ଭୁବନେଶ୍ୱର: ବ୍ରିଟିଶ ପ୍ରଧାନମନ୍ତ୍ରୀ ବୋରିସ୍ ଜନସନ୍ କରୋନା ଭୂତାଣୁ ସଂକ୍ରମଣରୁ ସମ୍ପୂର୍ଣ୍ଣ ସୁସ୍ଥ ହୋଇ ଯାଇଛନ୍ତି। ମରୁମରୁ ବଞ୍ଚି ଯାଇଛନ୍ତି ବ୍ରିଟିଶ ପ୍ରଧାନମନ୍ତ୍ରୀ। ଜନସନ୍ କହିଛନ୍ତି ଯେ ଲଣ୍ଡନର ଡାକ୍ତରମାନେ ତାଙ୍କୁ ମୃତ ଘୋଷଣା କରିବାକୁ ପ୍ରସ୍ତୁତ ହୋଇ ସାରିଥିଲେ। ଜନସନ୍ କୋଭିଡ୍ -୧୯ ବିରୋଧରେ ତାଙ୍କର ସଂଗ୍ରାମକୁ ମୃତ୍ୟୁ ସହିତ ସାମ୍ନା ହେବାର ଅନୁଭୂତି ବୋଲି ବର୍ଣ୍ଣନା କରିଛନ୍ତି। ଆଇସିୟୁରୁ ବାହାରିବା ଏକ ଆରାମଦାୟକ ଅନୁଭୂତି ବୋଲି କହିଛନ୍ତି ଜନସନ୍।
୫୫ ବର୍ଷ ବୟସ୍କ ଜନସନ୍ ଗୁରୁତର ଅସୁସ୍ଥ ହୋଇପଡ଼ିବା ପରେ ଏପ୍ରିଲ ୫ ତାରିଖରେ ସେଣ୍ଟ୍ ଥୋମାସ୍ ହସ୍ପିଟାଲରେ ତାଙ୍କୁ ଭର୍ତ୍ତି କରଯାଇଥିଲା। ଡାକ୍ତର ଏବଂ ସ୍ୱାସ୍ଥ୍ୟ କର୍ମଚାରୀଙ୍କ ବହୁ ଉଦ୍ୟମ ପରେ ତାଙ୍କୁ ବଞ୍ଚାଯାଇ ପାରିଥିଲା। ଜନସନ୍ କହିଛନ୍ତି ହୁଏତ ଯେ କୌଣସି ପ୍ରକାର ଘଟଣା ଘଟିଯାଇ ପାରିଥାଆନ୍ତା। ଜନସନ୍ ମୃତ୍ୟୁ ସହିତ ତାଙ୍କର ସାମ୍ନା ହେବାର କଥା ବର୍ଣ୍ଣନା କରିଛନ୍ତି। ସେ କହିଛନ୍ତି ଯେ ଡାକ୍ତରଖାନାରେ ତାଙ୍କୁ ଅନେକ ଲିଟର ଅମ୍ଳଜାନ ଦିଆଯାଇ ଥିଲା। କିନ୍ତୁ ଆଇସିୟୁରେ ତାଙ୍କ ସ୍ୱାସ୍ଥ୍ୟରେ କୋୖଣସି ଅଗ୍ରଗତି ହେବାର ଦେଖାଗଲା ନାହିଁ। ଯେଉଁଥିପାଇଁ ଡାକ୍ତରମାନେ ବାଧ୍ୟ ହୋଇ ତାଙ୍କର ମୃତ୍ୟୁ ଘୋଷଣା କରିବାକୁ ପ୍ରସ୍ତୁତ ହେଉଥିଲେ। ସେହି ସମୟକୁ ମନେ ପକାଇ ଜନସନ୍ କହିଛନ୍ତି, ଏହା ଅତ୍ୟନ୍ତ କଠିନ ସମୟ ଥିଲା। ମୁଁ ଏହାକୁ ଅସ୍ୱୀକାର କରିପାରିବି ନାହିଁ। ମୋର ଅବସ୍ଥା ଭଲ ନଥିଲା, କିନ୍ତୁ ମୁଁ ଜାଣିଥିଲି