ଭଦ୍ରକ, ୧୧ା୮ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକ ଜିଲ୍ଳାର ସବୁ ବର୍ଗର ପ୍ରାଥମିକ ଶିକ୍ଷକମାନେ ନିଖିଳ ଉତ୍କଳ ପ୍ରାଥମିକ ଶିକ୍ଷକ ଫେଡ଼େରେସନ ଆନୁକୁଲ୍ୟରେ ଏକତ୍ରିତ ହୋଇ ୩ ଦଫା ଦାବି ସମ୍ବଳିତ ଦାବିପତ୍ର ଜିଲ୍ଳାପାଳଙ୍କୁ ମାନ୍ୟବର ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ପ୍ରଦାନ କରିଛନ୍ତି । ପ୍ରାଥମିକ ଶିକ୍ଷକମାନଙ୍କର ଠିକା ସମୟ ୬ ବର୍ଷକୁ ଚାକିରିରେ ସାମିଲ କରି ୬ଟି ଇନ୍କ୍ରିମେଣ୍ଟ ଦେବା, ଏକ୍ସ କ୍ୟାଡ଼ର ଶିକ୍ଷକକଙ୍କୁ ଏଲିମେଣ୍ଟାରୀ କ୍ୟାଡ଼ରଭୁକ୍ତ କରିବା ଏବଂ କଳା ଓ କ୍ରୀଡ଼ା ଶିକ୍ଷକଙ୍କୁ ନିୟମିତ କରିବା ପାଇଁ ଦାବି କରାଯାଇଛି । ଦ୍ୱିତୀୟତଃ ପ୍ରାଥମିକ ଶିକ୍ଷକମାନଙ୍କୁ କେନ୍ଦ୍ରୀୟ ହାରରେ ବେତନ ଏବଂ ପୁରୁଣା ପେନ୍ସନ୍ ନୀତିର ପୁନଃ ପ୍ରଚଳନ ଦାବିରେ ଶିକ୍ଷକମାନେ ଆନ୍ଦୋଳନରେ ସାମିଲ ହୋଇଛନ୍ତି । ଏହି ୩ ଦଫା ଦାବି ପୂରଣ ନିମନ୍ତେ ଗତ ନଭେମ୍ବର ମାସରେ ଭୁବନେଶ୍ୱରରେ ୪ ଦିନ ଧରି ଲକ୍ଷାଧିକ ଶିକ୍ଷକ ଧାରଣା ଦେଇଥିଲେ । ସରକାରଙ୍କର ମୁଖ୍ୟ ଶାସନ ସଚିବ ମହୋଦୟ ଲିଖିତ ପ୍ରତିଶୃତି ଦେବା ପରେ ମଧ୍ୟ ଶିକ୍ଷକମାନଙ୍କର ଦାବି ପୂରଣ ହେଲା ନାହିଁ । ଉଚ୍ଚସ୍ତରୀୟ କମିଟି, ମନ୍ତ୍ରୀ ସ୍ତରୀୟ କମିଟି ଆଳରେ ୮ମାସ ବିତିଗଲାଣି କିନ୍ତୁ, ଶିକ୍ଷକଙ୍କ ସମସ୍ୟା ସମାଧାନ ହୋଇ ପାରିଲା ନାହିଁ ।
ଏଥର ଶିକ୍ଷକମାନେ ସରକାରଙ୍କର ଠକାମିର ଶିକାର ନହେବା ପାଇଁ ସବୁବର୍ଗର ଶିକ୍ଷକ ଗୋଟିଏ ମଞ୍ଚରେ ଏକତ୍ରିତ ହୋଇ ଆସନ୍ତା ୧୬ ଅଗଷ୍ଟରୁ ସମୂହ ଛୁଟି ନେବାକୁ ନିଷ୍ପତି ଗ୍ରହଣ କରିଛନ୍ତି । ଏହା ଦ୍ୱାରା ପ୍ରାଥମିକ ବିଦ୍ୟାଳୟ ଗୁଡ଼ିକରେ ଶିକ୍ଷା ବ୍ୟବସ୍ଥା ଠପ୍ ହେବା ସହ ମଧ୍ୟାହ୍ନ ଭୋଜନ ବଣ୍ଟନ ମଧ୍ୟ ବାଧାପ୍ରାପ୍ତ ହେବାର ଆଶଙ୍କା ଉପୁଜିଛି । ଆଜିର ଦାବିପତ୍ର ପ୍ରଦାନ ସମୟରେ ଶିକ୍ଷକ ନେତା ବାବୁଲା ରାଉତ, ସମୀର ଜେନା, ଚାରୁଲତା ମହପ।।ତ୍ର, ପ୍ରଶାନ୍ତ ବାରିକ, ରାଜେଶ ଦାସ, ଅରବିନ୍ଦ ଦୀକ୍ଷିତ, ପ୍ରଣୟ ମହାପାତ୍ର, ତବରେଜ ଖାନ୍, ପ୍ରମୋଦ କର, ନିଳାଦ୍ରୀ ତ୍ରିପାଠୀ, ରୂପକ ମିଶ୍ର, ବସନ୍ତ ଯେନା, ଗୟାଧର ଦାସ, ପ୍ରକାଶ ନାୟକ, ବିମଳ ଦାସ, ସନାତନ ଦାସ, ରାଧାଶ୍ୟାମ ବାରିକ, ଗିରିଧାରୀ ଚାନ୍ଦ, ଅରୁଣ ମଳିକ, ରମାକାନ୍ତ ଦାସ, ପ୍ରଭାସ ପଣ୍ଡା, ଧର୍ମେନ୍ଦ୍ର ଯେନା, ଅବଦୁଲ ରବ୍, ରଞ୍ଜନ ମହାନ୍ତି, ସନ୍ତୋଷ ଲେଙ୍କା, ମୁକ୍ତିକାନ୍ତ ପରିଡ଼ା, ସୁପ୍ରୀତି ଖୁଣ୍ଟିଆ, ପ୍ରଶାନ୍ତ ବେହେରା, ରୂପେଶ ସାହୁ, ଆଶିଷ କୁମାର ସାହୁ, ଚନ୍ଦ୍ରକାନ୍ତ ଶୁକ୍ଳ ପ୍ରମୁଖ ଦାବି ପୂରଣ ନିମନ୍ତେ ସରକାରଙ୍କୁ ଦୃଢ଼ ଚେତାବନୀ ଦେଇଛନ୍ତି ।
