ଭଦ୍ରକ, ୧୦ା୧ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଲାଗି ଭଦ୍ରକ ସହର ଓ ପଂଚାୟତରେ ଜୟ ଜଗନ୍ନାଥ ଅର୍ପଣ ରଥ ଗଡିଛି । ଆଜି ସହରାଚଂଳର ଚରମ୍ପା ୧୩ନମ୍ବର ୱାର୍ଡ ଅପର୍ତ୍ତିବିନ୍ଧା ଠାରେ ଏହି ଅର୍ପଣ ରଥକୁ ଭଦ୍ରକ ବିଧାୟକ ସଞ୍ଜୀବ କୁମାର ମଲ୍ଳିକ ଶୁଭ ଉଦଘାଟନ କରିଥିଲେ । ବିଧାୟକ ନିଜେ ଏହି ୱାର୍ଡର ଘରକୁ ଘର ବୁଲି ମହାପ୍ରଭୁ ଶ୍ରୀଜଗନ୍ନାଥଙ୍କ ପରିକ୍ରମା ଯାତ୍ରା ପାଇଁ ଚାଉଳ ଓ ଗୁଆ ସଂଗ୍ରହ କରିଥିଲେ । ବିଧାୟକ ଶ୍ରୀ ମଲ୍ଳିକଙ୍କ ଏହି ୱାର୍ଡର ପ୍ରାକ୍ତନ କାଉନସିଲର ପ୍ରଣୟ ଦାସ, ପ୍ରାକ୍ତନ କାଉନସିଲର ଅତ୍ୟୁଲ୍ୟ ନାୟକ, ବରିଷ୍ଠ ନେତା ପ୍ରଭାତ ଜେନା, କାଉନସିଲର ଦିଲିପ ନାୟକଙ୍କ ସହ ଶତାଧିକ ମହିଳା, ପୁରୁଷ ଶ୍ରଦ୍ଧାଳୁ ଉପସ୍ଥିତ ଥିଲେ । ସଂକୀର୍ତ୍ତନ ଦଳର ଭଜନ ସହ ଘରକୁ ଘର ବୁଲି ଚାଉଳ ଓ ଗୁଆ ସଂଗ୍ରହ କରୁଥିବା ଦେଖିବାକୁ ମିଳିଥିଲା । ଏହି ରଥ ଭଦ୍ରକ ପୌରାଚଂଳର ୩୦ଗୋଟି ୱାର୍ଡକୁ ପରିକ୍ରମା କରିବ । ଅନୁରୂପ ଭାବେ ଭଦ୍ରକ ବ୍ଲକ ଅଧିନ ଗେଲପୁର ଓ କେଦାରପୁର ପଂଚାୟତରେ ଜୟ ଜଗନ୍ନାଥ ଅର୍ପଣ ରଥର ଶୁଭାରମ୍ଭ ହୋଇଛି । ଭଦ୍ରକ ବିଧାୟକ ସଞ୍ଜୀବ ମଲ୍ଲିକ ଏହି ୩ଟି ପଂଚାୟତରେ ପହଂଚି ରଥର ଶୁଭାରମ୍ଭ କରିବା ସହ ପ୍ରତି ଘରୁ ଅକ୍ଷତ ଗୁଆ ଓ ଚାଉଳ ସଂଗ୍ରହ କାର୍ଯ୍ୟରେ ନିଜକୁ ସାମିଲ କରିଥିଲେ । ଭଜନ, କୀର୍ତ୍ତନର ତାଳେତାଳେ ଲୋକେ ଭକ୍ତି ଭାବନା ସହ ଗୁଆ ଓ ଚାଉଳ ଦେଉଥିବାର ଦେଖିବାକୁ ମିଳିଥିଲା । ଏହି ରଥ ପରିକ୍ରମା ବେଳେ ଶତାଧିକ ମହିଳା, ପୁରୁଷ ସାମିଲ ଥିଲେ । ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ବରିଷ୍ଠ ବିଜେଡି ନେତା ଯୋଗେନ୍ଦ୍ର ଘଡେଇ, ସ୍ଥାନୀୟ ଅଂଚଳର ସରପଂଚ, ସମିତିସଭ୍ୟ, ପଂଚାୟତ ଅଧିକାରୀମାନେ ଉପସ୍ଥିତ ଥିଲେ । ଅନ୍ୟପକ୍ଷରେ ଭଦ୍ରକ ବ୍ଲକ ଅଧିନ ବାଉଦୁପର, ଅର୍ଣ୍ଣପାଳ, ଅଣ୍ଢେଇପଲ୍ଲି ଓ କଲେଇ ପଂଚାୟତରେ ଜୟ ଜଗନ୍ନାଥ ଅର୍ପଣ ରଥର ଶୁଭାରମ୍ଭ ବ୍ଲକ ଅଧ୍ୟକ୍ଷା ଉର୍ମିଳା ନାୟକ କରିଥିବା ଜଣାଯାଇଛି ।
