ଭଦ୍ରକ, ୯ା୬ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଇତିମଧ୍ୟରେ ଭୁବନେଶ୍ୱରରୁ ବାଲେଶ୍ୱର ଓ ବାଲେଶ୍ୱରରୁ ଭୁବନେଶ୍ୱର ଯାଉଥିବା ଡିଏମ୍ୟୁ / ମେମୁ ଟ୍ରେନ୍ ଭଦ୍ରକରୁ ଚାଲିବା ସହ ଭଦ୍ରକ ସଂସଦୀୟ କ୍ଷେତ୍ର କେତେକ ରେଳଷ୍ଟେସନର ଉନ୍ନତି ପାଇଁ ସାଂସଦ ମଂଜୁଲତା ମଣ୍ଡଳଙ୍କ ଦାବିପତ୍ର ସହ ପୂର୍ବତନ ଧାମନଗର ବିଧାୟକ ମୁକ୍ତିକାନ୍ତ ମଣ୍ଡଳ କେନ୍ଦ୍ର ରେଳମନ୍ତ୍ରୀ ଓ ରେଲ୍ୱେ ବୋର୍ଡର ଅଧ୍ୟକ୍ଷଙ୍କୁ ଭେଟି ଆଲୋଚନା କରିଛନ୍ତି। ଏ ସଂପର୍କରେ ମିଳିଥିବା ତଥ୍ୟ ମୂଳେ ରେଳଯାତ୍ରୀଙ୍କ ସୁବିଧା ପାଇଁ ପୂର୍ବରୁ ଭଦ୍ରକରୁ ଭୁବନେଶ୍ୱର ଓ ବର୍ତ୍ତମାନ ବାଲେଶ୍ୱରରୁ ଭୁବନେଶ୍ୱର ଯାଉଥିବା ଡିଏମ୍ୟୁ ଓ ମେମୁ ଟ୍ରେନ୍ରେ ଅତିରିକ୍ତ କୋଚ୍ (ବଗି) ସଂଖ୍ୟା ବୃଦ୍ଧି ସହିତ ଭଦ୍ରକ ସଂସଦୀୟ କ୍ଷେତ୍ର ଅନ୍ତର୍ଗତ ବାହାନଗା, ସୋରୋ, ସବିରା, ଭଦ୍ରକ, ରାଣୀତାଲ, ମାର୍କୋଣା, କେନ୍ଦୁଆପଦା, ବାଉଦପୁର, ମଞ୍ଜୁରୀରୋଡ୍ ଓ କପାଳୀ ରେଲ୍ୱେ ଷ୍ଟେସନର ଉନ୍ନତି ଭଳି ବିଭିନ୍ନ ଦାବି ନେଇ ଶ୍ରୀ ମଣ୍ଡଳ ସାଂସଦଙ୍କ ଲିଖିତ ପତ୍ର ସହିତ ନୂଆଦିଲ୍ଲୀସ୍ଥ ସଂଚାର ଭବନ ଏବଂ ରେଳଭବନ ଠାରେ କେନ୍ଦ୍ର ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ଓ ରେଲ୍ୱେ ବୋର୍ଡର ଅଧ୍ୟକ୍ଷ ବିନୟ କୁମାର ତ୍ରିପାଠୀଙ୍କୁ ଭେଟି ଦାବିପତ୍ର ପ୍ରଦାନ କରିଛନ୍ତି। ତେବେ ଖୁବଶୀଘ୍ର ପର୍ଯ୍ୟାୟକ୍ରମେ ଏହି ଦାବିଗୁଡିକ ପୂର୍ଣ୍ଣ ହେବ ବୋଲି ମନ୍ତ୍ରୀ ଏବଂ ରେଳବାଇ ଅଧ୍ୟକ୍ଷ ପ୍ରତିଶ୍ରୁତି ଦେଇଥିବାର ଜଣାପଡିଛି।
ଭଦ୍ରକ ସାଂସଦଙ୍କ ପତ୍ର ନେଇ କେନ୍ଦ୍ର ରେଳମନ୍ତ୍ରୀ ଓ ରେଳବାଇ ଅଧ୍ୟକ୍ଷଙ୍କୁ ଭେଟିଲେ ମୁକ୍ତିକାନ୍ତ, ଭଦ୍ରକରୁ ମେମୁ ଟ୍ରେନ୍ ଚାଲିବା ସହ ବିଭିନ୍ନ ଷ୍ଟେସନର ଉନ୍ନତିକରଣ ଦାବି
