ଭଦ୍ରକ, ୧୭ା୧୧ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଆଜି ଭଦ୍ରକ ଜିଲା ତିହିଡି ଥାନା ପୁଲିସ୍ ଦୁଇଜଣ ଯୁବକଙ୍କ ନିକଟରୁ ୪୧.୧୭୦ ଗ୍ରାମ ବ୍ରାଉନସୁଗାର ଜବତ କରି କୋର୍ଟ ଚାଲାଣ କରିଛି । ଏ ସଂପର୍କରେ ଜିଲା ପୁଲିସ୍ ପ୍ରଶାସନ ପକ୍ଷରୁ ମିଳିଥିବା ତଥ୍ୟ ଅନୁସାରେ ଗତକାଲି ରାତିରେ ତିହିଡି ଥାନା ପୁଲିସ୍ ଭଦ୍ରକ-ଚାନ୍ଦବାଲି ୯ନଂ ରାଜ୍ୟ ରାଜପଥରେ ତନଖି କରୁଥିବା ସମୟରେ ତିହିଡି ଥାନା ଅଧୀନସ୍ଥ ସତ୍ସଙ୍ଗ ବିହାର ନିକଟରେ ୨ ଜଣ ଯୁବକଙ୍କୁ ନନ୍ଦପୁର-ତିହିଡି ଏକ ମୋଟର ସାଇକେଲ୍ରେ ଯିବାର ଦେଖିଥିଲେ । ସେମାନେ ପୁଲିସ୍କୁ ଦେଖି ନନ୍ଦପୁର ଦିଗକୁ ଖସିଯିବାର ଉଦ୍ୟମ କରୁଥିବାବେଳେ ପୁଲିସ୍ କାବୁ କରିଥିଲା । ଯାଞ୍ଚ ସମୟରେ ପୁଲିସ୍ ଓଡି-୨୨ଏମ୍-୨୫୭୨ ନମ୍ବର ନୀଳ ରଂଗର ହୋଣ୍ଡା ଲିଭୋ ବାଇକ୍ ଚାଳକ ପୀରହାଟ ଥାନା ଅଧୀନସ୍ଥ ଛତ୍ରପଡା ନିବାସୀ ଲକ୍ଷ୍ମୀଧର ନାଥ ଶର୍ମାଙ୍କ ପୁତ୍ର ରଶ୍ମିରଂଜନ (୨୫) ନିକଟରୁ ୪୧.୧୭୦ ଗ୍ରାମ ବ୍ରାଉନସୁଗାର, ନଗଦ ୩ ଶହ ଟଙ୍କା ଜବତ କରିଥିବାବେଳେ ବାଇକ୍ରେ ବସିଥିବା ତିହିଡି ଥାନା ବୁଦ୍ଧୁପୁର ଗ୍ରାମନିବାସୀ ପରେଶ କୁମାର ଜେନା (୨୭) ନିକଟରୁ ୪୨.୩୮୦ ଗ୍ରାମ ବ୍ରାଉନସୁଗାର, ନଗଦ ୬୫୦ ଟଙ୍କା ଜବତ କରିଛନ୍ତି । ଏବଂ ଏମାନଙ୍କୁ ଆଜି କୋର୍ଟ ଚାଲାଣ କରାଯାଇଥିବାବେଳେ ଏ ସଂପର୍କରେ ଅଧିକ ତଦନ୍ତ ଜାରି ରହିଛି ।
