ନୂଆଦିଲ୍ଲୀ ୫-୭ (ଓଡ଼ିଆ ପୁଅ) ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସୋମବାର ଦିନ କୋଭିନ ଗ୍ଲୋବାଲ ଶିଖର ସମ୍ମିଳନୀରେ ନିଜର ଭାବନା ସେୟାର କରିବେ। ଭାରତ କୋଭିଡ -୧୯ ଟୀକାକରଣ ଅଭିଯାନ ଚଳାଇବା ପାଇଁ ଅନ୍ୟ ଦେଶମାନଙ୍କୁ ଡିଜିଟାଲ ଜନସେବା ଭାବରେ କୋ-ୱିନ ପ୍ଲାଟଫର୍ମ ପ୍ରଦାନ କରିବ। କାନାଡା, ମେକ୍ସିକୋ, ନାଇଜେରିଆ, ପାନାମା ଏବଂ ଉଗାଣ୍ଡା ସମେତ ପ୍ରାୟ ୫୦ ଟି ଦେଶ ଟୀକାକରଣ ଅଭିଯାନ ପାଇଁ ଡିଜିଟାଲ ପ୍ଲାଟଫର୍ମ କୋ-ୱିନ ଗ୍ରହଣ କରିବାକୁ ଆଗ୍ରହ ପ୍ରକାଶ କରିଛନ୍ତି। ଏହି ସୂଚନା ନିକଟରେ ଜାତୀୟ ସ୍ୱାସ୍ଥ୍ୟ ପ୍ରାଧିକରଣ (NHA) ର ସିଇଓ ଡକ୍ଟର ଆର.ଏସ୍ ଶର୍ମା ପ୍ରଦାନ କରିଛନ୍ତି। ସେ କହିଛନ୍ତି ଯେ ସଫ୍ଟୱେୟାର ମାଗଣାରେ ସେୟାର କରିବାକୁ ଭାରତ ପ୍ରସ୍ତୁତ ଅଛି।
ଶର୍ମା କହିଛନ୍ତି ଯେ, ପ୍ରଧାନମନ୍ତ୍ରୀ ଏହି ପ୍ଲାଟଫର୍ମର ଏକ ମୁକ୍ତ ଉତ୍ସ ସଂସ୍କରଣ ପ୍ରସ୍ତୁତ କରିବାକୁ ଏବଂ ଏହାକୁ ଯେଉଁ ଦେଶ ଚାହାଁନ୍ତି ମାଗଣାରେ ଦେବାକୁ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। NHA ଟ୍ୱିଟ୍ କରି କହିଛି ଯେ, ମାନ୍ୟବର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କୋ-ୱିନ ଗ୍ଲୋବାଲ ଶିଖର ସମ୍ମିଳନୀରେ ନିଜର ଭାବନା ସେୟାର କରିବେ ଏବଂ COVID-୧୯ ବିରୋଧରେ ଲଢ଼େଇରେ ଭାରତ କୋ-ୱିନ ସେବାକୁ ଅଫର କରିବ।”
ଡିଜିଟାଲ ସମ୍ମିଳନୀକୁ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ହର୍ଷ ବର୍ଦ୍ଧନ ଉଦଘାଟନ କରିବେ। ବୈଦେଶିକ ସଚିବ ଏଚ୍ ବି ଶୃଙ୍ଗଳା, କେନ୍ଦ୍ର ସ୍ୱାସ୍ଥ୍ୟ ସଚିବ ରାଜେଶ ଭୂଷଣ ମଧ୍ୟ ସମ୍ବୋଧିତ କରିବେ। NHA ଏହାର ୱେବସାଇଟରେ ଏକ ବିବୃତ୍ତି ଜାରି କରି କହିଛି ଯେ ଡିଜିଟାଲ ସମ୍ମିଳନୀରେ ବିଭିନ୍ନ ଦେଶର ସ୍ୱାସ୍ଥ୍ୟ ଏବଂ ପ୍ରଯୁକ୍ତିବିଦ୍ୟା ବିଶେଷଜ୍ଞମାନେ ପ୍ରତିନିଧିତ୍ୱ କରିବେ।
NHA କହିଛି, କୋଭିଡ -୧୯ ବିରୋଧରେ ମିଳିତ ଲଢ଼େଇରେ କୋ-ୱିନ ମାଧ୍ୟମରେ ବିଦେଶ ସହ ଭାରତ ହାତ ମିଳାଇବାକୁ ଆଗ୍ରହୀ।’
