ଭଦ୍ରକ, ୪ା୧୦ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଏହି ଜିଲାର ଭଣ୍ଡାରିପୋଖରୀ ପୁଲିସ ଆଜି ସକାଳୁ ପ୍ରାୟ ୪ଟା ସମୟରେ ଏକ ବେଆଇନ ଗୋରୁଟ୍ରକ ଜବତ କରିବା ସହ ୩୬ ଗୋରୁ ଉଦ୍ଧାର କରିଥିôବା ଜଣାଯାଇଛି । ଯାଜପୁର ଜିଲ୍ଲା ସାହାପୁରରୁ ଜଲେଶ୍ୱରକୁ ଗୋରୁ ପରିବହନ କରି ଯାଉଥିବା ଓଡି ୩୪ ଏନ ୪୮୫୬ନଂ ଟ୍ରକକୁ ପାଟ୍ରୋଲିଂ ପୁଲିସ ୧୬ ନଂ ଜାତୀୟ ରାଜପଥର ଡାହାଲା ନିକଟରେ ଅଟକିବାକୁ ସଙ୍କେତ ଦେଇଥିଲେ । ହେଲେ ସଂପୃକ୍ତ ଟ୍ରକଟି ଦ୍ରୁତବେଗରେ ତ୍ରୁଟିପୂର୍ଣ୍ଣ ଭାବେ ଅପରପାଶ୍ୱର୍କୁ ଯାଇ ପୁଲିସଙ୍କ ଉପରେ ଚଢାଇବାକୁ ଉଦ୍ୟମ କରିଥିଲା । ପୁଲିସ ଦଳ ଟ୍ରକକୁ ପିଛାକରି ଭଣ୍ଡାରିପୋଖରୀ ନିକଟରେ ଅଟକାଇବାକୁ ସକ୍ଷମ ହୋଇଥିଲେ । ପୁଲିସ ଟ୍ରକକୁ ଜବତ କରିବା ସହ ଟ୍ରକରୁ ୩୬ଟି ଗୋରୁ ଉଦ୍ଧାର କରି ମଇତାପୁର ଗୋଶାଳାରେ ଛାଡିଥିବା ଜଣାଯାଇଛି । ଏଥିନେଇ ଥାନାରେ ୩୦୩/୨୧ନଂ ମାମଲା ଋଜୁ କରାଯିବା ସହ ଚାଳକ ଶେଖ ବାବୁଆକୁ ଗିରଫ କରାଯାଇଛି ।
