ଭଦ୍ରକ, ୨୭ା୨ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକ ଜିଲା ଭଣ୍ଡାରିପୋଖରୀ ଥାନା ଅନ୍ତର୍ଗତ ୧୬ ନଂ ଜାତୀୟ ରାଜପଥର ପାହିମହୁରା ଶିଳ୍ପତାଲିମ ପ୍ରତିଷ୍ଠାନ ସମ୍ମୁଖରେ ଆଜି ପ୍ରତ୍ୟୁଷରେ ସଡକ ଦୁର୍ଘଟଣା ଘଟି ଜଣେ ଆହତ ଓ ଜଣେ ମୃତ୍ୟୁବରଣ କରିଥିବା ଜଣାଯାଇଛି । ସେଠାରେ ଭଦ୍ରକ ଆଡକୁ ମୁହଁ କରି ପୂର୍ବରୁ ଛିଡା ହୋଇଥିବା ଏକ ଟ୍ରଲରର ପଛକୁ ଓଡି ୦୨ ବି ଏଚ ୫୪୯୧ ନଂ ଆଇଚର ଗାଡି ଧକ୍କାଦେବା ଫଳରେ ଚାଳକ ପୁରୀ ଜିଲ୍ଲା ନିମାପଡା ଅଞ୍ଚଳର ପ୍ରସନ୍ନ ବେହେରା(୫୨) ଓ ବାଲେଶ୍ୱର ଜିଲ୍ଲା ସୋରୋ ଅଞ୍ଚଳର ଜାନକୀ ପାତ୍ର(୪୫) ଗୁରୁତର ଆହତ ହୋଇଥିଲେ । ଦୁର୍ଘଟଣା ପରେ ଟ୍ରଲରଟି ଫେରାର ହୋଇଯାଇଥିଲା । ସ୍ଥାନୀୟ ଦମଳକ କେନ୍ଦ୍ର ଅଧିକାରୀ ରମାକାନ୍ତ ମଲ୍ଲିକଙ୍କ ନେତୃତ୍ୱରେ କର୍ମଚାରୀମାନେ ଆହତଙ୍କୁ ଉଦ୍ଧାର କରି ଭଣ୍ଡାରିପୋଖରୀ ମେଡିକାଲକୁ ଚିକିତ୍ସା ପାଇଁ ଭର୍ତ୍ତି କରିଥିଲେ । ଆହତଙ୍କୁ ପ୍ରାଥମିକ ଚିକିତ୍ସା କରି ଭଦ୍ରକ ପଠାଇଦିଆଯାଇଥିଲା । ସେଠାରେ ଚିକିତ୍ସାଧିନ ଅବସ୍ଥାରେ ଆହତ ଜାନକୀ ପ୍ରାଣହରାଇଥିବା ଜଣାଯାଇଛି ।
