ଭଦ୍ରକ, ୨୨ା୩ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଆଗାମୀ ଲୋକସଭା ଓ ଓଡ଼ିଶା ବିଧାନ ସଭା ସାଧାରଣ ନିର୍ବାଚନ ୨୦୨୪ ଅବସରରେ ନିର୍ବାଚନ ଆୟୋଗଙ୍କ ଘୋଷଣା ଅନୁଯାୟୀ ଭଦ୍ରକ ଜିଲ୍ଲାର ୫ଟି ବିଧାନସଭା ଓ ୧ଟି ଲୋକସଭା ଆସନ ପାଇଁ ଆସନ୍ତା ଜୁନ୍ ୧ ତାରିଖରେ ମତଦାନ କାର୍ଯ୍ୟକ୍ରମ ଅନୁଷ୍ଠିତ ହେବ । ସଶକ୍ତ ଗଣତନ୍ତ୍ର ପାଇଁ ମତଦାନ ଗୁରୁତ୍ୱପୂର୍ଣ୍ଣ ଅଟେ । କେହି ବି ଜଣେ ଭୋଟର ନିଜର ରାଜନୈତିକ ଅଧିକାର ମତଦାନ ସାବ୍ୟସ୍ତ କରିବାରୁ ବିରତ ହେବା ଉଚିତ୍ ନୁହେଁ । ସୂଚନା ଯୋଗ୍ୟକି ଜିଲ୍ଲା ପ୍ରଶାସନ ତରଫରୁ ପ୍ରକାଶିତ ଭୋଟର ତାଲିକାରେ ନାମ ଥିବା ସମସ୍ତ ଭୋଟର ମତଦାନ ପାଇଁ ମତଦାନ କେନ୍ଦ୍ରକୁ ଯିବା ସମୟରେ ନିଜ ନିଜର ଭୋଟର ପରିଚୟ ପତ୍ର ସାଙ୍ଗରେ ନେବେ । ଯେକୌଣସି କାରଣରୁ ନିଜର ଭୋଟର ପରିଚୟ ପତ୍ର ନଥିଲେ ନିର୍ବାଚନ ଆୟୋଗ ଦ୍ୱାରା ସୂଚିତ ଅନ୍ୟ ୧୨ଟି ବିକଳ୍ପ ମଧ୍ୟରୁ ଯେକୌଣସି ଗୋଟିଏ ଫଟୋ ପରିଚୟ ପତ୍ରକୁ ଚିହ୍ନଟ ଭାବେ ବ୍ୟବହାର କରାଯାଇ ପାରିବ । ସେଥି ମଧ୍ୟରେ ଅଛି ଆଧାର କାର୍ଡ଼, ଏମ୍.ଏନ୍.ଇ.ଆର.ଇ.ଜି.ଏ ଜବ୍ କାର୍ଡ଼, ବ୍ୟାଙ୍କ ଓ ଡାକଘର ଦ୍ୱାରା ପ୍ରଦତ୍ତ ଫଟୋ ଥାଇ ପାସବୁକ୍, ଶ୍ରମ ମନ୍ତ୍ରାଳୟର ଯୋଜନାରେ ପ୍ରଦତ୍ତ ସ୍ୱାସ୍ଥ୍ୟବୀମା ସ୍ମାର୍ଟକାର୍ଡ଼, ଡ଼୍ରାଇଭିଂ ଲାଇସେନ୍ସ, ପ୍ୟାନ୍କାର୍ଡ଼, ଏନ.ପି.ଆର. ଅଧୀନ ଆର.ଜି.