ବଲାଙ୍ଗୀର, ତା୨୪-୦୬(ଓଡ଼ିଆ ପୁଅ/ସନ୍ତୋଷ ନାୟକ) ସୁବର୍ଣପୁର- ବଲାଙ୍ଗିର ୫୭ ନମ୍ବର ଜାତୀୟରାଜପଥର ହରଡଖୋଲ ଛକଠାରେ ଗଞ୍ଜେଇ ବୋଝେଇ ଟ୍ରକକୁ ଜବତ କରିଛି ସୁବର୍ଣପୁର ପୋଲିସ। ଏକ ମାଲବାହୀ ଟ୍ରକଯୋଗେ ପଡୋଶୀ ବୌଦ୍ଧଜିଲ୍ଲାରୁ ଆନ୍ଧ୍ରପ୍ରଦେଶକୁ ଗଞ୍ଜେଇ ଚାଲାଣ ହେଉଥିବା ସମୟରେ ସୁବର୍ଣପୁର ପୋଲିସ ହାବୁଡରେ ପଡିଛି।
ବଲାଙ୍ଗୀର ହେଉ କି ସୁବର୍ଣ୍ଣପୁର, ବୌଦ୍ଧ ହେଉକି ଫୁଲବାଣୀ, ଏସବୁ ଅଞ୍ଚଳରୁ ଚୋରା ଗଞ୍ଜେଇ ଚାଲାଣ ଥମୁନି। ଆଜି ବୌଦ୍ଧ ଜିଲ୍ଲାରୁ ଏକ ମାଲବାହୀ ଟ୍ରକରେ ଗଞ୍ଜେଇ ଚାଲାଣର ଖବରପାଇ ସୁବର୍ଣ୍ଣପୁର ପୋଲିସ ଜାଲ ବିଛାଇଥିଲା। ଟ୍ରକଟି ଦ୍ରୁତଗତିରେ ପଳାଉଥିଲା ବେଳେ ସୁବର୍ଣପୁର ପୋଲିସ ହର୍ଡଖୋଲ ଫାଣ୍ଡିକୁ ଖବର ଦେଇଥିଲା।
ହର୍ଡଖୋଲ ପୋଲିସ ଗାଡିକୁ ଅଟକରଖି ଯାଞ୍ଚ ଆରମ୍ଭ କରିଥିବାବେଳେ ଗଞ୍ଜେଇ ଚାଲାଣ ହେଉଥିବା ଜାଣିଥିଲା। ଏନେଇ ଗାଡିରେ ଥିବା ଡ୍ରାଇଭର ଓ ହେଲପରଙ୍କୁ ଗିରଫ କରି ତଦନ୍ତ ଆରମ୍ଭ କରିଛି ପୋଲିସ। ଗାଡିରେ ପ୍ରାୟ ୫ କୁଇଁଣ୍ଟାଲ ଗଞ୍ଜେଇ ଥିବା ଜଣା ପଡିଥିଲା। ଏହାର ଅନୁମାନିକ ମୁଲ୍ୟ ୨୦ ଲକ୍ଷରୁ ଉର୍ଦ୍ଧ ହେବ ବୋଲି ପୋଲିସ ପକ୍ଷରୁ ସୂଚନା ମିଳିଛି। ସୁବର୍ଣପୁର ପୋଲିସ ଗାଡିକୁ ଜବତ କରିବା ସହ ଅଭିଯୁକ୍ତଙ୍କୁ ଗିରଫକରି ଅଧିକ ତଦନ୍ତ ଜାରି ରଖିଛି।
