ମନସ୍ମିତାଙ୍କ ଉଦ୍ୟମରେ ପୂରଣ ହେବାକୁ ଯାଉଛି ବହୁ ଦିନର ଦାବି, ଚରମ୍ପା ଲେବୁଲ କ୍ରସିଂ ସମସ୍ୟା ନେଇ କେନ୍ଦ୍ର ରେଳମନ୍ତ୍ରୀଙ୍କୁ ଭେଟିଲେ ମନସ୍ମିତା

ଭଦ୍ରକ, ୨୮ା୧୨ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଚରମ୍ପା ଡଗରାସାହି ମାର୍କେଟ ନିକଟ ଲେବୁଲ କ୍ରସିଂଟି ଭଦ୍ରକ ରେଳ ଷ୍ଟେସନର ଖୁବ ନିକଟରେ ଅବସ୍ଥିତ । ଏହି ଲେବୁଲ କ୍ରସିଂ ବ୍ୟସ୍ତବହୁଳ ଏବଂ ଏହା ମଧ୍ୟ ଦେଇ ବହୁ ସଂଖ୍ୟକ ଯାନ ନିୟମିତ ଯାତାୟତ କରିଥାଏ । ପୌରାଞ୍ଚଳର ୨ଟି ୱାର୍ଡ଼ ସମେତ, କିଛି ପଞ୍ଚାୟତ, ବାଲେଶ୍ୱର ଜିଲ୍ଲାର କେତେକ ଅଞ୍ଚଳର ଲୋକମାନେ ଏହି ଲେବୁଲ କ୍ରସିଂ ଦେଇ ନିୟମିତ ଯିବା ଆସିବା କରିଥାନ୍ତି । ଭଦ୍ରକ ରେଳ ଷ୍ଟେସନ ପୂର୍ବତଟ ରେଳବାଇର ଏକ ମୁଖ୍ୟ ଷ୍ଟେସନ ଯାହାପାଇଁ ଷ୍ଟେସନର ଖୁବ ନିକଟରେ ଥିବା ଫାଟକ ବହୁ ସମୟରେ ବନ୍ଦ ରହିଥାଏ । ତେଣୁ ଏହି ବାଟ ଦେଇ ଯାଉଥିବା ଗୁରୁତର ରୋଗୀଙ୍କ ଆମ୍ବୁଲାନ୍ସ, ଫାୟାର ବ୍ରିଗେଡ ଗାଡ଼ି, ସ୍କୁଲ ଓ କଲେଜ ଛାତ୍ରଙ୍କୁ ଏଠାରେ ଦୀର୍ଘ ସମୟ ଧରି ଅପେକ୍ଷା କରିବାକୁ ପଡ଼େ । ଏହି ସମସ୍ୟାର ସମାଧାନ ପାଇଁ ଦୀର୍ଘ ଦିନ ହେବ ଅଞ୍ଚଳବାସୀ ଦାବି କରି ଆସୁଥିଲେ । ବିଜେପି ନେତ୍ରୀ ମନସ୍ମିତା ଖୁଣ୍ଟିଆଙ୍କ ଉଦ୍ୟମ କ୍ରମେ ଏହି ଦାବି ଖୁବ୍ ଶୀଘ୍ର ପୂରଣ ହେବାକୁ ଯାଉଛି । ଶ୍ରୀମତୀ ଖୁଣ୍ଟିଆ ଏହି ଦାବି ନେଇ ଦିଲ୍ଲୀ ଯାଇ କେନ୍ଦ୍ର ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ଏବଂ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଭେଟି ଲୋକଙ୍କ ସମସ୍ୟା ଜଣାଇଥିଲେ । ପରେ ଏକ ଦାବିପତ୍ର କେନ୍ଦ୍ର ରେଳମନ୍ତ୍ରୀ ଶ୍ରୀ ବୈଷ୍ଣବଙ୍କୁ ପ୍ରଦାନ କରିଥିଲେ । ମନ୍ତ୍ରୀ ବୈଷ୍ଣବ ଲୋକଙ୍କ ସମସ୍ୟାକୁ ଅନୁଭବ କରିବା ସହ ତୁରନ୍ତ ଏହି ସମସ୍ୟାର ସମାଧାନ ପାଇଁ ବିଭାଗୀୟ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେବା ସହିତ ଏହି କଥା ନିଜେ ମନ୍ତ୍ରୀ ଟୁଇଟ କରି ପ୍ରକାଶ କରିଛନ୍ତି । ଏ ନେଇ ଦୁଇ କେନ୍ଦ୍ରମନ୍ତ୍ରୀଙ୍କୁ ଶ୍ରୀମତୀ ଖୁଣ୍ଟିଆ କୃତଜ୍ଞତା ଜଣାଇଛନ୍ତି ।