ନୂଆଦିଲ୍ଲୀ ମଇ ୧୮ (ଓଡ଼ିଆ ପୁଅ) : ଗୁଜୁରାଟ ସମେତ ପଶ୍ଚିମ ଭାରତର ବିଭିନ୍ନ ରାଜ୍ୟ ତଟରେ ସାମୁଦ୍ରିକ ଝଡ଼ ତାଉତେ ତାଣ୍ଡବ ରଚିବା ସହ ଅନେକ ବିଦ୍ୟୁତ୍ ଖୁଣ୍ଟ ଏବଂ ଗଛକୁ ଉପାଡ଼ି ଦେଇଛି। ରାସ୍ତାଘାଟ ଗଛ ଭାଙ୍ଗି ଅବରୋଧ ହୋଇଛି। ପ୍ରବଳ ବର୍ଷାରେ ଅନେକ ସ୍ଥାନରେ ବନ୍ୟା ଦେଖାଯାଇଛି। ଭାରତ ପାଣିପାଗ ବିଭାଗ ସୂଚନା ଦେଇଛି ଯେ ଏହି ଘୂର୍ଣ୍ଣିବଳୟ ଲ୍ୟାଣ୍ଡଫଲ କରିବା ପରେ ଲ୍ୟାଣ୍ଡଫଲ ପ୍ରକ୍ରୀୟା ଜାରି ରହିଛି କିନ୍ତୁ ଧିରେ ଧିରେ ଏହା ଦୁର୍ବଳର ଧାରା ଦେଖାଇବା ଆରମ୍ଭ କରିଛି।
“ଅତ୍ୟଧିକ ଭୟଙ୍କର” ସାମୁଦ୍ରିକ ଝଡ଼ ତାଉକତେ ଘୂର୍ଣ୍ଣିବଳୟ ସୃଷ୍ଟି କରିଥିଲା ଯାହା ଫଳରେ ଘଣ୍ଟାକୁ ପ୍ରାୟ ୧୯୦ କିଲୋମିଟର ବେଗରେ ପବନ ବହିଥିଲା। ଏହି ଘୂର୍ଣ୍ଣିବଳୟ ଗୁଜୁରାଟର ତଟରେ ଅବତରଣ କରିଥିଲା, ଅନେକ ବିଦ୍ୟୁତ୍ ଖୁଣ୍ଟ, ମୋବାଇଲ୍ ଟାୱାର ଏବଂ ଗଛଗୁଡିକୁ ଉପାଡ଼ି ନଷ୍ଟ କରି ଦେଇଛି। କେତେକ ସ୍ଥାନରେ ଗଛଭାଙ୍ଗିବା ଫଳରେ ଘର, କାନ୍ଥ ଭାଙ୍ଗି ପଡ଼ିଛି।
ପାଣିପାଗ ବିଭାଗ ପକ୍ଷରୁ ଏକ ଟୁଇଟ୍ରେ କୁହାଯାଇଛିଯେ,, “ଝଡ଼ ତାଉତେ, ଦୁର୍ବଳ ଧାରା ଦେଖାଇବା ଜାରି ରଖିଛି। ଆଖି ଅପସାରିତ ହେଉଛି, ବାଦଲ ମଧ୍ୟ ଦୁର୍ବଳ ହେଉଛି।”
ଏହାର ପ୍ରଭାବରେ ଉତ୍ତରପ୍ରଦେଶ ଏବଂ ରାଜସ୍ଥାନରେ ଅନେକ ସ୍ଥାନରେ ଆସନ୍ତା ଦୁଇ ଘଣ୍ଟା ମଧ୍ୟରେ ବର୍ଷା ହେବାର ସମ୍ଭାବନା ରହିଛି।
ଆସନ୍ତା ୨ ଘଣ୍ଟା ମଧ୍ୟରେ ହୋଡାଲ୍, ଔରଙ୍ଗାବାଦ, ମେହମ୍, ଭବାନୀ, ଲୋହରୁ, ବାୱାଲ୍ (ହରିୟାଣା), ବାଇନା, ମେହେନ୍ଦିପୁର, ମହୱା, ଡାଉସା, କୋଟପୁଟଲି, ଲାଚମାନଗର, ରାଜଗଡ଼, ଅଲୱାର୍, ନାଗର, ନାଡବାଇ (ରାଜସ୍ଥାନ) ଏବଂ ଏହାର ଆଖପାଖ ଅଞ୍ଚଳରେ ବର୍ଷା ହେବାର ସମ୍ଭାବନା ରହିଛି।
ଏହା ପ୍ରଭାବରେ ଆଜି ଫିରୋଜାବାଦ, ହାଥରସ୍, ନାରୋରା, ରାୟା, ଇଗ୍ଲାସ୍, ଆଲିଗଡ, ଅତ୍ରାଉଲି, କାଶଗଞ୍ଜ, ମଥୁରା, ସାହସୱାନ୍, ଇଟାୱା, ନନ୍ଦଗାଓଁ, ବାରସାନା, ଜାହାଙ୍ଗିରାବାଦର ବିଚ୍ଛିନ୍ନ ସ୍ଥାନ ଉପରେ ହାଲୁକା ରୁ ମଧ୍ୟମ ଧରଣର ବର୍ଷା ହେବ। ବୋଲି ପାଣିପାଗ ବିଭାଗ ସୂଚନା ଦେଇଛି।