ଆଇ. ଦ୍ୱାରା ପ୍ରଦତ୍ତ ସ୍ମାର୍ଟ କାର୍ଡ଼, ଭାରତୀୟ ପାସପୋର୍ଟ, ଫଟୋଗ୍ରାଫ୍ ଥାଇ ପେନ୍ସନ୍ କାଗଜାଦି, କେନ୍ଦ୍ର ସରକାର / ରାଜ୍ୟସରକାର / ପି.ଏସ୍.ୟୁ / ପବ୍ଲିକ୍ ଲିମିଟେଡ଼୍ କମ୍ପାନୀ ର କର୍ମଚାରୀଙ୍କୁ ପ୍ରଦତ୍ତ ଫଟୋଥିବା ପରିଚୟ ପତ୍ର, ଏମ୍.ପି./ ଏମ୍.ଏଲ୍.ଏ. / ଏମ୍.ଏଲ୍.ସି. ମାନଙ୍କୁ ପ୍ରଦତ୍ତ କାର୍ଯ୍ୟାଳୟ ପରିଚୟ ପତ୍ର ଏବଂ କେନ୍ଦ୍ର ସରକାରଙ୍କ ସାମାଜିକ ନ୍ୟାୟ ଏବଂ ସଶକ୍ତକରଣ ଦ୍ୱାରା ପ୍ରଦତ୍ତ ୟୁନିକ୍ ଭିନ୍ନକ୍ଷମ ପରିଚୟ ପତ୍ର । ପ୍ରକାଶ ଥାଉକି ଗତ ଜାନୁୟାରୀ ୫ ତାରିଖରେ ପ୍ରକାଶିତ ଭୋଟର ତାଲିକା ଅନୁଯାୟୀ ଭଦ୍ରକ ଜିଲ୍ଲାର ୬,୫୨,୭୨୧ ପୁରୁଷ ଭୋଟର, ୬,୧୧,୩୪୮ ମହିଳା ଭୋଟର ଓ ୧୫୧ ଜଣ ତୃତୀୟ ଲିଙ୍ଗୀ ଭୋଟରଙ୍କୁ ନେଇ ସମୁଦାୟ ୧୨,୬୪,୨୨୦ ଜଣ ଭୋଟର ଅଛନ୍ତି । ସେମାନଙ୍କ ମଧ୍ୟରେ ୧୮ ରୁ ୧୯ ବର୍ଷ ବୟସ ବର୍ଗରେ ୧୪,୨୩୯ ପୁରୁଷ, ୧୧,୬୭୨ ମହିଳା ଓ ୪ ଜଣ ତୃତୀୟ ଲିଙ୍ଗିଙ୍କୁ ନେଇ ସମୁଦାୟ ୨୫,୯୧୫ ଭୋଟର ଅଛନ୍ତି । ସେହିପରି ବରିଷ୍ଠ ନାଗରିକ ୮୦ ବର୍ଷ ଓ ତହିଁରୁ ଉର୍ଦ୍ଧ୍ୱ ବୟସ ବର୍ଗରେ ୧୫,୩୫୩ ପୁରୁଷ, ୧୬,୦୦୫ ମହିଳା ଓ ୨ ଜଣ ତୃତୀୟ ଲିଙ୍ଗୀଙ୍କୁ ନେଇ ସମୁଦାୟ ୩୧,୩୬୦ ଜଣ ଭୋଟର ଅଛନ୍ତି । ଦିବ୍ୟାଙ୍ଗ ଭୋଟରଙ୍କ ମଧ୍ୟରେ ୧୪,୬୨୨ ପୁରୁଷ, ୧୩,୫୭୧ ମହିଳା ଏବଂ ଜଣେ ତୃତୀୟ ଲିଙ୍ଗିଙ୍କୁ ନେଇ ସମୁଦାୟ ୨୮,୧୯୪ ଜଣ ଅଛନ୍ତି ।
ଭୋଟର ତାଲିକାରେ ନାମଥାଇ ଭୋଟର ପରିଚୟ ପତ୍ର ନଥିଲେ ବି ଦେଇହେବ ଭୋଟ, ଭୋଟର ପରିଚୟ ପତ୍ରର ୧୨ଟି ବିକଳ୍ପ ରୁ ଗୋଟିଏ ଆବଶ୍ୟକ
