ଭଦ୍ରକ, ୬ା୫ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଧାମନଗର ବ୍ଲକ୍ ଅନ୍ତର୍ଗତ ଧୁଷୁରୀ ସରକାରୀ ହାଇସ୍କୁଲର ବିକାଶ ପାଇଁ ସରକାରଙ୍କ ମୋ ସ୍କୁଲ ଅଭିଯାନକୁ ପୁରାତନ ଛାତ୍ର ଗୋପବନ୍ଧୁ ନଗର ହାଇସ୍କୁଲର ଅବସରପ୍ରାପ୍ତ ବିଜ୍ଞାନ ଶିକ୍ଷକ ପରମାନନ୍ଦ ନାୟକ ଏକଲକ୍ଷ ଟଙ୍କା ପ୍ରଦାନ କରିଛନ୍ତି । ଏହି ଅବସରରେ ଅବସରପ୍ରାପ୍ତ ବିଜ୍ଞାନ ଶିକ୍ଷକ ଶ୍ରୀ ନାୟକ ଓ ଧୁଷୁରୀ ସରକାରୀ ହାଇସ୍କୁଲର ପ୍ରଧାନ ଶିକ୍ଷୟିତ୍ରୀ ସୁଜାତା ମହାନ୍ତି ଜିଲାପାଳ ସିଦ୍ଧେଶ୍ୱର ବଳିରାମ ବୋନ୍ଦରଙ୍କୁ ଭେଟିଥିଲେ । ଏହି ଏକଲକ୍ଷ ଟଙ୍କାର ଡୋନେସନକୁ ଅନଲାଇନ୍ ଜରିଆରେ ପଠାଇବା ପାଇଁ ଜିଲାପାଳ ଶ୍ରୀ ନାୟକଙ୍କୁ ପରାମର୍ଶ ଦେଇଥିଲେ । ପ୍ରକାଶଯୋଗ୍ୟ ଗୋପବନ୍ଧୁ ନଗର ହାଇସ୍କୁଲର ଅବସରପ୍ରାପ୍ତ ଶିକ୍ଷକ ପରମାନନ୍ଦ ନାୟକ ଧୁଷୁରୀ ହାଇସ୍କୁଲ ପରିସରରେ ଥିବା ଏମଇ ସ୍କୁଲର ଛାତ୍ର ଥିଲେ । ଆଜିପର୍ଯ୍ୟନ୍ତ ଯେତେ ଆଲୁମନି ସ୍କୁଲର ବିକାଶ ପାଇଁ ଅର୍ଥ ଦାନ କରିଛନ୍ତି, ଶ୍ରୀ ନାୟକଙ୍କ ଦାନ ସର୍ବାଧିକ ବୋଲି ଧୁଷୁରୀ ସରକାରୀ ହାଇସ୍କୁଲର ପ୍ରଧାନ ଶିକ୍ଷୟିତ୍ରୀ ସୁଜାତା ମହାନ୍ତି ମତପ୍ରକାଶ କରିଛନ୍ତି । ବିଦ୍ୟାଳୟ ତରଫରୁ ସେ ଶ୍ରୀ ନାୟକଙ୍କୁ କୃତଜ୍ଞତା ଜ୍ଞାପନ କରିଛନ୍ତି । ଅନ୍ୟପକ୍ଷରେ ଆଲୁମନି / ପୁରାତନ ଛାତ୍ର ଶ୍ରୀ ନାୟକ କୁହନ୍ତି ଛାତ୍ରମାନଙ୍କ ଶିକ୍ଷାଦାନ ବ୍ୟବସ୍ଥାର ଉନ୍ନତି ପାଇଁ ମୋର ପ୍ରୟାସ ଥିଲା । ତେବେ ସୀମିତ ଦରମାରେ ମୋର ଏହି ପ୍ରୟାସକୁ ସାକାର କରିପାରୁନଥିଲି । ଅବସର ପରେ ମିଳିଥିବା ପେନସନ ଅର୍ଥର ନିଜ ଖର୍ଚ୍ଚ କାଟ କରି ଶିକ୍ଷାଦାନ ବ୍ୟବସ୍ଥାର ଉନ୍ନତି ତଥା ସ୍ମାର୍ଟ କ୍ଲାସ୍ ପାଇଁ ଏହି ଅର୍ଥଦାନ ଦେଇ ମୋର ଲକ୍ଷ୍ୟ ପୂରଣ କରିଛି । ଏଥିପାଇଁ ମୁଁ ବେଶ୍ ଆନନ୍ଦିତ । ଆଗକୁ ମଧ୍ୟ ଏହି ପ୍ରୟାସ ଜାରି ରହିବ ବୋଲି ସେ କହିଛନ୍ତି ।
