୬ମାସ ହେଲାଣି ବିଦ୍ୟୁତ ଖୁଣ୍ଟ ଚୋରୀ, ବିଭାଗର ନିଘା ନାହିଁ, ହାତୀ ଭୟରେ କାଟିଦେଲା ବିଦ୍ୟୁତ ସଂଯୋଗ, ଲୋକେ କଲବଲ

ହାଟଡ଼ିହି, ୧୩ । ୪ : କେନ୍ଦୁଝର ଜିଲ୍ଲା ହଦଗଡକୁ ସଂଯୋଗ କରୁଥିବା ବିଦ୍ୟୁତ ଖୁଣ୍ଟ ଗୁଡିକ ମଧ୍ୟରୁ ୬ଗୋଟି ବିଦ୍ୟୁତ ଖୁଣ୍ଟକୁ କେହି ଦୁର୍ବୁତ ୬ମାସ ହେଲା ଚୋରୀ କରିନେଇଥିଲେ ମଧ୍ୟ ଆଜି ପର୍ଯ୍ୟନ୍ତ ବିଭାଗ କୌଣସି ଦୃଷ୍ଟି ଦେଇ ନଥିଲା । କେବୁଲ ତାର ଯୋଗେ ବିଦ୍ୟୁତ ସଂଯୋଗ ହେଉଥିବାରୁ କୌଣସି ଅସୁବିଧା ମଧ୍ୟ ନଥିଲା । ଗତ କାଲି ହାଟଡିହିରେ ବିଦ୍ୟୁତ ତାର ଲାଗି ୮ଟି ଗୋରୁଙ୍କ ମୃତ୍ୟୁପରେ ବନ ବିଭାଗ ତତ୍ପରତା ଦେଖାଇ ଏ ସମ୍ପର୍କରେ ବିଦ୍ୟୁତ ବିଭାଗକୁ ଅବଗତ କରିଥିଲା । ଗତ କିଛିଦିନ ହେଲା ଦନ୍ତା ହାତୀଟି ହଦଗଡ ଅଞ୍ଚଳରେ ବୁଲାବୁଲି କରୁଥିବାରୁ ଏହି ବିଦ୍ୟୁତ ତାର ଦ୍ୱାରା କାଳେ କିଛି ଅଘଟଣ ଘଟିବ ସେନେଇ ବିଦ୍ୟୁତ ବିଭାଗ ଗତକାଲି ଠାରୁ ବିଦ୍ୟୁତ ସଂଯୋଗକୁ ବିଛିନ୍ନ କରିଦେଇଛି । ଯାହାଦ୍ୱାରାକି ହଦଗଡ ଅଞ୍ଚଳଟି ସମ୍ପୁର୍ଣ୍ଣ ଅନ୍ଧକାରମୟ ହୋଇଯାଇଛି । ବର୍ତ୍ତମାନ ଖରାଦିନ ସମୟରେ ବିଭାଗର ଏପରି ନିଷ୍ପତି ଯୋଗୁଁ ଲୋକମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ୬ମାସ ହେଲା କେହି ଦୁର୍ବୁତ ୬ଟି ଲୁହାରେ ତିଆରି ବିଦ୍ୟୁତ ଖୁଣ୍ଟକୁ କାଟି ନେଇଯାଇଥିବାବେଳେ ବିଭାଗୀୟ କର୍ତ୍ତୁପକ୍ଷ ଏଥିପ୍ରତି କାହିଁକି ପଦକ୍ଷେପ ନେଇ ନଥିଲେ ବୋଲି ଗ୍ରାମବାସୀମାନେ ପ୍ରଶ୍ନ କରିଛନ୍ତି ।ଏବେ ପ୍ରଚଣ୍ଡ ରୌଦ୍ରତାପ ସମୟରେ ଓ କରୋନା ଲକଡାଉନ ସମୟରେ ବିଦ୍ୟୁତ କାଟିବା ଦ୍ୱାରା ଲୋକମାନେ କିପରି ଘରେ ରହିବେ ତାହାହିଁ ଅଞ୍ଚଳବାସୀଙ୍କୁ ଆନ୍ଦୋଳିତ କରିଛି । ଏନେଇ ଆଜି କିଛି ଅଞ୍ଚଳବାସୀ ବିଭାଗୀୟ ଅଧିକାରୀ ମାନଙ୍କୁ ଭେଟି ଅଭିଯୋଗ କରିଥିଲେବି କରୋନା ପରେ ଯାହା କରାଯିବ ବୋଲି କହିବାରୁ ଲୋକଙ୍କ ଭିତରେ ତୀବ୍ର ଅସନ୍ତାଷ ପ୍ରକାଶ ପାଇଛି । ବିଭାଗୀୟ ଉଚ୍ଚ କର୍ତ୍ତୁପକ୍ଷ ତୁରନ୍ତ ଏଥିପ୍ରତି ଦୃଷ୍ଟି ଦେଇ ଲୋକମାନଙ୍କୁ ବିଦ୍ୟୁତ ସଂଯୋଗ କରିବାପାଇଁ ନିବେଦନ କରିଛନ୍ତି ।