ଯେ କଣ୍ଟିଜେନ୍ସି ଯୋଜନା ପ୍ରସ୍ତୁତ କରାଯାଉଛି। ଯଦି କିଛି ଭୁଲ ହୋଇଯାଏ ତେବେ କଣ କରିବାକୁ ହେବ, ସେଥିପାଇଁ ଡାକ୍ତରମାନେ ସମସ୍ତ ପ୍ରକାର ବିକଳ୍ପ ବ୍ୟବସ୍ଥା ପ୍ରସ୍ତୁତ କରି ରଖିଥିଲେ। ବ୍ରିଟିଶ ପ୍ରଧାନମନ୍ତ୍ରୀ କହିଛନ୍ତି, କିଛି ଦିନ ମଧ୍ୟରେ ମୋର ଅବସ୍ଥା ଏତେ ଖରାପ ହୋଇଗଲା ବୋଲି ବିଶ୍ୱାସ କରିବା କଷ୍ଟସାଧ୍ୟ ଥିଲା। ମୋର ମନେ ଅଛି ଯେ ମୁଁ ନିରାଶା ଅନୁଭବ କରୁଥିଲି। ମୁଁ କାହିଁକି ସୁସ୍ଥ ହେଉ ନାହିଁ ବୁଝି ପାରୁନଥିଲି। ସବୁଠାରୁ ଖରାପ ସମୟ ସେତେବେଳେ ଆସିଲା ଯେତେବେଳେ ୫୦/୫୦ ପରିସ୍ଥିତି ସୃଷ୍ଟି ହେଲା। ଡାକ୍ତର ମୋ ୱିଣ୍ଡପାଇପ୍ ତଳେ ଏକ ଟ୍ୟୁବ୍ ଲଗାଇଲେ। ମୁଁ ଅନୁଭବ କଲି ଯେ ଏହି ରୋଗ ପାଇଁ କୌଣସି ଔଷଧ ନାହିଁ, ଉପଶମ ନାହିଁ। ମୁଁ ଏଥିରୁ କିପରି ମୁକ୍ତି ପାଇବି।
ଏବେ ଜନସନଙ୍କ ପ୍ରେମିକା କ୍ୟାରି ସିମଣ୍ଡସ୍ ଏକ ପୁତ୍ର ସନ୍ତାନ ଜନ୍ମ ଦେଇଛନ୍ତି। ଜନସନ୍ ତାଙ୍କ ମଧ୍ୟମ ନାମ ନିକୋଲାସ୍ ରଖିଛନ୍ତି। ସେ ତାଙ୍କ ଜୀବନ ରକ୍ଷାକାରୀ ଡାକ୍ତର ନିକୋଲାସ୍ ପ୍ରାଇସ୍ ଏବଂ ଆଇସିୟୁରେ ନିକୋଲାସ୍ ହାର୍ଟଙ୍କ ନାମରେ ପୁଅର ନାମ ରଖିଛନ୍ତି। ତାଙ୍କ ଜୀବନ ରକ୍ଷା କରିଥିବାରୁ ଜନସନ୍ ଡାକ୍ତର ଏବଂ ସ୍ୱାସ୍ଥ୍ୟ କର୍ମଚାରୀଙ୍କୁ ଧନ୍ୟବାଦ ଜଣାଇଛନ୍ତି। ଜନସନ୍ କହିଛନ୍ତି, ‘ମୋତେ ବଞ୍ଚାଇଥିବା ଏକ ଚମତ୍କାର। ଚମତ୍କାର ନର୍ସିଂ ପାଇଁ ଧନ୍ୟବାଦ। ଏହା କିପରି ଘଟିଲା, ମୁଁ ବ୍ୟାଖ୍ୟା କରିପାରୁ ନାହିଁ। -ଦେବଦତ୍ତ ରଥ
ସୁରଟରୁ ଓଡ଼ିଶା ଆସିଲା ଟ୍ରେନ୍; ତେବେ ବିଜେପି ପତାକା ବ୍ୟବହାର କାହିଁକି ..
