ଭଦ୍ରକ, ୧ା୨ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଏହି ଜିଲାର ମଞ୍ଜୁରୀରୋଡ ଫାଣ୍ଡି ଅନ୍ତର୍ଗତ ବଳିପୁର-ଆଖୁଆପଦା ବୈତରଣୀ ନଦୀବନ୍ଧ ଉପରେ ଗୁରୁବାର ଅଜଣା ଗାଡି ଧକ୍କାରେ ଜଣେ ମୃତ୍ୟୁବରଣ କରିଥିବା ଜଣାଯାଇଛି । କେଉଁଝର ଜିଲ୍ଲା ନନ୍ଦିପଦା ଥାନା ଶାଳଣିଆ ନିକଟ ମନୋହରପୁର ଗ୍ରାମର ରଞ୍ଜନ ଜେନା(୪୦) ସ୍କୁଟି ଯୋଗେ ଭୋର ୪ଟାରେ ଆଖୁଆପଦା ଆଡକୁ ଆସୁଥିବା ବେଳେ ଅଜଣା ଗାଡି ବନସ୍ତା ଗ୍ରାମ ନିକଟରେ ଧକ୍କାଦେଇ ଫେରାର ହୋଇଯାଇଥିଲା । ସ୍ଥାନୀୟ ଲୋକଙ୍କ ସହାୟତାରେ ଆହତ ରଞ୍ଜନଙ୍କୁ ଆମ୍ବୁଲାନ୍ସ ଯୋଗେ ଭଣ୍ଡାରିପୋଖରୀ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଅଣାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଜିତେନ୍ଦ୍ର ଜେନାଙ୍କ ଅଭିଯୋଗ କ୍ରମେ ୩୯/୨୪ନଂ ମାମଲା ଋଜୁ ହୋଇ ଶବ ବ୍ୟବଚ୍ଛେଦ ପାଇଁ ଭଦ୍ରକ ପଠାଯାଇଥିଲା ।
