ଭଦ୍ରକ, ୨୭ା୯ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକ ଜିଲା ଭଣ୍ଡାରିପୋଖରୀ ବ୍ଲକ ନପଙ୍ଗ ପଞ୍ଚାୟତ ମହାତ୍ମା ଗାନ୍ଧି ନିଶ୍ଚିତ କର୍ମ ନିଯୁକ୍ତି ଯୋଜନାରେ କାର୍ଯ୍ୟକାରୀ ହେଉଥିବା ‘ଚଣ୍ଡିମନ୍ଦିର ନିକଟ ଗ୍ରାମ୍ୟ ପାର୍କରେ ମାଟି ପୋତେଇ ଓ ଚତୁଃପାଶ୍ୱର୍ର ଉନ୍ନତିକରଣ’ ପ୍ରକଳ୍ପରେ ଜେସିବି ମେସିନ ସହାୟତାରେ ଘରୋଇ ଜମିରେ ମାଟି ପକାଇ ବିଲ୍ କରାଯିବା ମସୁଧା ହୋଇଛି ବୋଲି ଗ୍ରାମବାସୀମାନେ ଅଭିଯୋଗ କରିଛନ୍ତି । ୨୦୨୨-୨୩ ଆର୍ଥୀକ ବର୍ଷର ୯ଲକ୍ଷ ୯୦ ହଜାର ଟଙ୍କାର ଏହି ପ୍ରକଳ୍ପର ସୂଚନା ଫଳକରେ ପ୍ରକଳ୍ପର କୋଡ ନମ୍ବର ଉଲ୍ଲେଖ କରାଯାଇ ନାହିଁ । ଚଣ୍ଡିମନ୍ଦିର ପାଶ୍ୱର୍ର ଘରୋଇ ଜମିରେ ଜେସିବି ମେସିନ ସହାୟତାରେ ମାଟି ପକାଯାଇଛି । ଏ ସମ୍ପର୍କରେ ଗ୍ରାମବାସୀ ସୁଧିର ନାୟକ, ବିଷ୍ଣୁଚରଣ ନାୟକ, ହରିହର ମିଶ୍ର ପ୍ରମୁଖ ବିଡିଓଙ୍କ ନିକଟରେ ଅଭିଯୋଗ କରିଥିଲେ । ଅଭିଯୋଗର ସତ୍ୟତା ଜଣାପଡିବା ପରେ ବିଲ ପୈଠ ବନ୍ଦ କରାଯାଇଥିଲା । ଏବେ ପୁନର୍ବାର ଏହାର ବିଲ ପୈଠ ପାଇଁ ଫାଇଲ ମଗାଯାଇଥିବା ଜଣାପଡିବା ପରେ ଗ୍ରାମବାସୀଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି । ଏଥି ପୂର୍ବରୁ ସମାନ ଅଭିଯୋଗ ଥିବା ୨୦୨୨-୨୩ ଆର୍ଥୀକ ବର୍ଷରେ ପୋଖରୀ ନିକଟରେ ଥିବା ନପଙ୍ଗ କଲ୍ୟାଣମଣ୍ଡପର ଉନ୍ନତିକରଣ ପାଇଁ ବିଲ୍ ବନ୍ଦ କରାଯିବାର ୨ ମାସ ପରେ ରାଜନୈତିକ ଚାପ ପ୍ରୟୋଗ କରାଯାଇ ବିଲ ପୈଠ ପାଇଁ ପ୍ରକ୍ରିୟା ଆରମ୍ଭ କରାଯାଇଛି । ୩ ମହଲା କୋଠାଘର ଥିବା ଗ୍ରାମର ଏକ ନିଦ୍ଦିଷ୍ଟ ବାହୁବଳୀ ପରିବାର ବହୁବାର ଉଦ୍ୟମ କରୁଥିବା ଅଭିଯୋଗ ହୋଇଛି । ମାତ୍ର ଏଭଳି ଦୁର୍ନୀତି ସପକ୍ଷବାଦୀ କାର୍ଯ୍ୟ ବ୍ଲକସ୍ତରରେ ଅନାୟାସରେ କରାଯିବା ଦ୍ୱାରା ବ୍ଲକ ପ୍ରଶାସନର ସାଧୁତା ନେଇ ଅଙ୍ଗୁଳି ନିର୍ଦ୍ଦେଶ କରାଯାଇଛି । ପଞ୍ଚାୟତର ପୂର୍ବତନ ସରପଞ୍ଚ ପରିବାର ଓ ଏବର ସରପଞ୍ଚପରିବାର ପରସ୍ପର ସହ ହାତମିଳାଇ ବିଲ ହାତେଇବା ପାଇଁ ପ୍ରତିଦ୍ୱନ୍ଦିତା କରୁଛନ୍ତି ବୋଲି ଜଣାଯାଇଛି । ଘଟଣା ସମ୍ପର୍କରେ ଅନୁଧ୍ୟାନ କରାଯିବ ବୋଲି ବିଡିଓ ଦେବଦତ୍ତ ସାହୁ ମତପ୍ରକାଶ କରିଛନ୍ତି ।
