ନୂଆ ଦିଲ୍ଲୀ ୮-୭ (ଓଡ଼ିଆ ପୁଅ) ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଜାପାନର ପୂର୍ବତନ ପ୍ରଧାନମନ୍ତ୍ରୀ ସିଞ୍ଜୋ ଆବେଙ୍କ ନିଧନରେ ଗଭୀର ଶୋକ ପ୍ରକାଶ କରିଛନ୍ତି। ଏହି ଅବସରରେ ଜାପାନର ପୂର୍ବତନ ପ୍ରଧାନମନ୍ତ୍ରୀଙ୍କ ଉଦ୍ଦେଶ୍ୟରେ ଶ୍ରୀ ମୋଦୀ କହିଛନ୍ତି ଯେ ସିଞ୍ଜୋ ଆବେ – ଜାପାନର ଜଣେ ବିଶିଷ୍ଟ ନେତା, ଜଣେ ବିଶ୍ୱସ୍ତରୀୟ ରାଜନୀତିଜ୍ଞ ତଥା ଭାରତ-ଜାପାନ ବନ୍ଧୁତ୍ୱର ଜଣେ ମହାନ ଉଦ୍ୟୋକ୍ତା ଥିଲେ –ସେ ଆଉ ଆମ ଗହଣରେ ନାହାଁନ୍ତି। ଜାପାନ ଏବଂ ବିଶ୍ୱ ଏକ ମହାନ ଦୂରଦୃଷ୍ଟି ସମ୍ପନ୍ନ ବ୍ୟକ୍ତିଙ୍କୁ ହରାଇଛି ଏବଂ ମୁଁ ଜଣେ ପ୍ରିୟ ବନ୍ଧୁଙ୍କୁ ହରାଇଛି।
ଶ୍ରୀ ମୋଦୀ କହିଛନ୍ତି ଯେ ଗୁଜୁରାଟର ମୁଖ୍ୟମନ୍ତ୍ରୀ ଭାବରେ ଜାପାନ ଗସ୍ତ ସମୟରେ ମୁଁ ତାଙ୍କୁ ପ୍ରଥମେ ୨୦୦୭ ରେ ଭେଟିଥିଲି। ସେହି ପ୍ରଥମ ବୈଠକରୁ ଆମର ବନ୍ଧୁତା ଆରମ୍ଭ ହୋଇ ପରବର୍ତ୍ତୀ ସମୟରେ ସରକାରୀ ପ୍ରୋଟ୍ରୋକଲର ସୀମା ଅତିକ୍ରମ କରିଥିଲା।
କୋଟୋରେ ଥିବା ଟୋଜି ମନ୍ଦିର ପରିଦର୍ଶନ, ଶିଙ୍କାନସେନକୁ ଆମର ଟ୍ରେନ୍ ଯାତ୍ରା, ଅହମ୍ମଦାବାଦର ସାବରମତି ଆଶ୍ରମ, କାଶୀରେ ଗଙ୍ଗା ଆଳତୀ, ଟୋକିଓରେ ବିସ୍ତୃତ ଚା ପାନ ସମାରୋହ, ଆମର ସ୍ମରଣୀୟ ଏବଂ ପାରସ୍ପରିକ ସମ୍ପର୍କର ତାଲିକା ପ୍ରକୃତରେ ଦୀର୍ଘ ଅଟେ। ୨୦୦୭ ରୁ ୨୦୧୨ ମଧ୍ୟରେ ଯେତେବେଳେ ସେ ଜାପାନର ପ୍ରଧାନମନ୍ତ୍ରୀ ନଥିଲେ, ଏବଂ ୨୦୨୦ ପରେ ମଧ୍ୟ, ଆମର ବ୍ୟକ୍ତିଗତ ବନ୍ଧୁତା ପୂର୍ବପରି ଦୃଢ ରହିଥିଲା। ଆବେ ସାନଙ୍କ ସହିତ ପ୍ରତ୍ୟେକ ସାକ୍ଷାତ ବୌଦ୍ଧିକ ଏବଂ ଉତ୍ସାହଜନକ ଥିଲା। ସେ ସର୍ବଦା