ଭଦ୍ରକ, ୨୮ା୧୦ (ଓଡିଆ ପୁଅ / ସ୍ନିଗ୍ଧା ରାୟ)-ଏହି ଜିଲାର ବନ୍ତ ବ୍ଲକ ଅଣିଜୋ ପଞ୍ଚାୟତ ଯଶୋବନ୍ତପୁର ଗ୍ରାମର ବାମଦେବ ଯେନା ଏକ ସାଇକେଲ ମରାମତି ଦୋକାନ କରି ନିଜ ପରିବାର ପ୍ରତିପୋଷଣ କରନ୍ତି । ତେବେ ପୂର୍ବ ଆକ୍ରୋଶ ରଖି କିଛି ଦୁବୃର୍ତ ଗତକାଲି ବିଳମ୍ବିତ ରାତ୍ରରେ ଦୋକାନରେ ନିଆଁ ଲଗାଇ ଦେବାରୁ ସେ ସର୍ବଶ୍ରାନ୍ତ ହୋଇଯାଇଛନ୍ତି । ସୂଚନା ମୂଳେ ବାମଦେବ ନିଜ ପଞ୍ଚାୟତ ସୀମା ଓ ଚାରିଗାଁ ପଞ୍ଚାୟତର ସୀମାବର୍ତ୍ତୀ କୁଆଁଶମଢିଆ- କାଉପୁର ପୂର୍ତ୍ତବିଭାଗ ରାସ୍ତା ପାଶ୍ୱର୍ରେ ଜାଗା କିଣି ଚାଷ କରିବା ସହିତ ରାସ୍ତା ପାଶ୍ୱର୍ରେ ସାଇକେଲ ମରାମତି ଦୋକାନ କରିଛନ୍ତି । ତେବେ ତାଙ୍କ ସୀମାକୁ ଲାଗି ଚାରିଗାଁ ପଞ୍ଚାୟତ ଚାରିଗାଁ ଗ୍ରାମର ଗଣେଶ ଯେନାଙ୍କ ବାସ ଗୃହ ରହିଛି । ସେଠାରେ ଦୋକାନ ଗୃହକୁ ଗଣେଶ ବିରୋଧ କରି ଆସୁଥିଲା । ଏନେଇ ଗତକାଲି ସନ୍ଧ୍ୟାରେ ବାମଦେବ ଓ ତାଙ୍କ ସ୍ତ୍ରୀ ଗୀତାରାଣୀ ଦୋକାନ ରେ ଥିବା ବେଳେ ଗଣେଶ ସେଠାରେ ପହଞ୍ଚି ତାଙ୍କୁ ବିଭିନ୍ନ ଆଶାଳୀନ ଭାଷାରେ ଗାଳି ଗୁଲଜ କରିବା ସହିତ ଧକ୍କା ହାବୁକା ମାରି, ଦୋକାନ ପୋଡ଼ି ସେଠାରୁ ଉଠାଇ ଦେବାକୁ ଧମକ ଦେଇଥିଲେ । ବିଳମ୍ବିତ ରାତ୍ରରେ ଦୋକାନଘର ପୋଡ଼ି ଯାଇଥିବାରୁ ଗଣେଶ ଆକ୍ରୋଶ ମୂଳକ ଭାବେ ତାଙ୍କ ଦୋକାନ ପୋଡ଼ିଛନ୍ତି ବୋଲି ଗୀତାରାଣୀ ଏତଲାରେ ଦର୍ଶାଇଛନ୍ତି । ଆଗରପଡ଼ାରୁ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିବା ବେଳେ ତାଙ୍କ ଦୋକାନର ଲକ୍ଷାଧିକ ଟଙ୍କାର ଜିନିଷ ପୋଡ଼ି ଯାଇଛି ବୋଲି ଅଭିଯୋଗରେ ଦର୍ଶାଯାଇଛି । ଏପରି ଅମାନବୀୟ କାର୍ଯ୍ୟକୁ ଗ୍ରାମବାସୀ ନିନ୍ଦା କରିବା ସହିତ ଦୋଷୀଙ୍କ ବିରୁଦ୍ଧେ ଦୃଢ କାର୍ଯ୍ୟାନୁଷ୍ଠାନ ନେବାକୁ ଦାବୀ କରିଛନ୍ତି ।
