର ହେଉଛି ଏକ ବିିବିଧ ଧର୍ମପୀଠ ରହିଥିବା ଐତିହାସିକ ସ୍ଥାନ । ଏଠାରେ ୨ଟି ପର୍ଯ୍ୟଟନ ସ୍ଥଳୀ ସହୀଦ ସ୍ମୃତି ପୀଠ ଲୁଣିଆ ଓ ଓଡ଼ିଶାର ଶେଷ ସ୍ୱାଧୀନ ରାଜା ମୁକୁନ୍ଦଦେବ ଏବଂ କଳାପାହାଡ ଯୁଦ୍ଧର ମୂକସାକ୍ଷୀ ଗୋହିରାଟିକିରୀ ରହିଛି । ସେହିପରି ଏଠାରେ ପ୍ରସିଦ୍ଧ ଖାନକା ସରିଫ, ଭାରଦା କଟକ ଭଳି ଧାର୍ମିକ ସ୍ଥାନ ରହିଛି । ଧାମନଗର ଦେଇ ପ୍ରସିଦ୍ଧ ଶୈବପୀଠ ଆଖଣ୍ଡଳମଣିଙ୍କୁ ଗମନାଗମନର ସୁବିଧା ସୁଯୋଗ ରହିଛି । ଏଣୁ ରେଳପଥକୁ ଧାମନଗର ଦେଇ ଧାମରା ସଂଯୋଗ କରାଗଲେ ପର୍ଯ୍ୟଟନ କ୍ଷେତ୍ର ସହ ଜନ ସାଧାରଣଙ୍କ ଉନ୍ନତି ସାଧିତ ହୋଇପାରିବ ବୋଲି ସେ ରେଳମନ୍ତ୍ରୀଙ୍କୁ ଅବଗତ କରାଇବା ସହ ଏ ସଂପର୍କିତ ଏକ ଦାବିପତ୍ର ପ୍ରଦାନ କରିଛନ୍ତି । ନିକଟରେ ଧାମନଗର ବରିଷ୍ଠ ନାଗରିକ ପରିଷଦ, ବରିଷ୍ଠ ନାଗରିକ ମଂଚ, ଧାମନଗର ଏକତା ମଂଚ ସମେତ ବିଭିନ୍ନ ସଂଗଠନ ପକ୍ଷରୁ ରେଳପଥ ସଂଯୋଗ କରିବା ପାଇଁ ବିଧାୟକ ସୁରଜଙ୍କ ମାଧ୍ୟମରେ ଦାବିପତ୍ର ପ୍ରଦାନ କରାଯାଇଥିଲା । ବିଧାୟକ ସୁରଜଙ୍କ ଦାବିକୁ ଧାମନଗର ଅଂଚଳର ବୁଦ୍ଧିଜୀବୀ ମହଲ ସ୍ୱାଗତ କରିଛନ୍ତି ।