ଘୂର୍ଣ୍ଣିବଳୟ ତାଉକତେକୁ ଦୃଷ୍ଟିରେ ରଖି ଗୁଜୁରାଟର ମୁଖ୍ୟମନ୍ତ୍ରୀ ବିଜୟ ରୂପାନୀ ଗତକାଲି ବିଳମ୍ବିତ ରାତିରେ ଗାନ୍ଧିନଗରର ରାଜ୍ୟ ନିୟନ୍ତ୍ରଣ କକ୍ଷରେ ଭାଲସାଦ ଏବଂ ଗିର୍ ସୋମନାଥ ଉପକୂଳବର୍ତ୍ତୀ ଜିଲ୍ଲା ଅଧିକାରୀଙ୍କ ସହ ଏକ ବୈଠକ କରିଥିଲେ।
ଗୁଜୁରାଟର ବରୋଦରାସ୍ଥିତ COVID କେୟାର ସେଣ୍ଟରର ରୋଗୀଙ୍କୁ ଗତକାଲି ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା।
ଏଥିସହ ଗୁଜୁରାଟର ସୋମନାଥ ଜିଲ୍ଲା ଏବଂ ୟୁନିଅନ ଟେରିଟୋରୀ ଅଫ୍ ଡିୟୁ (ଡାମନ୍ ଆଣ୍ଡ ଡିୟୁ) ମଧ୍ୟରେ ଥିବା ରାସ୍ତାରେ ଗଛଗୁଡିକ ଭାଙ୍ଗି ପଡ଼ିଥିଲା ଯାହାଫଳରେ ଯାତାୟତରେ ଅବରୋଧ ହୋଇଥିଲା। NDRF ଟିମ୍ ମଧ୍ୟ ମୁମ୍ବାଇର ଡାହିସର ଅଞ୍ଚଳରେ ପଡିଥିବା ଗଛ ଏବଂ ଡାଳ ଗୁଡ଼ିକୁ ରାସ୍ତାରୁ ସଫା କରିଛି।
ମଙ୍ଗଳବାର ଦିନ ଭାରତ ପାଣିପାଗ ବିଭାଗ ଅନୁଯାୟୀ ‘ଅତ୍ୟଧିକ’ ଭୟଙ୍କର ସାମୁଦ୍ରିକ ଝଡ, ତାଉକତେ ବର୍ତ୍ତମାନ ଦୁର୍ବଳ ହେବାରେ ଲାଗିଛି।
ସୋମବାର ରାତିରେ ଏକ ଶକ୍ତିଶାଳୀ ସାମୁଦ୍ରିକ ଝଡ଼ ଦେଶର ପଶ୍ଚିମ ଉପକୂଳକୁ ଆଘାତ କରି ଗୁଜୁରାଟରେ ଅବତରଣ କରିଛି ଏବଂ ଏହି ପ୍ରକ୍ରିୟା ତିନି ଘଣ୍ଟା ପର୍ଯ୍ୟନ୍ତ ଜାରି ରହିବ ବୋଲି କହିଥିଲା ପାଣିପାଗ ବିଭାଗ। ତେବେ କର୍ତ୍ତୃପକ୍ଷ ହଜାର ହଜାର ଲୋକଙ୍କୁ ସ୍ଥାନାନ୍ତର କରିଥିବା ଜଣାପଡ଼ିଛି।
ଗୋଆ ମୁଖ୍ୟମନ୍ତ୍ରୀ ଡଃ ପ୍ରମୋଦ ସାୱନ୍ତ ସୋମବାର କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କ ସହ ରାଜ୍ୟରେ ତାଉତେର ପ୍ରଭାବ ଏବଂ କ୍ଷତି ସମ୍ପର୍କରେ କହିଛନ୍ତି।
ଗୋଆ ସିଏମ୍ ଏକ ଟୁଇଟ୍ରେ କହିଛନ୍ତି ଯେ, ଗୋଆରେ ‘ତାଉକତେ’ ଦ୍ୱାରା ହୋଇଥିବା ପ୍ରଭାବ ଏବଂ କ୍ଷତି ସମ୍ପର୍କରେ କେନ୍ଦ୍ର ଗୃହମନ୍ତ୍ରୀ ଶ୍ରୀ ଅମିତାଶ ଜୀଙ୍କୁ କହିଛନ୍ତି।
ସେ ଆହୁରି ମଧ୍ୟ କହିଛନ୍ତି ଯେ ଗୃହମନ୍ତ୍ରୀ କ୍ଷୟକ୍ଷତି ସମ୍ପର୍କରେ ପଚାରି ବୁଝିଛନ୍ତି ଏବଂ ରାଜ୍ୟକୁ ସମ୍ପୂର୍ଣ୍ଣ ସମର୍ଥନ କରିବେ ବୋଲି କହିଛନ୍ତି।
କେନ୍ଦ୍ର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଏକ ବୈଠକ କରି ସାମୁଦ୍ରିକ ଝଡ଼ ତାଉତେରୁ ସୃଷ୍ଟି ହୋଇଥିବା ପରିସ୍ଥିତିର ମୁକାବିଲା ପାଇଁ ରାଜ୍ୟଗୁଡ଼ିକୁ ସେନା ଯୋଗାଇ ଦେବା ସହ ପ୍ରସ୍ତୁତି ଏବଂ ସହାୟତା ସମୀକ୍ଷା କରିଛନ୍ତି।
ଭାରତୀୟ ବାୟୁସେନା ଏଥିପାଇଁ ବିଭିନ୍ନ ସହଯୋଗ କରୁଛି।
