କେନ୍ଦ୍ରାପଡ଼ା, ୨୩ା୫(ଓଡ଼ିଆ ପୁଅ/ଚିତ୍ତରଞ୍ଜନ ଦାସ): କେନ୍ଦ୍ରାପଡାର ଆରାଧ୍ୟ ପ୍ରଭୁ ଶ୍ରୀ ସିଦ୍ଧ ବଳଦେବଜୀଉଙ୍କ ଚନ୍ଦନ ପୋଖରୀରୁ ଶ୍ରୀ ବିଷ୍ଣୁଙ୍କ ପ୍ରତିମା ଉଦ୍ଧାର କରାଯାଇଥିବା ଜଣାପଡିଛି। ସୂଚନା ଅନୁଯାୟୀ ଶ୍ରୀଜୀଉଙ୍କ ଚନ୍ଦନ ଯାତ୍ରା ଚାଲିଥିବା ବେଳେ ଇଛାପୁରସ୍ଥିତ ନୂତନ ଚନ୍ଦନ ପୋଖରୀରେ ଦିଅଁଙ୍କ ଚାପ ଖେଳ ଦେଖିବା ପାଇଁ ଶହ ଶହ ଶ୍ରଦ୍ଧାଳୁ ଓ ଭକ୍ତମାନେ ଘଟଣା ସ୍ଥଳରେ ରୁଣ୍ଡ ହେଉଥିଲେ। ସେହି ସମୟରେ ପୋଖରୀ ମଧ୍ୟରେ ଏକ ମୂର୍ତି ରହିଥିବା ସ୍ଥାନୀୟ ଜଣେ ବ୍ୟକ୍ତିଙ୍କ ନଜରକୁ ଆସିଥିଲା। ପରେ ସେହି ମୂର୍ତିକୁ ଉଦ୍ଦାର କରାଯିବା ପରେ ଏହା ଅଷ୍ଟଧାତୁରେ ନିର୍ମିତ ପ୍ରାଚୀନ ମୂର୍ତ୍ତିବୋଲି ସ୍ଥାନୀୟ ଅଞ୍ଚଳରେ ଆଲୋଚନା ହେଉଥିବା ଶୁଣିବାକୁ ମିଳିଛି। ଠାକୁରଙ୍କ ଚନ୍ଦନଯାତ୍ରା ସମୟରେ ପୋଖରୀରୁ ମୂର୍ତ୍ତ ଉଦ୍ଧାର ହେବା ଘଟଣା ଜଣାପଡିବା ପରେ ଶହ ଶହ ବ୍ୟକ୍ତି ଏହାକୁ ଦେଖିବା ପାଇଁ ଘଟଣାସ୍ଥଳରେ ରୁଣ୍ଡ ହୋଇଥିବା ଦେଖିବାକୁ ମିଳିଛି।
