ଭଦ୍ରକ, ୮ା୮ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଏହି ଥାନାର ରଘୁନାଥପୁର ଖେଳପଡିଆ ନିକଟ ବରଗଛ ମୂଳରେ ଆଜି ସକାଳେ ଜଣେ ଶ୍ରମିକର ମୃତଦେହକୁ ପୁଲିସ ଉଦ୍ଧାର କରିଛି । ମୃତକ ଗୁରା ମୁଣ୍ଡା(୪୫)ର ପତ୍ନୀ ମଞ୍ଜୁ ମୁଣ୍ଡାଙ୍କ ଅଭିଯୋଗ ଅନୁଯାୟୀ ଥାନାରେ ୧୩/୨୧ନଂ ଅପମୃତ୍ୟୁ ମାମଲା ଋଜୁ କରାଯାଇ ବ୍ୟବଚ୍ଛେଦ ପାଇଁ ଶବ ଭଦ୍ରକ ପଠାଯାଇଛି । ଅଭିଯୋଗ ଅନୁଯାୟୀ କେଉଁଝର ଜିଲ୍ଲା ଘଟଗାଁ ଥାନା ଅନ୍ତର୍ଗତ ତୋରାଣୀପୋଖରୀ ଗ୍ରାମର ଗୁରା ମୁଣ୍ଡା ଓ ପତ୍ନୀ ମଞ୍ଜୁ ମୁଣ୍ଡା ବିଲକାମ କରିବାକୁ ଆସି ଭଣ୍ଡାରିପୋଖରୀ ଥାନା ନପଙ୍ଗ ପଞ୍ଚାୟତ ବାଙ୍କମୁହାଁ ଗ୍ରାମର ଚଣ୍ଡାଳିସାହିରେ ଗତ ସପ୍ତାହରୁ ରହୁଥିଲେ । ଗତକାଲି ସନ୍ଧ୍ୟାରୁ ଗୁରା ନିଖୋଜ ଥିବା ବେଳେ ଆଜି ଶବ ଉଦ୍ଧାର କରାଯାଇଛି । ସକାଳେ ଗ୍ରାମର ୱାର୍ଡ ସଦସ୍ୟ ଭରତ ଭୂଷଣ ନାଥଙ୍କ ଠାରୁ ଖବର ପାଇ ମଞ୍ଜୁ ଶବ ଚିହ୍ନଟ କରିଥିଲେ । ଶ୍ରୀ ନାଥ ପୁଲିସକୁ ଏ ସମ୍ପର୍କରେ ସୂଚନା ଦେଇଥିଲେ ।