ନୂତନ ଚିନ୍ତାଧାରା ଏବଂ ଶାସନ, ଅର୍ଥନୀତି, ସଂସ୍କୃତି, ବୈଦେଶିକ ନୀତି ଏବଂ ଅନ୍ୟାନ୍ୟ ବିଷୟ ଉପରେ ଅଗାଧ ଜ୍ଞାନରେ ପରିପୂର୍ଣ୍ଣ ଥିଲେ। ଗୁଜୁରାଟ ପାଇଁ ମୋର ବିକାଶ ଲକ୍ଷ୍ୟରେ ତାଙ୍କର ପରାମର୍ଶ ମୋତେ ପ୍ରେରଣା ଦେଲା ଏବଂ, ଜାପାନ ସହିତ ଗୁଜରାଟର ସହଭାଗିତା ଗଠନରେ ତାଙ୍କର ସମର୍ଥନ ଗୁରୁତ୍ୱପୂର୍ଣ୍ଣ ଥିଲା।
ପରେ, ଭାରତ ଏବଂ ଜାପାନ ମଧ୍ୟରେ ରଣନୀତିକ ଭାଗିଦାରୀରେ ଏକ ଅଦ୍ୱିତୀୟ ରୂପାନ୍ତର ଆଣିବା ପାଇଁ ତାଙ୍କ ସହ କାମ କରିବା ମୋର ସୌଭାଗ୍ୟର ବିଷୟ। ଏକ ସଂକୀର୍ଣ୍ଣ, ଦ୍ୱିପାକ୍ଷିକ ଅର୍ଥନୈତିକ ସମ୍ପର୍କରୁ, ଆବେ ସାନ୍ ଏହାକୁ ଏକ ବ୍ୟାପକ, ବିସ୍ତୃତ ରୂପରେ ପରିଣତ କରିବାରେ ସାହାଯ୍ୟ କରିଥିଲେ, ଯାହା କେବଳ ଜାତୀୟ ପ୍ରୟାସର ପ୍ରତ୍ୟେକ କ୍ଷେତ୍ରକୁ ଆଚ୍ଛାଦନ କରିନଥିଲା, ବରଂ ଆମର ଦୁଇ ଦେଶ ତଥା ଅଞ୍ଚଳର ସୁରକ୍ଷା ପାଇଁ ପ୍ରମୁଖ ଭୂମିକା ଗ୍ରହଣ କରିଥିଲା। ଆମର ଦୁଇ ଦେଶ ତଥା ବିଶ୍ୱର ଲୋକଙ୍କ ପାଇଁ ଏହା ସବୁଠାରୁ ଗୁରୁତ୍ୱପୂର୍ଣ୍ଣ ସମ୍ପର୍କ ଥିଲା। ସେ ଭାରତ ସହିତ ବେସାମରିକ ଆଣବିକ ଚୁକ୍ତି ପାଳନ କରିବାରେ ସଂକଳ୍ପବଦ୍ଧ ଥିଲେ – ତାଙ୍କ ଦେଶ ପାଇଁ ସବୁଠାରୁ କଷ୍ଟସାଧ୍ୟ – ଏବଂ ଭାରତରେ ହାଇ ସ୍ପିଡ୍ ରେଳ ପାଇଁ ସବୁଠାରୁ ଉଦାର ସର୍ତ୍ତ ପ୍ରଦାନ କରିବାରେ ସେ ର୍ନିଣ୍ଣାୟକ ଥିଲେ। ସେ ନିଶ୍ଚିତ କରିଛନ୍ତି ଯେ ନୂତନ ଭାରତର ଅଭିବୃଦ୍ଧି ଯାତ୍ରାରେ ଜାପାନ ଭାରତ ସହିତ ରହିଛି। ଭାରତ-ଜାପାନ ସମ୍ପର୍କରେ ତାଙ୍କର ଅବଦାନ ପାଇଁ ୨୦୨୧ ମସିହାରେ ସମ୍ମାନଜନକ ପଦ୍ମଭୂଷଣ ପ୍ରଦାନ କରାଯାଇଥିଲା।
