ଛତିଶଗଡ଼ ୦୫ ସେପ୍ଟେମ୍ବର (ଓଡ଼ିଆ ପୁଅ) ରବିବାର ଛତିଶଗଡର ସାଉଥ୍ ଇଷ୍ଟର୍ଣ୍ଣ କୋଇଲଫିଲ୍ଡସ୍ ଲିମିଟେଡ୍ (SECL) ର ଅତି କମରେ ୩୨ କର୍ମଚାରୀ ଆହତ ହୋଇଛନ୍ତି। ତାଙ୍କ ବସ୍ ରାଜ୍ୟର ସୁରଜପୁର ଜିଲ୍ଲାର ଏକ ନଦୀରେ ଖସିପଡିଥିବା ବେଳେ ଏହି ଦୁର୍ଘଟଣା ଘଟିଛି। ପୋଲିସ କହିଛି ଯେ SECL ର ମୋଟ ୪୩ କର୍ମଚାରୀ ଏକ ବସ୍ରେ କମ୍ପାନୀର ଭଟଗାଓଁ ମୁଖ୍ୟାଳୟରୁ ମହାନ୍ କୋଇଲା ଖଣି ଯାଉଥିଲେ। ବସଟି ସୁଖଦେବପୁର ଗ୍ରାମ ନିକଟରେ ଥିବା ଏକ ବ୍ରିଜରେ ପହଞ୍ଚିବା ପରେ ଡ୍ରାଇଭର ଷ୍ଟିଅରିଂ ନିୟନ୍ତ୍ରଣ ହରାଇ ବ୍ରିଜ୍ ର ସିମେଣ୍ଟ ରେଲିଂ ଭାଙ୍ଗି ବସ୍ ନଦୀକୁ ଖସିପଡିଥିଲା। ପୋଲିସର ଏକ ଟିମ୍ ଘଟଣାସ୍ଥଳରେ ପହଞ୍ଚି ସ୍ଥାନୀୟ ଲୋକଙ୍କ ସହାୟତାରେ ସେମାନେ ଉଦ୍ଧାର କାର୍ଯ୍ୟ କରିଥିଲେ।
ବସ୍ର ସମସ୍ତ ଲୋକଙ୍କୁ ଭଟଗାଓଁର ଏକ ଡାକ୍ତରଖାନାରେ ଭର୍ତ୍ତି କରାଯାଇଥିଲା ବୋଲି ଜଣେ ପୋଲିସ ଅଧିକାରୀ କହିଛନ୍ତି। ଏହା ପରେ ୩୨ ଜଣଙ୍କୁ ଚିକିତ୍ସା ପାଇଁ ଅମ୍ବିକାପୁରର ଏକ ଘରୋଇ ଡାକ୍ତରଖାନାକୁ ପଠାଯାଇଥିଲା। ବାକିଲୋକମାନଙ୍କୁ ପ୍ରାଥମିକ ଚିକିତ୍ସା ଯୋଗାଇବା ପରେ ଡାକ୍ତରଖାନାରୁ ଡିସଚାର୍ଜ କରାଯାଇଥିଲା। ନଦୀରେ ଜଳ ସ୍ତର କମ୍ ଥିଲା, ଅନ୍ୟଥା ଏକ ବଡ଼ ଦୁର୍ଘଟଣା ହୋଇଥାଇପାରେ ବୋଲି ଅଧିକାରୀ କହିଛନ୍ତି। ପୋଲିସ ଏକ ମାମଲା ରୁଜୁ କରିଛି ଏବଂ ତଦନ୍ତ ଚାଲିଛି।
