ଭୁବନେଶ୍ଵର,୧୯/୧୦,(ଓଡ଼ିଆ ପୁଅ ପି ନାଏକ): ବିଜେପୁର ଉପନିର୍ବାଚନ ପ୍ରଚାର ପାଇଁ ଆଜି ହେଉଛି ଶେଷ ଦିନ । ଶେଷ ଦିନରେ ଲୋକଙ୍କୁ ଭୋଟ ଭିକ୍ଷା ପାଇଁ ହାଇଭୋଲଟେଜ ନେତା ପ୍ରଚାର କରିବେ । ସମସ୍ତ ନେତା ନିଜ ନିଜ ଦଳ ପାଇଁ ସବୁ ପ୍ରାଣ ଲଗାଇ ପ୍ରଚାର କରୁଛନ୍ତି । ଦୁଇ ଦିନ ହେଲା ବିଜେଡି ସୁପ୍ରିମୋ ନବୀନ ପଟ୍ଟନାୟକ ବିଜେପୁରରେ ରହି ରୀତା ସାହୁଙ୍କ ପାଇଁ ପ୍ରଚାର କରିଛନ୍ତି ।ହାଇଟେକ ବସରେ ରୋଡ ସୋ କରିବା ସହ ଲୋକଙ୍କୁ ଭୋଟ ଭିକ୍ଷା କରିଛନ୍ତି । ସେହିପରି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ନିଜ ଦଳୀୟ ପ୍ରାର୍ଥୀ ସନତାତନ ଗୌଡ଼ଙ୍କ ପାଇଁ ପ୍ରଚାର କରିଛନ୍ତି । ସେପଟେ କଂଗ୍ରେସ ମଧ୍ୟ ନିଜ ପ୍ରାର୍ଥୀ ଦିଲ୍ଲୀପ ପଣ୍ଡାଙ୍କ ପାଇଁ ପ୍ରଚାର କରିଛି ।ଆଜି ସଂଧ୍ୟାରେ ଶେଷ ହେବ ଉପନିର୍ବାଚନ ପାଇଁ ପ୍ରଚାର । ତେଣୁ ପ୍ରଚାରର ଅନ୍ତିମ ପର୍ଯ୍ୟାୟକୁ ପ୍ରଭାବଶାଳୀ କରିବାକୁ ଚାଲିଛି ପ୍ରାଣମୂର୍ଛା ଉଦ୍ୟମ । ବିଜେଡିର ଷ୍ଟାର ପ୍ରଚାରକ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦୁଇ ଦିନିଆ ପ୍ରଚାର ସାରି ଭୁବନେଶ୍ୱର ଫେରି ଆସି ଥିବା ବେଳେ ଅନ୍ୟପଟେ ବିଜେପିର ଷ୍ଟାର ପ୍ରଚାରକ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ଅନ୍ୟ ନେତାମାନେ ବିଜେପୁରରେ ଆଜି ଶେଷ ପ୍ରଚାର ପାଇଁ ପ୍ରୟାସ ଜାରି ରଖିବେ।