ବିଶ୍ୱରେ ଘଟୁଥିବା ଜଟିଳ ତଥା ଏକାଧିକ ପରିବର୍ତ୍ତନ ସମ୍ପର୍କରେ ଆବେ ସିଂଜୋଙ୍କର ଗଭୀର ଜ୍ଞାନ ଥିଲା। ରାଜନୀତି, ସମାଜ, ଅର୍ଥନୀତି ଏବଂ ଆନ୍ତର୍ଜାତୀୟ ସମ୍ପର୍କ ଉପରେ ଏହାର ପ୍ରଭାବ ଦେଖିବା ଓ ପରଖିବା ପାଇଁ ତାଙ୍କର ଏକ ନିଆରା ଦୃଷ୍ଟିକୋଣ ରହିଥିଲା। ସ୍ପଷ୍ଟ ଏବଂ ର୍ନିଭୀକ ନିଷ୍ପତ୍ତି ନେବାର କ୍ଷମତା ଏବଂ ତାଙ୍କ ଲୋକ ଏବଂ ବିଶ୍ୱକୁ ତାଙ୍କ ସହିତ ନେବାର ବିରଳ କ୍ଷମତା ଥିଲା ତାଙ୍କର ସୁଦୂର ପ୍ରସାରୀ।
୨୦୦୭ ରେ ସେ ଭାରତୀୟ ସଂସଦକୁ ଦେଇଥିବା ଭାଷଣରେ ଭାରତ ପ୍ରଶାନ୍ତ ମହାସାଗରୀୟ କ୍ଷେତ୍ରର ଏକ ସମସାମୟିକ ରାଜନୈତିକ, ରଣନୈତିକ ଏବଂ ଅର୍ଥନୈତିକ ବାସ୍ତବତା ଭାବରେ ଉଭା ହେବା ପାଇଁ ଭିତ୍ତିପ୍ରସ୍ତର ସ୍ଥାପନ କରିଥିଲେ – ଏକ ଅଞ୍ଚଳ ଯାହା ଏହି ଶତାବ୍ଦୀରେ ବିଶ୍ୱକୁ ମଧ୍ୟ ମାର୍ଗଦର୍ଶନ କରିବ।
ଏହି କ୍ଷେତ୍ରର ସ୍ଥିର ତଥା ନିରାପଦ, ଶାନ୍ତିପୂର୍ଣ୍ଣ ତଥା ସମୃଦ୍ଧ ଭବିଷ୍ୟତ ପାଇଁ ଏକ ଲକ୍ଷ୍ୟ ର୍ନିମାଣରେ ସେ ନେତୃତ୍ୱ ନେଇଥିଲେ। ସାର୍ବଭୌମତ୍ୱ ଏବଂ ଆଞ୍ଚଳିକ ଅଖଣ୍ଡତା, ଆନ୍ତର୍ଜାତୀୟ ଆଇନ ଏବଂ ନିୟମ ମାନିବା, ଆନ୍ତର୍ଜାତୀୟ ସ୍ତରରେ ଶାନ୍ତିପୂର୍ଣ୍ଣ ଆଚରଣ; ସମାନତାର ଭାବନାରେ ସମ୍ପର୍କ ଏବଂ ଗଭୀର ଅର୍ଥନୈତିକ ଯୋଗଦାନ ମାଧ୍ୟମରେ ସମୃଦ୍ଧତା ସପକ୍ଷରେ ତାଙ୍କର ମତ ଥିଲା।
ଆମେ ଭାରତୀୟମାନେ ତାଙ୍କର ନିଧନରେ ଶୋକ ପ୍ରକଟ କରୁଛୁ। ଯେପରି ସେ ଆମକୁ ଖୋଲା ହୃଦୟରେ ଆଲିଙ୍ଗନ କରିଥିଲେ, ତାହା ଅବିସ୍ମରଣୀୟ।
ମୁଁ ଭାରତର ଜନସାଧାରଣଙ୍କ ତରଫରୁ ଜାପାନବାସୀ ବିଶେଷ କରି ଶ୍ରୀମତୀ ଆକି ଆବେ ଏବଂ ତାଙ୍କ ପରିବାରବର୍ଗଙ୍କୁ ହୃଦୟରୁ ସମବେଦନା ଜଣାଉଛି। ଓମ୍ ଶାନ୍ତି।
