ଭଦ୍ରକ, ୨୬ା୧୦ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଓଡ଼ିଶାରେ ରଜ କୁଇନ୍ ହୋଇ ଚର୍ଚ୍ଚାରେ ଥିବା କ୍ରିଷ୍ଣା ସାହୁ ସୁଦୂର ମହାରାଷ୍ଟ୍ର ପୁଣେରେ ଆୟୋଜିତ ମିସ୍ ଫ୍ୟାସ୍ନିଷ୍ଟା ୨୦୨୧ ରେ ଅଂଶଗ୍ରହଣ କରି ପୁଣି ଚର୍ଚ୍ଚାକୁ ଆସିଛନ୍ତି । ଏହି ପ୍ରତିଯୋଗିତାରେ ସମସ୍ତଙ୍କୁ ପଛରେ ପକାଇ ବିଜୟୀ କ୍ରାଉନ୍ ପିନ୍ଧି ଓଡ଼ିଶା ପାଇଁ ସେ ଗୌରବ ଆଣିଛନ୍ତି । କ୍ରିଷ୍ଣା ସାହୁ ଓଡ଼ିଶାର ପାଣି ପବନରେ ବଢି ମହାରାଷ୍ଟ୍ର ପୁଣେର ସିଲଫିନା ମିଡିଆ ଦ୍ୱାରା ହୋଟେଲ ବ୍ଲୁ ୱାଟରରେ ଆୟୋଜିତ ମିସ୍ ଫ୍ୟାସ୍ନିଷ୍ଟା ୨୦୨୧ ବିଜେତା ହୋଇଛନ୍ତି । ଏହି ପ୍ରତିଯୋଗିତାରେ ଦେଶର ବିଭିନ୍ନ ରାଜ୍ୟରୁ ବଛା ବଛା ୫୦ ଜଣ ପ୍ରତିଯୋଗୀ ଅଂଶଗ୍ରହଣ କରିଥିବାବେଳେ ଏଥିରେ ଓଡ଼ିଶାର କ୍ରିଷ୍ଣା ସାହୁ ଗ୍ରାଣ୍ଡ ଫିନାଲେ ରେ ମିସ୍ କାଟାଗୋରୀ ୱିନର ହୋଇଛନ୍ତି । ସିଲଫିନା ମିଡିଆ ପରିଚାଳନା ନିର୍ଦ୍ଦେଶିକା ତଥା ସ୍ୱନିର୍ଦ୍ଦେଶିକା ନିରୁପମା ମହାନ୍ତି ଓ ତାଙ୍କ ଟିମ୍ ଏହି ସୋ ଆୟୋଜିତ କରିଥିଲେ । ଏଠାରେ ଏକ ବହୁତ ସନ୍ତୁଳିତ ପ୍ଲାଟଫର୍ମ ସୃଷ୍ଟି କରାଯାଇଥିଲା । ଯେଉଁଠାରେ ବୟସର ପ୍ରତିବନ୍ଧକ ନଥିଲା । ଏଥିରେ ଟ୍ୟାଲେଣ୍ଟ ଏବଂ ସୁନ୍ଦରତାକୁ ଅଗ୍ରାଧିକାର ଦିଆଯାଇଥିଲା ।
ଏଥିରେ ଅଂଶଗ୍ରହଣ କରିଥିବା ସମସ୍ତ ପତ୍ରିଯୋଗୀ ଅନେକ ଉତ୍ସାହର ସହ ନିଜର ଦକ୍ଷତା ପ୍ରଦର୍ଶନ କରିଥିଲେ । ପ୍ରତ୍ୟେକ ବର୍ଗର ସମସ୍ତ ବିଜେତା ଅତ୍ୟନ୍ତ ଯୋଗ୍ୟ ଥିବାବେଳେ ପ୍ରତିଭା ମୂଲ୍ୟାୟନ କରିବାକୁ ଜଜ୍ମାନେ ଦ୍ୱନ୍ଦ୍ୱରେ ପଡିଥିଲେ । କ୍ରିଷ୍ଣା ସାହୁ ହେଉଛନ୍ତି ଭଦ୍ରକର ଅବସରପ୍ରାପ୍ତ ଆର୍ମି ସୁବେଦାର ମେଜର ଗଂଗାଧର ସାହୁ ଏବଂ ଅମିତା ସାହୁଙ୍କ ଝିଅ । ଚାନ୍ଦବାଲିର ପ୍ରତିଷ୍ଠିତ ବ୍ୟବସାୟୀ ତଥା ସମାଜସେବୀ ହରିହର ସାହୁଙ୍କ ନାତୁଣୀ । ଛୋଟବେଳୁ ଚାନ୍ଦବାଲିରେ ନିଜର ଅଜା ଏବଂ ଆଇଙ୍କ ନିକଟରେ ସେ ବଢିଥିବାବେଳେ ସ୍କୁଲ ସମୟରୁ ସେ ପାଠପଢା ସହ ନାଚ, ଗୀତ, ମଡେଲିଂ ଏବଂ ଆଙ୍କରିଂ କରି ବହୁ ସ୍ଥାନରେ ପୁରସ୍କୃତ ହୋଇଛନ୍ତି । ସେ ଜଣେ ସଫ୍ଟଓୟାର ଇଂଜିନିୟର । ଚଳିତ କରୋନା ଲକଡାଉନ୍ରେ ୱାର୍କ ଫର୍ମ ହୋମ୍ରେ ଦୁଇଗୋଟି ସୁଯୋଗ ଆଣି ଦେଇଥିଲେ ନିଜର ପ୍ରତିଭାର ପରିଚୟ ସୃଷ୍ଟି ପାଇଁ । ଓଡ଼ିଶାରେ ସାର୍ଥକ ରଜ କୁଇନ୍ ବିଜୟୀ ହେବା ପରେ ଏବେ ମହାରାଷ୍ଟ୍ର ପୁଣେରେ ମିସ୍ ଫ୍ୟାସନିଷ୍ଟା ୨୦୨୧ ରେ ଅଂଶଗ୍ରହଣ କରି ତାଙ୍କର ଦକ୍ଷତା ପ୍ରତିପାଦନ ପୂର୍ବକ ସମସ୍ତଙ୍କ ପ୍ରିୟ ଭାଜନ ହୋଇ ବିଜୟୀ କ୍ରାଉନ୍ ପିନ୍ଧିପାରିଛନ୍ତି ସେ । ଯାହାଙ୍କୁ ସବୁ ମହଲରେ ଶୁଭେଚ୍ଛାର ସୁଅ ଛୁଟିଛି । ତେବେ ତାଙ୍କ ଅଜା ଓ ଆଇଙ୍କ ଆଶୀର୍ବାଦ ଏବଂ ଜାଆଁଳା ଭଉଣୀ କାଜଲରାଣୀ ସାହୁଙ୍କ ସହଯୋଗ ପାଇଁ ସେ ବିଜୟୀ କ୍ରାଉନ୍ ପିନ୍ଧିପାରିଛନ୍ତି ବୋଲି ନିଜ ପ୍ରତିକ୍ରିୟାରେ କହିଛନ୍ତି ।