– ନୂଆ କାର୍ଯ୍ୟକାଳର ପ୍ରଥମ ପ୍ରଗତି ବୈଠକରେ ୨୦୨୨ ସୁଦ୍ଧା “ସମସ୍ତଙ୍କୁ ଆବାସ” ପ୍ରତିବଦ୍ଧତାକୁ ଦୃଢ଼ ଭାବେ ଦୋହରାଇଲେ ପ୍ରଧାନମନ୍ତ୍ରୀ
– ପ୍ରଧାନମନ୍ତ୍ରୀଙ୍କ ଦ୍ୱାରା ଆୟୁଷ୍ମାନ ଭାରତ ଓ ସୁଗମ୍ୟ ଭାରତ ଯୋଜନାର ଅଗ୍ରଗତି ସମୀକ୍ଷା
– ଚଳିତ ମୌସୁମୀ ଋତୁରେ ଜଳ ସଂରକ୍ଷଣ ଦିଗରେ ସର୍ବାଧିକ ପ୍ରୟାସ କରିବା ଲାଗି ରାଜ୍ୟଗୁଡ଼ିକୁ ପ୍ରଧାନମନ୍ତ୍ରୀଙ୍କ ଆହ୍ୱାନ
ନୂଆ ଦିଲ୍ଲୀ ୩୧-୭ (ଓଡ଼ିଆ ପୁଅ) ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ସକ୍ରିୟ ପ୍ରଶାସନ ଏବଂ ସମୟୋପଯୋଗୀ କାର୍ଯ୍ୟାନ୍ୱୟନ ଲାଗି ଉଦ୍ଦିଷ୍ଟ ଆଇସିଟି ଆଧାରିତ ବହୁମୁଖୀ ମଂଚ-ପ୍ରଗତି ଜରିଆରେ ୩୦ତମ ସମୀକ୍ଷା ବୈଠକରେ ଅଧ୍ୟକ୍ଷତା କରିଛନ୍ତି।
କେନ୍ଦ୍ର ସରକାରଙ୍କ ନୂତନ କାର୍ଯ୍ୟକାଳର ଏହା ହେଉଛି ପ୍ରଥମ ପ୍ରଗତି ବୈଠକ।
ପୂର୍ବ କାର୍ଯ୍ୟକାଳ ସମୟରେ ୨୯ଟି ପ୍ରଗତି ବୈଠକ ଆୟୋଜନ କରାଯାଇଥିଲା। ଏଥିରେ ୧୨ ଲକ୍ଷ କୋଟି ଟଙ୍କାର ନିବେଶ ସହିତ ୨୫୭ଟି ପ୍ରକଳ୍ପର କ୍ରମବର୍ଦ୍ଧନଶୀଳ ସମୀକ୍ଷା କରାଯାଇଥିଲା। ୪୭ଟି କାର୍ଯ୍ୟକ୍ରମ ଓ ଯୋଜନାର ଅଗ୍ରଗତି ଅନୁଧ୍ୟାନ କରାଯାଇଥିଲା। ୧୭ଟି କ୍ଷେତ୍ର ତଥା ୨୧ଟି ବିଷୟବସ୍ତୁ ଉପରେ ସାଧାରଣ ଅଭିଯୋଗର ସମାଧାନ ମଧ୍ୟ ସମୀକ୍ଷା କରାଯାଇଥିଲା।
ପ୍ରଧାନମନ୍ତ୍ରୀ ଶ୍ରୀ ମୋଦୀ ଆଜି ପ୍ରଧାନମନ୍ତ୍ରୀ ଆବାସ ଯୋଜନା (ସହରାଂଚଳ) ସଂକ୍ରାନ୍ତ ଅଭିଯୋଗଗୁଡ଼ିକର ସମାଧାନ ଦିଗରେ ହୋଇଥିବା ଅଗ୍ରଗତି ସମୀକ୍ଷା କରିଥିଲେ। ୨୦୨୨ ସୁଦ୍ଧା ଯେପରି କୌଣସି ଗୋଟିଏ ପରିବାର ବାସହୀନ ନରୁହନ୍ତି, କେନ୍ଦ୍ର ସରକାରଙ୍କ ଏହି ସଂକଳ୍ପକୁ ପୂରଣ କରିବା ଉପରେ ସେ ରେଖାପାତ କରିଥିଲେ। ଏହି ଲକ୍ଷ୍ୟ ଦିଗରେ ତତ୍ପରତା ପୂର୍ବକ କାର୍ଯ୍ୟ କରିବା ଏବଂ ଏ କ୍ଷେତ୍ରରେ ଆସୁଥିବା ସମସ୍ତ ବାଧା ଦୂର କରିବା ଲାଗି ସେ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଥିଲେ। ଏହାପରେ ପ୍ରଧାନମନ୍ତ୍ରୀ ଆର୍ଥିକ ସେବା ବିଭାଗ ସହ ଜଡ଼ିତ ସାଧାରଣ ଅଭିଯୋଗଗୁଡ଼ିକର ସମୀକ୍ଷା କରିଥିଲେ।
