ରଜ ଅବସରରେ ଭଦ୍ରକ ବିଧାନସଭା କାର୍ଯ୍ୟାଳୟ ପରିସରରେ ଆୟୋଜିତ ମହିଳା ମୈତ୍ରୀ ମିଳନ (ବନ୍ଧୁ ମିଳନ)

ଭଦ୍ରକ, ୧୪ା୬ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଆଜି ଓଡ଼ିଶାର ଗଣପର୍ବ ରଜ ଅବସରରେ ଭଦ୍ରକ ବିଧାନସଭା କାର୍ଯ୍ୟାଳୟ ପରିସରରେ ଆୟୋଜିତ ମହିଳା ମୈତ୍ରୀ ମିଳନ (ବନ୍ଧୁ ମିଳନ) କାର୍ଯ୍ୟକ୍ରମରେ ବିଧାୟକ ସୀତାଂଶୁ ଶେଖର ମହାପାତ୍ର ଯୋଗ ଦେଇ ଦଳର ମହିଳା ମୋର୍ଚ୍ଚାର ମା’ ଓ ଭଉଣୀମାନଙ୍କ ସହ ବେଶ କିଛି ସମୟ ଅତିବାହିତ କରି ହିନ୍ଦୁ ସଂସ୍କୃତିର ମହାନ ପରମ୍ପରା ବିଷୟରେ ଅବଗତ କରାଇଥିଲେ।ଏବଂ ରଜ କେବଳ ଏକ ପର୍ବ ନୁହେଁ ଏହା ନାରୀ ସମ୍ମାନ, ସଂସ୍କୃତି ଓ ସାମାଜିକ ସମରସତାର ଏକ ଅନନ୍ୟ ପର୍ବ। ନାରୀଶକ୍ତିର ସମ୍ମାନ ଓ ସଶକ୍ତିକରଣ ମାଧ୍ୟମରେ ହିଁ ଏକ ସମୃଦ୍ଧ ଓ ସଶକ୍ତ ସମାଜ ଗଠନ ସମ୍ଭବ ବୋଲି ନିଜ ଅଭିବ୍ୟକ୍ତି ରଖିଥିଲେ। ଏହି ଉତ୍ସବରେ ରଜ ପିଠା, ରଜ ପାନ, ରଜ ଦୋଳି ଏବଂ ଓଡ଼ିଆ ପରମ୍ପରାର ବିଭିନ୍ନ ଆୟୋଜନ ମାଧ୍ୟମରେ ରଜର ସାଂସ୍କୃତିକ ଗୌରବ ଓ ନାରୀଶକ୍ତି ପ୍ରତି ସମ୍ମାନର ଭାବନା ସମ୍ପର୍କରେ ଅନୁଭବ କରିବାର ସୁଯୋଗ ମିଳିଥିବାରୁ ସେ ସମସ୍ତ ଭଉଣୀମାନଙ୍କୁ ସ୍ନେହ ଓ ସଦିଚ୍ଛା ଜଣାଇଥିଲେ।ଏହି ଅବସରରେ ପାରମ୍ପରିକ ରୀତିନୀତି ଅନୁଯାୟୀ ମା’ ଓ ଭଉଣୀମାନଙ୍କୁ ଅଳତା ପରିଧାନ କରାଯାଇ ସମ୍ମାନିତ କରାଯାଇଥିଲା।