ଭଦ୍ରକ, ୨୭ା୩ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଚରମ୍ପା ରେଲୱେ ଗ୍ରାଉଣ୍ଡ ଓ ଭଦ୍ରକ ସ୍ୱୟଂ ଶାସିତ ମହାବିଦ୍ୟାଳୟ ପଡ଼ିଆ ଦୁଇଟି ସ୍ଥାନରେ ଓଡ଼ିଶା କ୍ରିକେଟ ଆସୋସିଏସନ ଆନୁକୁଲ୍ୟରେ ‘ଭିଜନ-୨୦୨୪’ ପରିପ୍ରେକ୍ଷୀରେ ଜିଲା କ୍ରିକେଟ ଆସୋସିଏସନ ପକ୍ଷରୁ ଆୟୋଜିତ ହୋଇଆସୁଥିବା ଆନ୍ତଃ ଜିଲା ସିନିୟର କ୍ଲବ ଲିଗ ଟୁର୍ଣ୍ଣାମେଣ୍ଟରେ ଆଜି ୨ଟି ମ୍ୟାଚ ଅନୁଷ୍ଠିତ ହୋଇଥିଲା । ଗୋଟିଏ ମ୍ୟାଚରେ କଳିଙ୍ଗ କ୍ଲବ ବିଜୟୀ ହୋଇଥିବା ବେଳେ ଅନ୍ୟ ଏକ ମ୍ୟାଚରେ ସଳନ୍ଦୀ କ୍ଲବ ବିଜୟୀ ହୋଇଛି । ଭଦ୍ରକ କଲେଜ ପଡ଼ିଆରେ ଅନୁଷ୍ଠିତ ମ୍ୟାଚ କଳିଙ୍ଗ କ୍ଲବ ଓ ସୂର୍ଯ୍ୟଶିଖା କ୍ଳବ ମଧ୍ୟରେ ଅନୁଷ୍ଠିତ ହୋଇଥିଲା । ସୂର୍ଯ୍ୟଶିଖା କ୍ଲବ ଟସ୍ ଜିତି ପ୍ରଥମେ ବ୍ୟାଟିଂ କରିଥିଲା । ଦଳ ୨୮.୪ ଓଭରରେ ୧୬୧ ରନ କରି ସମସ୍ତ ଖେଳାଳୀ ଆଉଟ ହୋଇଯାଇଥିଲେ । ଦଳ ପକ୍ଷରୁ ଶୁଭମ୍ ନାୟକ ୩୯, ସରୋଜ କୁମାର ବେହେରା ୨୮ ଓ ଚନ୍ଦନ କୁମାର ରାଉତ ୨୮ରନ କରିଥିଲେ । କଳିଙ୍ଗ କ୍ଳବ ପକ୍ଷରୁ ଅନିଲ ଉପାଧ୍ୟାୟ ୩ଟି, କିଶାନ ମନୋହର ମହାନ୍ତି ୩ଟି ଓ ପୁରୁଷୋତ୍ତମ ମିଶ୍ର ୨ଟି ଉଇକେଟ ନେଇଥିଲେ । ଦ୍ୱିତୀୟାର୍ଦ୍ଧରେ ବ୍ୟାଟିଂ କରି କଳିଙ୍ଗ କ୍ଳବ ୨୫ ଓଭରରେ ୩ ଉଇକେଟ ହରାଇ ବିଜୟ ଲକ୍ଷ୍ୟ ହାସଲ କରି ନେଇଥିଲା । ଅଂଶୁମାନ ମହାନ୍ତି ୬୩, ସୁଦର୍ଶନ ପଢିଆରୀ ୩୩, ଚନ୍ଦ୍ର ଶେଖର ମିଶ୍ର ୨୭ ରନ କରିଥିଲେ । ସୂର୍ଯ୍ୟଶିଖା ପକ୍ଷରୁ ପ୍ରଶାନ୍ତ ରଣା ଗୋଟିଏ ଓ ସରୋଜ ବେହେରା ଗୋଟିଏ ଉଇକେଟ ନେଇଥିଲେ । ଅଂଶୁମାନ ମହାନ୍ତିଙ୍କୁ ମ୍ୟାନ ଅଫ୍ ଦି ମ୍ୟାଚ ବିବେଚିତ କରାଯାଇଥିଲା । ସାର୍ଥକ ବିଶ୍ୱାଳ ଓ ଯଜାତି କେଶରୀ ମହାପାତ୍ର ଅମ୍ପାୟାର ଭାବେ ପରିଚାଳନା କରିଥିଲେ । ସେହିଭଳି ଚରମ୍ପା ରେଲୱେ ପଡ଼ିଆରେ ହୋଇଥିବା ମ୍ୟାଚ ସାଳନ୍ଦୀ କ୍ଳବ ଓ ଚାନ୍ଦବାଲି ସ୍ପୋଟ୍ର୍ସ ଆସୋସିଏସନ ମଧ୍ୟରେ ଅନୁଷ୍ଠିତ ହୋଇଥିଲା । ଏହି ମ୍ୟାଚରେ ସାଳନ୍ଦୀ କ୍ଳବ ପ୍ରଥମେ ବ୍ୟାଟିଂ କରି ୩୯.୨ ଓଭରରେ ୨୮୨ ରନ କରି ଅଲ୍ ଆଉଟ ହୋଇଯାଇଥିଲେ । ଦଳ ପକ୍ଷରୁ ଅଭିଜିତ୍ ଦାସ ୧୧୫ ରନ, ଅନୁଭବ ବଳ ୫୯ ରନ କରିଥିବା ବେଳେ ଚାନ୍ଦବାଲିି ପକ୍ଷରୁ ନିର୍ମଳ ବିଶ୍ୱାଳ ୩ଟି ଉଇକେଟ ନେଇଥିଲେ । ଦ୍ୱିତୀୟାର୍ଦ୍ଧ ବ୍ୟାଟିଂରେ ଚାନ୍ଦବାଲି ସ୍ପୋର୍ଟ୍ସ ବ୍ୟାଟିଂ କରି ୪୫ ଓଭରରେ ୯ ଉଇକେଟ ହରାଇ ୨୫୪ ରନ କରିବାକୁ ସମର୍ଥ ହୋଇ ମ୍ୟାଚ ହାରିଥିଲା । ଦଳ ପକ୍ଷରୁ ଶାଶ୍ୱତ ଦାଶ ୭୭ ରନ କରିବାକୁ ସମର୍ଥ ହୋଇଥିଲେ । ଏହି ମ୍ୟାଚକୁ ସାଳନ୍ଦୀ ଦଳ ୨୮ ରନରେ ଜିତିଥିଲା ।
