ସାହିତ୍ୟିକ ଅପୂର୍ବ ରଞ୍ଜନ ରାୟଙ୍କ ପଞ୍ଚମ ଶ୍ରାଦ୍ଧ ବାର୍ଷିକୀ, ଭଦ୍ରକ ମାଟିର ଏକ ନିଆରା ବ୍ୟକ୍ତିତ୍ୱ ଥିଲେ ଅପୂର୍ବ ରଂଜନ ରାୟ , ଅପୂର୍ବ ଏକ ଉଚ୍ଛ୍ୱାସ, ସୃଜନର ଦିବ୍ୟ ନିର୍ମାଲ୍ୟ

ଭଦ୍ରକ, ୨୭ା୮ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକ ସାହିତ୍ୟ ଜଗତର ଅମ୍ଳାନ ବ୍ୟକ୍ତିତ୍ୱ ମୁକୁଟବିହୀନ ସମ୍ରାଟ ବାଗ୍ମୀ, ସାହିତ୍ୟରତ୍ନ ଅପୂର୍ବ ରଞ୍ଜନ ରାୟଙ୍କ ଅବର୍ତ୍ତମାନରେ ସାହିତ୍ୟ ଜଗତରେ ସୃଷ୍ଟି ହୋଇଥିବା ଶୂନ୍ୟସ୍ଥାନ ଅପୂରଣୀୟ । ନିଜର ସାହିତ୍ୟ କଳାକୃତି ସହିତ ବହୁ ସାହିତ୍ୟିକଙ୍କୁ ନବ ଦିଗନ୍ତ ଦେଖାଇ ତାଙ୍କ ଅମ୍ଳାନ ପ୍ରତିଭାକୁ ନେଇ ଚିର ଅମର ରହିଛନ୍ତି ସାହିତ୍ୟରତ୍ନ ଅପୂର୍ବ ରଞ୍ଜନ ରାୟ । ତାଙ୍କର ସାଧନାମୟ ଜୀବନ ଯେ,କେତେ ଗଭୀରକୁ ଯାଇପାରିଥିଲା ତାହା ତାଙ୍କ ଅତି ନିକଟରୁ ଆତ୍ମୀୟତାର ସ୍ପର୍ଶ ଦେଇ ଏକାନ୍ତ ହୋଇଯିବା ବ୍ୟକ୍ତିମାନେ ହିଁ ବିଦିତ । ସମଗ୍ର ଓଡ଼ିଶାର ସାହିତ୍ୟ ଜଗତରେ ସ୍ୱର୍ଗତ ରାୟ ଏକ ସ୍ମରଣୀୟ ସ୍ପର୍ଦ୍ଧିତ ପ୍ରତିଭା । ଉଚ୍ଚାଙ୍ଗ ସାହିତ୍ୟ ସୃଷ୍ଟି ପାଇଁ ସେ ଯେତିକି ଆଗ୍ରହୀ, ସାହିତ୍ୟର ଶ୍ରୀବୃଦ୍ଧି ପାଇଁ ଅନୁଷ୍ଠାନମାନ ଗଠନ କରିବା, ଅନୁଷ୍ଠାନମାନଙ୍କ ସହିତ ଜଡ଼ିତ ହେବାରେ ସେ ଆହୁରି ଉତ୍ସାହୀ । ବରିଷ୍ଠଙ୍କୁ ସମ୍ମାନ ଓ ନବୀନଙ୍କୁ ଶ୍ରଦ୍ଧା ଥିଲା ତାଙ୍କ ଚରିତ୍ରର ବୈଶିଷ୍ଟ୍ୟ ବୋଲି ବିଶିଷ୍ଟ ସାହିତ୍ୟିକ ସ୍ୱର୍ଗତ ଅପୂର୍ବ ରଞ୍ଜନ ରାୟଙ୍କ ପଞ୍ଚମ ବାର୍ଷିକୀ ଶ୍ରାଦ୍ଧ ଶ୍ରଦ୍ଧାଞ୍ଜଳି ସ୍ମୃତି ସଭାରେ ଉପସ୍ଥିତ ବକ୍ତାମାନେ ମତବ୍ୟକ୍ତ କରିଥିଲେ । ଅପୂର୍ବ ରଂଜନ ରାୟ ସ୍ମୃତି ସଂସଦ ଆନୁକୂଲ୍ୟରେ ଭାଗବତ କଲ୍ୟାଣ ମଣ୍ଡପଠାରେ ଅନୁଷ୍ଠିତ ସ୍ମୃତି ସଭାରେ ସଂସଦର ସଭାପତି ଅଜୟ କୁମାର ନାୟକ ସଭାପତିତ୍ୱ କରିଥିଲେ । ବରେଣ୍ୟ ଅତିଥି ଭାବେ ‘ବେଦ ପୀୟୂଷ’ର ସଂପାଦକ ପଣ୍ଡିତ ବୀରେନ୍ଦ୍ର କୁମାର ପଣ୍ଡା ଏବଂ ସମ୍ମାନିତ ଅତିଥି ଭାବେ ଜିଲ୍ଲା ସୂଚନା ଓ ଲୋକ ସଂପର୍କ ଅଧିକାରୀ ରମେଶ ଚନ୍ଦ୍ର ନାୟକ ଯୋଗଦେଇ ସ୍ୱର୍ଗତ ରାୟଙ୍କ ବହୁମୁଖୀ ପ୍ରତିଭା ଉପରେ ଆଲୋକପାତ କରିଥିଲେ । ବୈକୁଣ୍ଠ ବିଶ୍ୱାଳ ପ୍ରାକ୍ ସୂଚନା ପ୍ରଦାନ କରିଥିବା ବେଳେ, ଅତୀଶ କୁମାର ବେହେରା ମଞ୍ଚ ଆମନ୍ତ୍ରଣ ଓ ଅତିଥି ପରିଚୟ ପ୍ରଦାନ କରିଥିଲେ । ସ୍ମୃତି ସଂସଦର ସଂପାଦକ ପ୍ରବୀର କୁମାର ଜେନା ସ୍ୱାଗତ ଭାଷଣ ପ୍ରଦାନ କରିଥିଲେ । ଏହି ଅବସରରେ ବରିଷ୍ଠ ସାହିତ୍ୟିକ ଭଗବାନ ଚନ୍ଦ୍ର ନାୟକଙ୍କୁ ‘ଅପୂର୍ବ ରଂଜନ ରାୟ ସ୍ମୃତି ସମ୍ମାନ-୨୦୨୧’ରେ ସମ୍ମାନିତ କରାଯାଇଥିଲା । କବି ବିଜୟ ବହଳୀ ମାନପତ୍ର ପାଠ କରିଥିଲେ । ଡ.ହରିହର ନାୟକ,ଡ.ପଦ୍ମକାନ୍ତ ଧଳ,କରୁଣାକର ବେହୁରିଆ ପ୍ରମୁଖ ସ୍ୱର୍ଗତ ରାୟଙ୍କ ସ୍ମୃତି ଚାରଣ କରିଥିବା ବେଳେ କବୟିତ୍ରୀ ମନୋରମା ରାୟ ସ୍ମୃତି କବିତା ଆବୃତି କରିଥିଲେ । ସୁଧାକର ରାଉତ ଧନ୍ୟବାଦ ଦେଇଥିଲେ । ଅନ୍ୟମାନଙ୍କ ମନୋଜ କୁମାର ଦାସ, ମନୋରଞ୍ଜନ ନାୟକ, ସଂଗ୍ରାମ ସାହୁ,ରାଜେଶ କୁମାର ଦାସ,ବିଶ୍ୱପ୍ରତାପ ମଲ୍ଲିକ,ସମୀର କାନ୍ତ ଦାସ, କିଶୋର କୁମାର ଲଢ଼ା,କ୍ଷିତିଶ କୁମାର ଦତ୍ତଏବଂ ଦୁଃଶାସନ ମହାନ୍ତି ପ୍ରମୁଖ ଉତ୍ସବ ସଂଯୋଜନା କରିଥିଲେ ।