ଭଦ୍ରକ, ୧୦ା୬ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଗତକାଲି ବିଳମ୍ବିତ ରାତିରେ ଏହି ଜିଲାର ଭଦ୍ରକ ଗ୍ରାମାଞ୍ଚଳ ଥାନା ଅଧୀନସ୍ଥ ବେନ୍ତାଳ ଗ୍ରାମରେ ଦୁଇଜଣଙ୍କ ଘରୁ ଚୋରମାନେ କଳାକନା ବୁଲାଇଛନ୍ତି । ପ୍ରାପ୍ତ ଖବରରୁ ଯାହା ଜଣାଯାଏ ଭଦ୍ରକ ଗ୍ରାମାଞ୍ଚଳ ଥାନା ଅଧୀନସ୍ଥ ବେନ୍ତାଳ ଗ୍ରାମରେ ଗତକାଲି ରାତିରେ ଦୁଇଜଣ ସଂଖ୍ୟାଲଘଙ୍କ ଘରୁ ଚୋରମାନେ କବାଟ ତାଡି ଲକ୍ଷାଧିକ ଟଙ୍କାର ସୁନାଗହଣା ଓ ଆସବାବ ପତ୍ର ଚୋରି କରିନେଇଛନ୍ତି । ଯାହା ଜଣାଯାଏ ଘରଲୋକେ ଶୋଇଥିବାବେଳେ ଚୋରମାନେ କବାଟ ତାଡି ଗଚ୍ଛିତ ଥିବା ସୁନାଗହଣା, ଟଙ୍କା ଓ ଆସବାବ ପତ୍ର ଚୋରିକରି ବାକ୍ସଗୁହିକ ବାହାରେ ତାଲାଭଙ୍ଗା ଅବସ୍ଥାରେ ପକାଇ ଫେରାର ହୋଇଯାଇଛନ୍ତି । ଭୋର୍ ସମୟରେ ଗ୍ରାମବାସୀମାନେ ଏହି ଦୁଇଟି ପରିବାରର ମୁଖ୍ୟ ଫାଟକ ଖୋଲାଥିବା ସହ ଘରୋଇ ଜିନିଷ ଭଙ୍ଗା ବାକ୍ସ ସହ ବାହାରେ ପଡିଥିବାର ଦେଖିଥିଲେ । ପରେ ଘରଲୋକେ ଉଠି ସର୍ବସ୍ୱାନ୍ତ ହୋଇଥିବାର ଜାଣିବାକୁ ପାଇଥିଲେ । ଏ ସଂପର୍କରେ ଗ୍ରାମାଞ୍ଚଳ ଥାନାରେ ମାମଲା ରୁଜୁ ହୋଇ ତଦନ୍ତ ଚାଲୁରହିଛି ।
