ହାଟଡିହି -୧୫ । ୮ : (ଓଡିଆପୁଅ / ବିକାଶ ବିଶ୍ୱାଳ) ହାଟଡିହି ବ୍ଲକ ନନ୍ଦିପଦା ଥାନା ଅକରୁଆ ପଞ୍ଚାୟତ ଭାତକରୁଆ ଗ୍ରାମରେ ଜଣେ ମହିଳାଙ୍କୁ ଆକ୍ରମଣ ଘଟଣାରେ ନନ୍ଦିପଦା ପୁଲିସ ୫ଜଣଙ୍କୁ ଅଟକ ରଖି ତଦନ୍ତ ଚଳାଇଛି । ଖବରରୁ ଜଣାଯାଇଛି ଯେ ଗ୍ରାମରେ ରାସ୍ତା ନିର୍ମାଣକୁ କେନ୍ଦ୍ର କରି ଦୁଇଟି ପରିବାର ସହ ଗ୍ରାମର କିଛି ବ୍ୟକ୍ତିଙ୍କ ମଧ୍ୟରେ ବିବାଦ ଲାଗି ରହିଥିଲା । ଗତ ୫ଦିନ ତଳେ ଏନେଇ ପାଟିତୁଣ୍ଡ ଝଗଡା ହେବାରୁ ଉଭୟ ପକ୍ଷଙ୍କ ମଧ୍ୟରେ ପୁଲିସ ଉପସ୍ଥିତିରେ ସମାଧାନ ହୋଇ ଭବିଷ୍ୟତରେ ଆଉ ଝଗଡା ଲାଗିବେ ନାହିଁ ବୋଲି ବୁଝାମଣା ହୋଇଥିଲା । କିନ୍ତୁ ଗତକାଲି ସନ୍ଧ୍ୟାରେ କୁଳମଣି ରାଉତଙ୍କ ମା ରୁପ ରାଉତ ନିକଟସ୍ଥ ନଳକୂପକୁ ଚାଉଳ ଧୋଇବାକୁ ଯାଇଥିବାବେଳେ କେହି ତାଙ୍କ ଉପରକୁ ଏକ ପଥର ଫେପାଡି ଥିଲା । ଫଳରେ ସେ ଅଚେତ ହୋଇ ନଳକୂପ ନିକଟରେ ପଡିଯାଇଥିଲେ । କିଛି ଗାଁ ଲୋକେ ଦଉଡିଯାଇ ତାଙ୍କୁ ଟେକିଆଣି ପାଣିଢ଼ାଳି ଚେତା ଫେରାଇବା ପାଇଁ ଚେଷ୍ଟା କରିଥିଲେ ମଧ୍ୟ ସମ୍ଭବ ହୋଇନଥିଲା । ଗାଁ ଲୋକେ ତୁରନ୍ତ ଏ ସମ୍ପର୍କରେ ନନ୍ଦିପଦା ଥାନାକୁ ଜଣାଇବାପରେ ନନ୍ଦିପଦା ପୁଲିସ ଘଟଣାସ୍ଥଳରେ ପହଞ୍ଚି ଆହତ ରୁପ ରାଉତଙ୍କୁ ଡାକ୍ତରଖାନା ନେବା ସହିତ ଏହି ଘଟଣାରେ ପ୍ରଫୁଲ ରାଉତ, ଗଣେଶ ରାଉତଙ୍କ ସମେତ ୫ଜଣକୁ ଅଟକ ରଖି ତଦନ୍ତ ଚଳାଇଥିବା ଜଣାଯାଇଛି ।
