ଭଦ୍ରକ, ୩ା୭ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକ-ଚାନ୍ଦବାଲି ରାସ୍ତାର କମାରିଆ ଗ୍ରାମ ନିକଟରେ ରବିବାର ସକାଳେ ଏକ ବସ୍ ଧକ୍କାରେ ଜଣେ ବାଇକ୍ ଆରୋହୀ ଯୁବକ ଗୁରୁତର ଆହତ ହୋଇଥିବା ଜଣାଯାଇଛି । ପ୍ରକାଶ ଯେ ଭଦ୍ରକରୁ ଖୁସି ନାମକ ଏକ ଯାତ୍ରୀ ବାହୀ ବସ୍ ଚାନ୍ଦବାଲି ଅଭିମୁଖେ ଯାଉଥିବା ବେଳେ ଅପର ପଟରୁ ଭଦ୍ରକ ଅଭିମୁଖେ ଆସୁଥିବା ସେକ୍ ସାକିବ୍ ଅଲ୍ଲୀ (୨୪) ନାମକ ଜଣେ ଯୁବକକୁ ଧକ୍କା ଦେଇଥିଲା । ଫଳରେ ସାକିବ୍ ଗୁରୁତର ଆହତ ହୋଇଥିଲେ । ସ୍ଥାନୀୟ ଲୋକେ ତାଙ୍କୁ ଗୁରୁତର ଅବସ୍ଥାରେ ପ୍ରଥମେ ତିହିଡ଼ି ମେଡ଼ିକାଲରେ ଚିକିତ୍ସା ପାଇଁ ଭର୍ତ୍ତି କରିଥିଲେ । ପରେ ତାଙ୍କର ଅବସ୍ଥା ସଂକଟାପନ୍ନ ହେବାରୁ ତାଙ୍କୁ ଭଦ୍ରକ ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଥିବା ଜଣାଯାଇଛି । ତେବେ ଗୁରୁତର ଆହତ ସାକିବ୍ କେନ୍ଦ୍ରାପଡ଼ା ଜିଲ୍ଲା ଆଳି ବ୍ଲକ ଅଧୀନ କଳାପାହାଡ଼ ଗ୍ରାମର ରାଜକ ଅଲ୍ଲୀଙ୍କ ପୁଅ ବୋଲି ଜଣାପଡ଼ିଛି । ପୀରହାଟ ପୁଲିସ ବସ୍କୁ ଜବତ କରିବା ସହ ବସ୍ ଚାଳକ ଅଟକ ରଖିଥିବା ଜଣାଯାଇଛି ।
