ଭଦ୍ରକ, ୨୬ା୩ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଏହି ଜିଲାର ବାସୁଦେବପୁର ପୌରପାଳିକା ୨୩ନଂ ୱାର୍ଡ ଉଚ୍ଚଡିହା ଠାରେ ଭୟାବହ ଅଗ୍ନିକାଣ୍ଡ ଘଟିଯାଇଛି । ଏହି ଅଗ୍ନିକାଣ୍ଡରେ ୪ ପରିବାରର ୧୨ ବଖରା ଘର ସଂପୂର୍ଣ୍ଣ ଜଳିଯାଇଛି । ଏହାସହିତ ନିଆଁରେ ପୋଡି ହୋଇ ଜଣେ ୪୦ ବର୍ଷୀୟ ଯୁବତୀର ମୃତ୍ୟୁ ଘଟିଛି । ଗତକାଲି ରାତି ୩ଟା ବେଳକୁ ହଠାତ୍ ସୁରେନ୍ଦ୍ର ବାରିକଙ୍କ ଘରେ କୌଣସି କାରଣରୁ ନିଆଁ ଲାଗିଯାଇଥିଲା । ନିଆର ବେଗ ଏତେ ତୀବ୍ର ଥିଲା ଯେ ଚାହୁଁ ଚାହୁଁ ୪ ପରିବାରର ୧୨ ବଖରା ଘର ନିଆଁର ଆଁ ଭିତରେ ଜଳିଯାଇଥିଲା । ପଡୋଶୀ ବାହାରକୁ ଉଠିଥିବାବେଳେ ନିଆଁକୁ ଦେଖି ଡାକ ପକାଇବା ସହିତ ପରିବାର ଲୋକଙ୍କୁ ଡାକ ପକାଇଥିଲେ । ଫଳରେ ଡାକ ଶୁଣି ପରିବାର ଲୋକ ଜୀବନ ବିକଳରେ ବାହାରକୁ ପଳାଇ ଆସିଥିଲେ । ହେଲେ ଭଉଣୀ କନକଲତା ବାରିକ ଘର ଭିତରୁ ବାହାରି ପାରିନଥିଲେ । ଫଳରେ ନିଆଁରେ ପୋଡି ହୋଇ ତାଙ୍କର ମୃତ୍ୟୁ ଘଟିôଥଲା । ପରିବାର ଲୋକ ବାସୁଦେବପୁର ଦମକଳ ବାହିନୀକୁ ଖବର ଦେଇଥିଲେ । ହେଲେ ଅନ୍ୟ ଜାଗାରେ ନିଆଁ ଲିଭାଇବାକୁ ଯାଇଥିବାରୁ ସୋର ଦମକଳ ବାହିନୀ ନିଆଁ ଲିଭାଇବାକୁ ଆସିଥିଲେ । ହେଲେ ଆସିବା ବେଳକୁ ସବୁ କିଛି ପୋଡି ପାଉଁଶ ହୋଇଯାଇଥିଲା । କେବଳ ପିନ୍ଧାଲୁଗା ବ୍ୟତୀତ ଅନ୍ୟ କୌଣସି ଆସବାବ ପତ୍ର ବାହାରକୁ କାଢି ପାରିନଥିଲେ । ତୁରନ୍ତ ଏହି ଅଗ୍ନି ବିପନ୍ନ ପରିବାରକୁ ସରକାରୀ ସହାୟତା ଯୋଗାଇ ଦେବାକୁ ଦାବି ହେଉଛି ।