ପ୍ରଧାନମନ୍ତ୍ରୀ ଆୟୁଷ୍ମାନ ଭାରତ ଯୋଜନାର କାର୍ଯ୍ୟାନ୍ୱୟନ ବିସ୍ତୃତ ଭାବେ ସମୀକ୍ଷା କରିଥିଲେ। ଏହି ଅବସରରେ ତାଙ୍କୁ ସୂଚନା ଦିଆଯାଇଥିଲା ଯେ ବର୍ତମାନ ସୁଦ୍ଧା ଏହି ଯୋଜନା ଅନ୍ତର୍ଗତ ୩୫ ଲକ୍ଷ ହିତାଧିକାରୀ ଡାକ୍ତରଖାନାରେ ଭର୍ତି ହୋଇସାରିଛନ୍ତି ଏବଂ ୧୬ ହଜାରରୁ ଊର୍ଦ୍ଧ୍ୱ ଡାକ୍ତରଖାନା ଯୋଜନାରେ ସାମିଲ ହୋଇସାରିଛନ୍ତି। ଏହି ଯୋଜନାର ଶ୍ରେଷ୍ଠ ପ୍ରଚଳନ ଏବଂ ଏଥିରେ ଆହୁରି ଉନ୍ନତି ଆଣିବାରେ ସହାୟକ ହେବା ଲାଗି ରାଜ୍ୟଗୁଡ଼ିକ ସହ ଆଲୋଚନା କରିବା ପାଇଁ ପ୍ରଧାନମନ୍ତ୍ରୀ ଆହ୍ୱାନ କରିଥିଲେ। ଆକାଂକ୍ଷୀ ଜିଲ୍ଲାଗୁଡ଼ିକରେ ଏହି ଯୋଜନାର ଲାଭ ଏବଂ ସକାରାତ୍ମକ ପ୍ରଭାବ ଜାଣିବା ଲାଗି ଏକ ଅଧ୍ୟୟନ କରାଯିବା ଆବଶ୍ୟକ ବୋଲି ସେ କହିଥିଲେ। ଏହି ଯୋଜନାର ସାମୟିକ ଠକେଇ ଏବଂ ଅପବ୍ୟବହାର ରୋକିବା ଲାଗି କ’ଣ ପଦକ୍ଷେପ ନିଆଯାଇଛି ସେ ସମ୍ପର୍କରେ ସେ ଜାଣିବାକୁ ଚାହିଁଥିଲେ।
ସୁଗମ୍ୟ ଭାରତ ଅଭିଯାନର ପ୍ରଗତି ସମୀକ୍ଷା କରି, ପ୍ରଧାନମନ୍ତ୍ରୀ ସର୍ବସାଧାରଣ ସ୍ଥାନରେ ଦିବ୍ୟାଙ୍ଗଜନମାନେ ପ୍ରବେଶ କ୍ଷେତ୍ରରେ ଭୋଗୁଥିବା ଅସୁବିଧା ସମ୍ପର୍କରେ ମତାମତ ସଂଗ୍ରହ କରିବା ଲାଗି ଏକ ବ୍ୟବସ୍ଥା କରିବା ନିମନ୍ତେ ପ୍ରଯୁକ୍ତିର ଉପଯୋଗ ଲାଗି ପରାମର୍ଶ ଦେଇଥିଲେ। ଦିବ୍ୟାଙ୍ଗଜନଙ୍କ ପ୍ରବେଶକୁ ପ୍ରୋତ୍ସାହନ ଦେବା ନିମନ୍ତେ ଜନସାଧାରଣଙ୍କ ଅଧିକ ସମ୍ପୃକ୍ତି ଓ ସମ୍ବେଦନତାର ସମାଧାନ ଖୋଜିବା ପାଇଁ ସେ ଆହ୍ୱାନ କରିଥିଲେ।
ଜଳ ଶକ୍ତିର ଗୁରୁତ୍ୱ ଉପରେ ଜୋର ଦେଇ ପ୍ରଧାନମନ୍ତ୍ରୀ ଚଳିତ ମୌସୁମୀ ଋତୁରେ ଜଳ ସଂରକ୍ଷଣ ପ୍ରତି ବିଶେଷ ଧ୍ୟାନ ଦେବା ଲାଗି ରାଜ୍ୟଗୁଡ଼ିକୁ ଆହ୍ୱାନ କରିଥିଲେ।
ପ୍ରଧାନମନ୍ତ୍ରୀ ରେଳ ଏବଂ ସଡ଼କ କ୍ଷେତ୍ରରେ ଆଠଟି ଗୁରୁତ୍ୱପୂର୍ଣ୍ଣ ଭିତିଭୂମି ପ୍ରକଳ୍ପର ଅଗ୍ରଗତି ସମୀକ୍ଷା କରିଥିଲେ। ବିହାର, ଉତର ପ୍ରଦେଶ, ମଧ୍ୟପ୍ରଦେଶ, ମହାରାଷ୍ଟ୍ର, ଓଡ଼ିଶା, ହିମାଚଳ ପ୍ରଦେଶ ଓ ଗୁଜରାଟରେ ଏହି ପ୍ରକଳ୍ପଗୁଡ଼ିକର କାର୍ଯ୍ୟ ଜାରି ରହିଛି।
